ខេត្តកែប ៖ បើតាមសេចក្តីរាយការណ៍បឋមបានឱ្យដឹងថា សាច់មាន់ទាខូចគុណភាពជាង១តោន ត្រូវបានអាជ្ញាធរខេត្តកែប មានកងនគរបាល និងមន្ត្រីកងរាជអាវុធហត្ថស្រុកដំណាក់ចង្អើរ ក្នុងនោះមានមន្ត្រីកាំកុងត្រូលផងដែរ បានធ្វើការដកហូត និងដុតបំផ្លាញចោលកាលពីម៉ោង៤ល្ងាច ថ្ងៃទី26 ខែកុម្ភៈ ឆ្នាំ២០២០ នៅចំណុចជើងភ្នំលាវ ឃុំពងទឹក ស្រុកដំណាក់ចង្អើរ ខេត្តកែប។
បើតាមការឱ្យដឹងពីលោកវរសេនីយ៍ទោ ង៉ែត ទូច ប្រធានការិយាល័យនគរបាលប្រឆាំងបទល្មើសសេដ្ឋកិច្ច ស្នងការដ្ឋាននគរបាលខេត្តកែប បាននិយាយប្រាប់ឱ្យដឹងថា សាច់មាន់ទាទម្ងន់ជាង1តោនដែលប្រជាពលរដ្ឋម្នាក់ឈ្មោះ អែម ប្រុស ភេទប្រុស អាយុ46ឆ្នាំ នៅភូមិភ្នំលាវ បានទិញបន្តពីឈ្មោះ អែម ភារៈ ។ ហើយ អែម ភារៈ ក៏បានទិញពីឈ្មោះទេព ទិត្យនៅរាជធានីភ្នំពេញនោះ នគរបាលក៏ដូចមន្ត្រីកាំកុងត្រូល បានរកឃើញថា សាច់មាន់ទាទាំងជាង1តោននោះ ពិតជាបានខូចគុណភាពអស់ទៅហើយ។
លោកវរសេនីយ៍ទោ ង៉ែត ទូច និយាយប្រាប់ឱ្យដឹងថា ឆ្លងតាមការពិនិត្យជាក់ស្ដែងរកឃើញថា សាច់មាន់ទាមានទម្ងន់ជាង1តោននោះ ពិតជាខូចគុណភាពមែន ហើយអាជ្ញាធរស្រុកខេត្តបានឯកភាពគ្នា ធ្វើការដុតចោលនៅជើងភ្នំមួយក្នុងខេត្តកែបនោះតែម្ដងទៅ។
លោកវរសេនីយ៍ទោ និយាយបន្តទៀតថា ប្រជាពលរដ្ឋ2នាក់ ជាទិញបន្តសាច់មាន់ពីក្រុមឈ្មួញនៅរាជធានីភ្នំពេញ ត្រូវបានអាជ្ញាធរធ្វើការអបរំ និងឈប់ឱ្យទិញបន្តមកលក់ឱ្យពលរដ្ឋឯទៀតៗ ព្រោះថា សាច់ទាំងនេះ បើប្រជាពលទិញយកទៅហូបអាចនឹងប៉ះពាល់ដល់សុខភាពមិនខានឡើយ។ (កែសម្រួលដោយ ៖ បុប្ផា)
ចែករំលែកព័តមាននេះ