រាជធានីភ្នំពេញ ៖ សហព័ន្ធកីឡាប្រដាល់សកលកម្ពុជា បានរៀបចំបង្កើត និងដំណើរការគណៈកម្មការប្រដាល់សកលអាជីព«Cambodia Professional Boxing Commission»ស្របតាមផែនការយុទ្ធសាស្ត្រស្វែងរកមេដាយសម្រាប់ការប្រកួតកីឡាSEA GAMES លើកទី៣២ ឆ្នាំ២០២៣ ។
ការប្រកាសជាផ្លូវនៃការបង្កើតគណៈកម្មការប្រដាល់សកលអាជីពកម្ពុជានេះធ្វើឡើងនាល្ងាចថ្ងៃទី២៥ កុម្ភៈ នៅទីស្នាក់ការគណៈកម្មាធិការជាតិអូឡាំពិកកម្ពុជាដោយមានការអញ្ជើញចូលរួមធ្វើជាសាក្សីពីសំណាក់លោកអ៊ុក ឌីវ៉ងអគ្គនាយករងនៃអគ្គនាយកដ្ឋានកីឡាតំណាង ក្រសួងអប់រំ យុវជន និងកីឡា លោកសាស្ត្រាចារ្យ ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជា តំណាងស្ថានទូតជប៉ុន និងក្រុមកីឡាជម្រើសជាតិ ។
លោកប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជាដែលបាន ទទួលការគាំទ្រជាប្រធានគណៈកម្មការ ប្រដាល់សកលអាជីពកម្ពុជាបាននិយាយថា គណៈកម្មការប្រដាល់សកលអាជីពកម្ពុជាស្ថិតក្រោមអាណាព្យាបាលរបស់សហព័ន្ធប្រដាល់សកលកម្ពុជា ។ ការបង្កើតគណៈកម្មការប្រដាល់សកលអាជីពនេះធ្វើឡើងគឺស្របតាមផែនការយុទ្ធសាស្ត្រស្វែងរកមេដាយសម្រាប់ការប្រកួតកីឡាSEA GAMES លើកទី៣២ ឆ្នាំ២០២៣ ។
សូមបញ្ជាក់ថា សព្វថ្ងៃនេះប្រដាល់សកលនៅកម្ពុជាពុំសូវមានសកម្មភាពឡើយព្រោះនៅតាមសង្វៀនស្ថានីយទូរទស្សន៍នានា គេត្រូវការតែប្រដាល់គុនខ្មែរប៉ុណ្ណោះ ។ ស្ថានភាពបែបនេះហើយទើបមិនសូវមានអ្នកហ្វឹកហាត់ប្រដាល់សកល ។ អ្នកខ្លះបន្ទាប់ពីហាត់ ប្រដាល់សកលហើយគេរត់ទៅហាត់ប្រដាល់គុនខ្មែរវិញ ឯខ្លះទៀតហាត់ប្រដាល់សកលតែគេបែរជាទៅលួចប្រកួតប្រដាល់គុនខ្មែរទៅវិញ។
លោកប៊ុយ សោភ័ណ្ឌ បានបង្ហើបថា ប្រសិនបើប្រដាល់សកលអាជីពនៅតែគ្មានសង្វៀនប្រកួតនៅក្នុងស្រុកនោះ សហព័ន្ធ និងគណៈកម្មការប្រដាល់សកលអាជីពកម្ពុជា នឹងបញ្ជូនពួកគេឲ្យទៅហាត់ និងប្រកួតនៅប្រទេសជប៉ុន ។គណៈកម្មការប្រដាល់សកលអាជីពកម្ពុជា គឺជាស្ថាប័នតែមួយគត់ដែលមានសិទ្ធិគ្រប់គ្រងរៀបចំព្រឹត្តិការណ៍ប្រកួតកីឡាប្រដាល់សកលអាជីពនៅព្រះរាជាណាចក្រកម្ពុជា ក៏ដូចជាគ្រប់គ្រងនិងដឹកនាំកីឡាករកីឡាការិនីប្រដាល់សកលអាជីពចូលរួមប្រកួតជាលក្ខណៈអន្តរជាតិស្របតាមបទប្បញ្ញត្តិរបស់ស្ថាប័នកីឡាប្រដាល់សកលអាជីពអន្តរជាតិ ។
ចំពោះសមាជិកគណៈកម្មការនាយកនៃគណៈកម្មការប្រដាល់សកលអាជីពកម្ពុជា១០រូបដែលក្នុងនោះមានជនជាតិកម្ពុជាតែ២រូបប៉ុណ្ណោះចំពោះ៨រូបទៀតសុទ្ធតែជាជនជាតិជប៉ុន ។
សមាជិកទាំង១០រូបនោះរួមមានលោក ប៊ុយ សុភ័ណ្ឌ ជាប្រធាន លោក Motohashi Yukiharu អនុប្រធាន លោក Isobe Masahiro នាយកប្រតិបត្តិ លោក ហ៊ុន ដាវីរតនា នាយករងប្រតិបត្តិ លោកស្រី Motohashi Yuko លោក Motohashi Ryotaro លោក Motohashi Taiga លោក Kamehashi Nagakazu លោក Fukuda Akira និងលោក Takamori Jou ជាសមាជិក៕ (កែសម្រួលដោយ ៖ បុប្ផា)
ចែករំលែកព័តមាននេះ