ខេត្តប៉ៃលិន ៖ គេសង្ស័យថាមានប្រជាពលរដ្ឋដុតព្រៃភ្លេចពន្លត់ បណ្តាលឱ្យភ្លើងរាលដាលឆេះចម្ការតាង៉ែនរបស់មន្ត្រីកងរាជអាវុធហត្ថម្នាក់ខូចខាតអស់ជាង១០០០ដើម បង្កការភ្ញាក់ផ្អើលដល់ម្ចាស់ចម្ការ និងអ្នកភូមិខំនាំគ្នាជួយពន្លត់ដែរ តែមិនអាចទប់ស្កាត់បានឡើយ ក៏ទូរស័ព្ទសុំឱ្យរថយន្តពន្លត់អគ្គីភ័យស្នងការនគរបាលខេត្តចុះមកជួយអន្តរាគមន៍ពន្លត់ទាំងយប់ទាន់ពេលវេលា កុំអីភ្លើងបន្តឆេះរាលដាលរាប់ម៉ឺនដើម និងឆ្លងដល់ចម្ការផ្សេងៗទៀតជាច្រើនជាមិនខាន ។
ហេតុការណ៍ខាងលើនេះបានកើតឡើងកាលពីវេលាម៉ោង៧និង២០នាទីយប់ថ្ងៃទី២៧ ខែកុម្ភៈ ឆ្នាំ២០២០ នៅចំណុចទល់មុខវត្តសួស្ដី ស្ថិតក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
តាមប្រភពព័ត៌មានពីនគរបាលបានឱ្យដឹងថា ម្ចាស់ចម្ការតាង៉ែនរងគ្រោះខាងលើឈ្មោះ លី សុផា ភេទប្រុស អាយុ៣២ឆ្នាំ ជាមន្ត្រីកងរាជអាវុធហត្ថ រស់នៅភូមិឃុំកើតហេតុ ។
តាមប្រភពដដែលបានបន្តទៀតថា ក្រោយពីឃើញអណ្តាតភ្លើង និងផ្សែងហុយចេញពីចម្ការតាង៉ែខាងលើ ធ្វើឱ្យម្ចាស់ចម្ការភ័យស្លន់ស្លោរ រត់ទៅពឹងអ្នកជិតខាងចូលជួយពន្លត់ដែរ តែដោយសារនៅក្នុងចម្ការសម្បូរស្មៅងាប់ច្រើន បណ្តាលឱ្យរាលដាលឆាបឆេះកាន់តែខ្លាំងឡើងៗ ទើបទូរស័ព្ទរាយការណ៍ឱ្យខាងនគរបាលពន្លត់អគ្គីភ័យចុះមកជួយអន្តរាគមន៍បាញ់ទឹកភ្លាមៗ ហើយភ្លើងបានរលត់ទាំងស្រុង ដោយប្រើប្រាស់រថយន្ដពន្លត់អគ្គីភ័យនៃស្នងការដ្ឋានចំនួន៣គ្រឿង ប្រើប្រាស់ទឹកអស់ចំនួន៥រថយន្តផងដែរ ។
ពាក់ព័ន្ធនឹងករណីអគ្គិភ័យឆាបឆេះចម្ការតាង៉ែនខាងលើ ត្រូវបានគេសង្ស័យថា មកពីមានប្រជាពលរដ្ឋដុតព្រៃភ្លេចពន្លត់ភ្លើង ទើបបង្កជាអគ្គិភ័យបែបនេះ ៕ (កែសម្រួលដោយ ៖ ធីតា)
ចែករំលែកព័តមាននេះ