រាជធានីភ្នំពេញ ៖ចំណងអាពាហ៍ពិពាហ៍រវាងតារាចម្រៀងសួស វីហ្សា និងតារាសម្តែងថម មី មានកូនជាលើកដំបូងហើយ ក្រោយពីអ្នកទាំងពីរបានសម្រេចចិត្តចូលរោងកាលពីអំឡុងខែវិច្ឆិកា ឆ្នាំ២០១៩ ។
កូននៅក្នុងផ្ទៃរបស់សួស វីហ្សា នៅមិនទាន់អាចបញ្ជាក់ថា ជាកូនស្រីឬប្រុសនៅឡើយទេ ដោយសារកូននៅមានអាយុតិចខែនៅឡើយ ប៉ុន្តែអ្នកទាំងពីរបានសម្តែងក្ដីត្រេកអរ និងរំភើបយ៉ាងខ្លាំងនៅពេលដែលបានទទួលដំណឹងដ៏ល្អនេះ ។
បញ្ចេញអារម្មណ៍ដ៏សែនរំភើបនេះតារាសម្តែងលោកថម មី បានសសេរបង្ហោះសារជាមួយរូបភាពនៃការធ្វើតេស្តទឹកនោមនៅតាមហ្វេសប៊ុកកាលពីថ្ងៃទី២៥ កុម្ភៈ ២០២០ថា «ក្នុងមួយជីវិតរបស់ខ្ញុំនេះ ថ្ងៃនេះហើយជាថ្ងៃដែលខ្ញុំសប្បាយចិត្តបំផុតដែលមិនអាចយកអ្វីមកថ្លែងបានឡើយ។ អរគុណប្រពន្ធសម្លាញ់ដែលបានផ្តល់កាដូដ៏មានន័យមួយនេះមកឲ្យគ្រួសារយើង ដែលជាកាដូដ៏មានតម្លៃកាត់ថ្លៃពុំបាន (Baby) បងសប្បាយចិត្តខ្លាំងណាស់រកពាក្យអ្វីនិយាយមិនចេញទេ បងពិតជាស្រលាញ់អូនខ្លាំងណាស់ប្រពន្ធសម្លាញ់ បងសូមសន្យាថា នឹងមើលថែរក្សាអូន និង កូនៗយើងឲ្យមានសេចក្តីសុខ និងសុភមង្គលជារៀងរហូតតទៅ ។
បងប្អូនអើយ ខ្ញុំក្លាយជាប៉ាគេហើយ ខ្ញុំមានកូនហើយ ។ ចង់ប្រាប់ពិភពលោកនេះថា ខ្ញុំស្រឡាញ់ប្រពន្ធខ្ញុំណាស់ Sous Visa Dady Mommy»។
ក្រោយពេលដែលលោកថម មី បានបង្ហោះសារជាមួយនឹងក្តីរំភើបនៃការទទួលបានកូនលើកដំបូងនេះ គេសង្កេតឃើញប្រិយមិត្តគាំទ្រ ជាពិសេសអ្នកសិល្បៈជាច្រើនបានចូលរួមអបអរសាទេរ ជាមួយនឹងការជូនពរឲ្យអ្នកទាំងពីរកាន់តែមានសុភមង្គល ។
ជាការឆ្លើយតបនឹងពាក្យជូនពរទាំងអស់នោះតារាចម្រៀងសួស វីហ្សា បានសរសេរថា «នាងខ្ញុំពិតជាសូមអរគុណជាទីបំផុតសម្រាប់ពាក្យជូនពរ ល្អៗ អរគុណសម្រាប់ពាក្យលើកទឹកចិត្ត ជាពិសេសគឺសូមអរគុណសម្រាប់ការស្រលាញ់ដែលមានចំពោះជីវិតគូរបស់ពួកខ្ញុំ នេះជាកម្លាំងចិត្តដ៏រឹងមាំមួយដែលអាចធ្វើឲ្យពួកខ្ញុំកាន់តែរឹងមាំ តស៊ូ នឹងអាចញញឹមបានគ្រប់ពេលវេលា ហើយសូមអភយ័ទោសដែលខ្ញុំតបខមមិន មិនអស់ព្រោះវាមានចំនួនច្រើន »។
គូស្នេហ៍សិល្បៈសួស វីហ្សា និងថម មី បានសម្រេចចិត្តបញ្ចប់ភាពនៅលីវរបស់ខ្លួនកាលពីថ្ងៃទី៣០ ខែវិច្ឆិកា ឆ្នាំ២០២៩ ដោយអាពាហ៍ពិពាហ៍របស់ពួកគេបានចាយប្រាក់ជាង២០ម៉ឺនដុល្លារ ដែលចំនួននេះបូករួមទាំងថ្លៃបណ្ណាការផងដែរ ។
សួស វីហ្សា និង ថម មី បានប្រឡូកការងារសិល្បៈជាច្រើនឆ្នាំមកហើយ ប៉ុន្តែពួកគេទាំងពីរ ទើបតែស្រលាញ់គ្នាប្រមាណ៤ទៅ៥ឆ្នាំមកនេះប៉ុណ្ណោះ ។ ក្រោយពីមើលចិត្តគ្នាបានដិតដល់ហើយ ពួកគេក៏សម្រេចបើកចំហចំណងស្នេហ៍នេះ និងបានកសាងសមិទ្ធផលមួយចំនួនជាមួយគ្នាមុនរៀបការ ក្នុងនោះពួកគេបានទិញរថយន្តទំនើបជាច្រើនគ្រឿង និងផ្ទះវីឡាធំមួយ នៅបុរីទំនើបមួយ និងបើកហាងជាច្រើនកន្លែង ៕ (កែសម្រួលដោយ ៖ បុប្ផា)
ចែករំលែកព័តមាននេះ