ខេត្តមណ្ឌលគិរី ៖ គ្រឿងចក្រចំនួន៤គ្រឿងដែលគេជួលមកពីប្រទេសវៀតណាម ដើម្បីឈូសឆាយដីព្រៃនៅជិតតំបន់ព្រំដែន ត្រូវនគរបាលបង្ក្រាបទាន់ពេល និងឃាត់ខ្លួនជនជាតិវៀតណាម៥នាក់ ជិតបរិវេណក្រុមហ៊ុនមេហ្គាហ្វើស ក្នុងភូមិសាស្ត្រឃុំដាក់ដាំ ស្រុកអូររាំង កាលពីរសៀលថ្ងៃទី២៥ ខែកុម្ភៈ ឆ្នាំ២០២០។
ប្រជាសហគមន៏ឃុំដាក់ដាំបានឲ្យដឹងថា គេបានឃើញគ្រឿងចក្រចំនួន៤គ្រឿង ក្នុងនោះរថយន្តពីរគ្រឿង របស់ជនជាតិវៀតណាមលួចចូលទៅដល់ទឹកដីសហគមន៏សមូហភាពជនជាតិដើមភាគតិច ភូមិពូឡេះ ឃុំដាក់ដាំ ជិតបុស្តិ៍កង់រ៉ូឡង់ព្រំដែនកម្ពុជា-វៀតណាម ដោយគ្មានមូលហេតុ និងច្បាប់ត្រឹមត្រូវ ។ ពេលសហគមន៍តាមទាន់ ក្រុមនេះបញ្ជាក់ថា មានអ្នកមានអំណាចឲ្យពួកខ្លួនចូលមក ដូចនេះសហគមន៍សង្ស័យថាអ្នកមានអំណាចនោះគឺឧកញ៉ាម្នាក់ឲ្យគេទៅឈូសឆាយដីព្រៃតំបន់ការពារដើម្បីយកដីជាកម្មសិទ្ឋផ្ទាល់ខ្លួន។
ក្រុមសហគមន៏ដដែលបន្តថា ដោយសារសហគមន៏ជំរុញខ្លាំងពេក ក្រុមប៉ូលិសចំនួនបីរថយន្តបានចុះធ្វើអន្តរាគមន៏នឹងឃាត់ជនជាតិវៀតណាមទាំងនោះទុកនៅបុស្តិ៍កង់រ៉ូឡង់ ហើយសហគមន៏គឺកំពុងតាមដានករណីខុសច្បាប់មួយនេះ ខ្លាចក្រែងមានភាពមិនប្រក្រតីដោយការឃុបឃិតគ្នាដោះលែងពួកបំផ្លាញធនធានធម្មជាតិ ។
លោក ឡោ សុខា ស្នងការខេត្តមណ្ឌលគិរីឱ្យដឹងថា ជនជាតិវៀតណាមទាំង៥នាក់នឹងត្រូវបណ្តេញចេញទៅវិញ ព្រោះពួកគាត់មានលិខិតឆ្លងដែនត្រឹមត្រូវ ចំណែកគ្រឿងចក្រចំនួន៤គ្រឿង សមត្ថកិច្ចជំនាញនិងត្រួតពិនិត្យលើឯកសារពាក់ព័ន្ធរួច និងប្រគល់ឲ្យមន្ត្រីគយចាត់ការបន្ត។ លោកស្នងការថា គ្រឿងចក្រនេះ ត្រូវបានគេចល័តមកពីខេត្តរតនគិរី ចំណែកជនជាតិវៀតណាមខាងលើក៏ឆ្លងដែនចូលទឹកដីកម្ពុជាតាមច្រកព្រំដែនក្នុងខេត្តរតនៈគិរីផងដែរ។ គ្រឿងចក្រទាំងនេះត្រូវបានគេយកមកបម្រុងមកធ្វើសកម្មភាពសម្អាតព្រៃឲ្យក្រុមហ៊ុន មេហ្គាហ្វើសទាំងមិនទាន់មានការអនុញ្ញាតពីអាជ្ញាធនិងមន្ត្រីជំនាញ។
ជុំវិញករណីខាងលើកាលពីល្ងាចថ្ងៃទី២៥ កុម្ភៈ មន្ទីរកសិកម្មខេត្តមណ្ឌលគិរីប្រាប់ថា ពុំទាន់ទទួលបានព័ត៌មានឃាត់គ្រឿងចក្រនៅចំណុចក្រុមហ៊ុន មេហ្គាហ្វើស នៅឡើយទេ ។ តែក្រុមហ៊ុននេះជាក្រុមហ៊ុនដែលដាំដុះដំណាំកសិឧស្សាហកម្ម មានផ្ទៃដីសរុបជាង៧ពាន់ហិកតា ៕ (កែសម្រួលដោយ ៖ ធីតា)
ចែករំលែកព័តមាននេះ