រាជធានីភ្នំពេញ ៖ នាព្រឹកថ្ងៃពុធ ទី២៦ ខែកុម្ភៈ ឆ្នាំ២០២០ អគ្គនាយកដ្ឋានគយ និងរដ្ឋាករកម្ពុជា (អគរ) បានរៀបចំកិច្ចប្រជុំបូកសរុបការងារប្រចាំឆ្នាំ២០១៩…
រាជធានីភ្នំពេញ ៖ នាព្រឹកថ្ងៃពុធ ទី២៦ ខែកុម្ភៈ ឆ្នាំ២០២០ អគ្គនាយកដ្ឋានគយ និងរដ្ឋាករកម្ពុជា (អគរ) បានរៀបចំកិច្ចប្រជុំបូកសរុបការងារប្រចាំឆ្នាំ២០១៩ ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមពីសំណាក់ថ្នាក់ដឹកនាំក្រសួងសេដ្ឋកិច្ចនិងហិរញ្ញវត្ថុ អគ្គនាយកដ្ឋានពន្ធដារ និងថ្នាក់ដឹកនាំគ្រប់ជាន់ថ្នាក់នៃ អគរ។
ក្នុងរបាយការណ៍បូកសរុបការងារគយនិងរដ្ឋាករ ឯកឧត្តមបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានបង្ហាញថា សម្រាប់ឆ្នាំ២០១៩ ចំណូលសរុបមានប្រមាណជាង ១៣ ទ្រីលានរៀល (ប្រមាណ ៣,២១៥ លានដុល្លារអាមេរិក) កើនឡើង ៣០% ធៀបនឹងឆ្នាំ២០១៨ ហើយលើសផែនការដែលបានកំណត់ប្រមាណ ៤២.៧%។ បើប្រៀបធៀបនឹងឆ្នាំ២០១៨ ចំណូលតាមប្រភេទពន្ធសំខាន់ៗមានកំណើនខ្ពស់គួរឱ្យកត់សម្គាល់ ក្នុងនោះ ពន្ធនាំចូលកើនឡើង ៣០.៧%, អាករពិសេសកើនឡើង ៣៣.៦% និងអាករលើតម្លៃបន្ថែម (VAT) កើនឡើង ២៨.៨%។
បើពិនិត្យលើចំណូលតាមក្រុមទំនិញវិញ មុខទំនិញយានយន្តនិងគ្រឿងចក្របន្តជាប្រភពចំណូលសំខាន់ ដោយគ្របដណ្តប់ប្រមាណ ៥២.៧% នៃចំណូលសរុប។ ចំណូលដែល អគរ ប្រមូលបានក្នុងឆ្នាំ២០១៩ នេះ មានកម្រិតខ្ពស់ជាងគេក្នុងរយៈពេល ២០ឆ្នាំ កន្លងមកនៅក្នុងបរិការណ៍ដែលការអនុគ្រោះពន្ធអាករ ទាំងក្នុងគោលដៅលើកទឹកចិត្តវិនិយោគ និងវិស័យអាទិភាពនានា ព្រមទាំងការអនុវត្តកិច្ចព្រមព្រៀងពាណិជ្ជកម្មសេរី មានការកើនឡើងឥតឈប់ឈរពីមួយឆ្នាំទៅមួយឆ្នាំ។
ទន្ទឹមនឹងការងារប្រមូលចំណូល អគរ ក៏សម្រេចបាននូវសមិទ្ធផលលើការដ្ឋានការងារផ្សេងទៀត រួមមានការរៀបចំឯកសារយុទ្ធសាស្ត្រ, គោលនយោបាយ, ច្បាប់ និងបទប្បញ្ញត្តិនានាមួយចំនួន, ការបន្តលើកកម្ពស់កិច្ចសម្រួលពាណិជ្ជកម្ម តាមរយៈការកែលម្អនិងពង្រីកមុខងារប្រព័ន្ធស្វ័យប្រវត្តិកម្មគយ, ការបញ្ចុះអត្រាពន្ធគយអាករនិងគោលនយោបាយលើកទឹកចិត្តវិស័យកសិកម្ម និងសហគ្រាសធុនតូចនិងមធ្យម, ការពង្រឹងការងារបង្ការនិងបង្ក្រាបអំពើរត់គេចពន្ធ និងបទល្មើសឆ្លងដែន, ការចូលរួមទប់ស្កាត់ការលាងសម្អាតប្រាក់និងហិរញ្ញប្បទានភេវរកម្ម, កិច្ចសហប្រតិបត្តិការអន្តរជាតិ, និងការអភិវឌ្ឍន៍ស្ថាប័ន ជាដើម។
លើសពីនេះ អគរ ក៏បានអនុវត្តដោយរលូននូវវិធានការមុតស្រួចរបស់រាជរដ្ឋាភិបាលពាក់ព័ន្ធនឹងគយ ដែលបានដាក់ចេញដោយប្រមុខរាជរដ្ឋាភិបាលក្នុងវេទិការាជរដ្ឋាភិបាល-វិស័យឯកជនលើកទី១៨ កាលពីថ្ងៃទី២៩ ខែមីនា ឆ្នាំ២០១៩ ផងដែរ រួមមាន (១)ការលើកទឹកចិត្តផ្នែកគយដល់សហគ្រាសធុនតូចនិងមធ្យម, (២)ការអនុវត្តកម្រៃសេវាសាធារណៈរបស់ អគរ, (៣) ការកាត់បន្ថយចំនួនកុងតែន័រនិងកម្រៃស្កែន, (៤) ការដឹកនាំក្រុមការងារអន្តរស្ថាប័នដើម្បីកាត់បន្ថយមុខទំនិញក្នុងបញ្ជីទំនិញហាមឃាត់និងទំនិញជាប់កម្រិតកំណត់, និង (៥)ការអនុវត្តប្រព័ន្ធបញ្ជរតែមួយជាតិដំណាក់កាលទី២។
ក្នុងឱកាសនេះ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី បានសម្តែងការកោតសរសើរនិងវាយតម្លៃខ្ពស់ចំពោះលទ្ធផលល្អប្រសើរ ដែលបានមកពីកិច្ចខិតខំប្រឹងប្រែងប្រកបដោយមនសិការ និងស្មារតីទទួលខុសត្រូវខ្ពស់របស់មន្ត្រីគយ និងរដ្ឋាករគ្រប់រូប។ ជាមួយគ្នានេះ ក្នុងខណៈដែលកម្ពុជា បាននិងកំពុងជួបប្រទះនូវបញ្ហាប្រឈមធំៗមួយចំនួន រួមមាន ការធ្លាក់ចុះនូវកំណើនសេដ្ឋកិច្ចសកល, ការព្យួរដោយផ្នែកនៃប្រព័ន្ធអនុគ្រោះ EBA និងការរីករាលដាលនៃមេរោគ Covid-19 ដែលធ្វើឱ្យប៉ះពាល់ធ្ងន់ធ្ងរដល់ខ្សែចង្វាក់ផ្គត់ផ្គង់វត្ថុធាតុដើម ឯកឧត្តមអគ្គបណ្ឌិតសភាចារ្យបានណែនាំសម្រាប់ជាទិសដៅអនុវត្តបន្តក្នុង ឆ្នាំ២០២០ ដោយសង្កត់ធ្ងន់លើការងារមួយចំនួន រួមមាន ៖
(១) បន្តពង្រឹងអភិបាលកិច្ចល្អក្នុងស្ថាប័ន ដោយត្រូវប្រកាន់ខ្ជាប់អភិក្រម ៤ ប្រការរបស់ក្រសួងសេដ្ឋកិច្ច និងហិរញ្ញវត្ថុ និងអភិក្រម ៥ ប្រការរបស់ សម្ដេចតេជោនាយករដ្ឋមន្ត្រី គឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់
(២) លើកកម្ពស់អនុលោមភាពវិស័យឯកជន តាមរយៈការផ្តល់កិច្ចសម្រួលពាណិជ្ជកម្មដល់ធុរជនមានអនុលោមភាពខ្ពស់ ប៉ុន្តែត្រូវចាត់វិធានការម៉ឺងម៉ាត់ចំពោះធុរជនដែលប្រព្រឹត្តល្មើស
(៣) ចាត់វិធានការសម្រួលដល់ការនាំចូលនូវវត្ថុធាតុដើមបម្រើផលិតកម្មនៃគម្រោងវិនិយោគនានា ទាំងក្នុង និងក្រៅតំបន់សេដ្ឋកិច្ចពិសេស ជាពិសេសនៅពេលដែលខ្សែចង្វាក់ផ្គត់ផ្គង់ដំណើរការឡើងវិញបន្ទាប់ពីត្រូវបានផ្អាកមួយរយៈដោយសារការផ្ទុះឡើងនៃជម្ងឺ Covid-19
(៤) បន្តពង្រីក និងធ្វើបច្ចុប្បន្នភាពប្រព័ន្ធស្វ័យប្រវត្តិកម្មគយ និងជំរុញការអនុវត្តប្រព័ន្ធបញ្ជរតែមួយជាតិដំណាក់កាលទី២ ឱ្យបានពេញលេញ
(៥) បន្តយកចិត្តទុកដាក់ពង្រឹងប្រសិទ្ធភាព និងធ្វើឱ្យបានឆាប់រហ័សនូវការងារផ្ទៀងផ្ទាត់តម្លៃគិតពន្ធគយ, ចំណាត់ថ្នាក់ទំនិញ, និងវិធានដើមកំណើតទំនិញ ព្រមវាយតម្លៃផលប៉ះពាល់លើចំណូលគយដែលបណ្តាលមកពីហេតុផលនានា ដើម្បីចាត់វិធានការប៉ះប៉ូវចំណូលឱ្យបានសមស្រប
(៦) ជំរុញបញ្ចប់ការរៀបចំឯកសារយុទ្ធសាស្ត្របច្ចេកវិទ្យាព័ត៌មានរបស់ អគរ និងត្រូវរៀបចំឱ្យមានគម្រោងចំណាយច្បាស់លាស់ សម្រាប់រយៈពេលមធ្យម និងវែង
(៧) បន្តអនុវត្តវិធានការរបស់រាជរដ្ឋាភិបាលដែលបានដាក់ចេញកន្លងមក និងត្រៀមអនុវត្តនូវកញ្ចប់វិធានការថ្មីៗរបស់រាជរដ្ឋាភិបាល ដែលស្ថិតក្រោមសមត្ថកិច្ចរបស់ អគរ ឱ្យមានប្រសិទ្ធភាព
និង (៨)ជំរុញបញ្ចប់ការសិក្សាគោលនយោបាយការនាំចូលរថយន្តប្រើរួច។ បន្ថែមលើនេះ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី ក៏បានណែនាំឱ្យអគ្គនាយកដ្ឋានគយ និងរដ្ឋាករកម្ពុជា សហការជាមួយអគ្គនាយកដ្ឋានពន្ធដារធ្វើការសិក្សាលទ្ធភាពនៃការអនុញ្ញាតឱ្យបើកកន្លែងសម្រាប់លក់ទំនិញប្រណីតៗ និង Outlet តាមតំបន់ ទេសចរណ៍ និងទីប្រជុំជនសំខាន់ៗដើម្បីទាក់ទាញការវិនិយោគផ្នែកនេះ។
នាឱកាសនោះដែរ ដើម្បីជាការលើកទឹកចិត្ត ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានបំពាក់គ្រឿងឥស្សរិយយសនិងបណ្ណសរសើរជូនដល់មន្ត្រីគយនិងរដ្ឋាករមានស្នាដៃមួយចំនួន។
ចែករំលែកព័តមាននេះ