ប្រសិនបើអ្នកជាមនុស្សដែលចូលចិត្តធ្វើការ ដើម្បីជួយអ្នកដទៃនោះការធ្វើការឲ្យអង្គការមិនរកប្រាក់ចំណូលអាចជាការងារក្នុងក្តីសុបិនរបស់អ្នក ព្រោះក្រៅពីការអនុញ្ញាតឲ្យអ្នកចូលរួមក្នុងការជួយដល់អ្នកដទៃហើយ ការងារទាំងនេះភាគច្រើនផ្តល់អត្ថប្រយោជន៍ជាច្រើនដូចជា ភាពបត់បែននៃការងារ និងឱកាសអភិវឌ្ឍន៍ខ្លួនបន្ថែមជាដើម ។
អង្គការទាំងនេះ ជាស្ថាប័នដែលគោលដៅធំជាងគេ គឺមិនមែនការរកប្រាក់ចំណូលដូចអាជីវកម្មទូទៅឡើយ ។ ពួកគេអាចមានប្រភេទជាច្រើន និងមានបេសកកម្មខុសៗគ្នា ដើម្បីសម្រេចគោលដៅរបស់ស្ថាប័នខ្លួន ។
ទោះជាការងារក្នុងស្ថាប័នទាំងនេះ ភាគច្រើនតម្រូវឲ្យមនុស្សមួយចំនួនធ្វើការដោយស្ម័គ្រចិត្ត និងមិនទទួលប្រាក់ចំណូលពិតមែនក្តីលុយក្នុងករណីនេះ ប្រហែលជាមិនសូវសំខាន់ទេ ប្រសិនបើអ្នកចាប់អារម្មណ៍នឹងអត្ថប្រយោជន៍ដូចខាងក្រោមនេះ ៖
១. គាំទ្របេសកកម្មអ្វីមួយដែលអ្នកខ្វល់
អត្ថប្រយោជន៍ធំជាងគេនៃការធ្វើការឲ្យអង្គការទាំងនេះ គឺវាអនុញ្ញាតឲ្យមនុស្សធ្វើការឲ្យស្ថាប័នមួយដែលមានគោលដៅស្របទៅនឹងអ្វីដែលអ្នកគាំទ្រ ។ ដូច្នេះបើអ្នកពិតជាខ្វល់ខ្វាយពីបញ្ហាអ្វីមួយដូចជាបញ្ហាបរិស្ថាន ឬការអប់រំជាដើម ការចំណាយពេលវេលានិងកម្លាំងរបស់អ្នកជាមួយអង្គការទាំងនេះអាចជួយឲ្យអ្នកចូលរួមក្នុងការរកដំណោះស្រាយសំខាន់ៗ ។
២. ឱកាសក្នុងការអភិវឌ្ឍខ្លួន
អង្គការតូចៗភាគច្រើនត្រូវការមនុស្សដែលមានចិត្តចង់រៀនសូត្រពីការងារ និងជំនាញខុសៗគ្នា ដែលផ្តល់ជាឱកាសល្អៗក្នុងការឲ្យអ្នករៀនសូត្រពីជំនាញថ្មីៗ និងដកបទពិសោធន៍ពីផ្នែកកាន់តែច្រើន ។
៣. ជួបបុគ្គលិកដែលប្តេជ្ញាជាមួយការងារ
ពេលដែលអ្នកធ្វើការឲ្យអង្គការមិនរកប្រាក់ចំណូលដែលស័ក្តិសមទៅនឹងចំណាប់អារម្មណ៍ និងជំនាញរបស់អ្នក អ្នកនឹងមានឱកាសច្រើនក្នុងការជួបជាមួយនឹងមិត្តរួមការងារដែលគួរឲ្យចាប់អារម្មណ៍ និងមានទស្សនៈស្រដៀងគ្នានឹងអ្នក ។
៤. ផ្តល់គោលដៅក្នុងជីវិត
ការធ្វើការឲ្យអង្គការដែលមានបេសកកម្មស្របទៅនឹងអ្វីដែលអ្នកជឿជាក់លើមានន័យថាអ្នកអាចមើលឃើញឥទ្ធិពលរបស់ការងាររបស់អ្នកទៅលើការធ្វើឲ្យពិភពលោកកាន់តែល្អប្រសើរឡើង ។ វាអាចផ្តល់អារម្មណ៍ដ៏ល្អដល់ទៅអ្នក និងថែមទាំងផ្តល់គោលដៅមួយក្នុងជីវិតរបស់អ្នកដែលជួយឲ្យអ្នករស់នៅកាន់តែមានន័យទៀតផង ៕ កែសម្រួលដោយ ៖ សុឃាក់
ចែករំលែកព័តមាននេះ