ខេត្តកំពង់ចាម ៖ ស្ត្រីចំណាស់មេម៉ាយវ័យ៦៩ឆ្នាំម្នាក់ឈ្មោះឃីន រស់នៅភូមិព្រែកស្តី ឃុំព្រះអណ្តូង ស្រុកស្ទឹងត្រង់ ដែលទើបនឹងចេញពីមន្ទីរពេទ្យ មិនទាន់នឹងស្រួលខ្លួនផង ស្រាប់តែត្រូវកូនប្រុសពៅរបស់គាត់អាយុ៤៣ឆ្នាំ ប្តឹងទាមទារយកដី និងផ្ទះរហូតឡើងដល់សាលាដំបូងខេត្ត ។ បណ្ដឹងរបស់កូនធ្វើឲ្យស្ត្រីចំណាស់ជាម្តាយមានការភិតភ័យខ្លាចបាត់បង់ផ្ទះ ហើយត្រូវបានអាជ្ញាធរភូមិ-ឃុំ រួមជាមួយនឹងប្រជាពលរដ្ឋ ចេញមុខជួយការពារមិនឲ្យអ្នកណាមករំលោភបំពានយកដីរបស់ស្ត្រីមេម៉ាយនេះឡើយ ។
ស្ត្រីចំណាស់ដែលកូនពៅប្ដឹងនេះមានកូន២នាក់គឺ កូនបងឈ្មោះប៉ាវ រ៉ា និងកូនពៅឈ្មោះប៉ាវ គង់ ។ ជុំវិញករណីនេះ ត្រូវបានស្ត្រីចំណាស់ឈ្មោះអ៊ុង សុខឃីន ប្រាប់ឲ្យដឹងនៅព្រឹកថ្ងៃទី២៦ សីហា ថា កាលដើមដំបូងផ្ទះរបស់គាត់សាងសង់អំពីឈើនៅតាមជួរដងទន្លេមេគង្គ ។ ដោយសារតែច្រាំងទន្លេបាក់មកជិតដល់ក៏រុះរើមកនៅកន្លែងថ្មីសព្វថ្ងៃនេះ ប៉ុន្តែដោយមានការខ្វះខាតក្នុងជីវភាពគាត់ក៏លក់ដីភូមិបាន១.៧០០ដុល្លារ ផ្ញើទុកឲ្យកូនប្រុសឈ្មោះប៉ាវ គង់ អាយុ៤៣ឆ្នាំ ជាអ្នករក្សាទុក ។ ស្ត្រីចំណាស់បានប្រាប់បន្តថា ក្រោយមកនៅពេលដែលម្តាយរបស់គាត់អាយុជាង៩០ឆ្នាំឈឺក៏ទៅទារលុយពីកូនប្រុសបាន១០០ដុល្លារមកធ្វើបុណ្យសង្ឃទានឲ្យម្តាយ ។ ក្រោយមកទៀតម្តាយអាយុជាង៩០ឆ្នាំ ទទួលមរណភាពបានរៀបចំធ្វើបុណ្យតាមប្រពៃណី ហើយខ្វះលុយឲ្យថ្លៃម្ហូបគេនិងការចំណាយផ្សេងៗក៏ទៅទារលុយពីកូនប្រុស បែរជាកូននេះមិនឲ្យសោះនិងបានបោះបង់គាត់ឲ្យនៅតែម្នាក់ឯងថែមទៀត ។
គាត់និយាយថា ហេតុតែជំពាក់គេច្រើនពេក ទើបសម្រេចចិត្តលក់ដីស្រែ១កន្លែងក្រោយផ្ទះបានលុយ២.០០០ដុល្លារ មកសងគេ និងនឹកស្មានតែចប់រឿងរ៉ាវពីមុន តែបែរជាកូនប្រុសពៅគាត់ប្តឹងទៅសាលាដំបូងខេត្តចោទថា គាត់យកដីកូនលក់ទៅវិញ ។ នៅថ្ងៃទី៣ កញ្ញា ២០១៤ លោកចៅក្រម ទិតសុទ្ធី បូរ៉ាល័ក្ខណ៍ បានចេញដីកាកោះហៅឲ្យគាត់ចូលខ្លួនទៅបំភ្លឺនៅតុលាការ ហើយគាត់បានអះអាងថា ដីទំហំ១២ម៉ែត្រគុណ៣០០ម៉ែត្រជារបស់គាត់ មិនមែនជារបស់កូននោះទេ បើសិនជារបស់កូនមែន ទាល់តែកូនប្រុសឈ្មោះគង់ ត្រូវថែរក្សាគាត់រហូតដល់ស្លាប់ទើបយល់ព្រមឲ្យ តែកូនប្រុសនេះមើលថែគាត់បានប្រហែល២ឆ្នាំប៉ុណ្ណោះ ។ ចំណែកស្ត្រីចំណាស់ឈ្មោះពុធ វ៉ាន់ អាយុ៦៨ឆ្នាំ ជាអ្នកជិតខាងបានឲ្យដឹងថា ចំពោះដីនិងផ្ទះដែលស្ត្រីមេម៉ាយឈ្មោះឃីន នៅសព្វថ្ងៃនេះជាដីរបស់គាត់ មិនមែនរបស់កូនប្រុសពៅឈ្មោះគង់ នោះទេ ។ ការដែលគាត់លក់ដីនេះ ដោយសារតែជំពាក់គេធ្វើបុណ្យសពឲ្យម្តាយអាយុជាង៩០ឆ្នាំ យកលុយមកសងគេនិងព្យាបាលជំងឺ រីឯការលេចឮថា កូនប្រុសប្តឹងម្តាយឡើងដល់សាលាដំបូងខេត្ត គាត់ទើបតែដឹង២ថ្ងៃនេះប៉ុណ្ណោះ ។
ឯបុរសឈ្មោះប៉ាវ គង់ អាយុ៤៣ឆ្នាំ ត្រូវជាកូនពៅរបស់ស្ត្រីមេម៉ាយខាងលើ និងជាដើមបណ្ដឹងបានប្រាប់ឲ្យដឹងថា ចំពោះដីនៅភូមិមាត់ទន្លេដែលលក់បានចំនួន១.៧០០ដុល្លារនោះគាត់ជាអ្នកលក់ មិនមែនម្តាយអ្នកលក់ទេ និងបានយកមកចាយវាយទាំងអស់គ្នាហើយនៅពេលម្តាយឈឺក៏បានចំណាយមើលថែទាំរហូតអស់លុយ ។ នៅក្នុងឆ្នាំ២០១៣ គាត់បានដាក់ពាក្យបណ្តឹងទៅសាលាដំបូងខេត្តមិនមែនប្តឹងចង់បានដីនិងផ្ទះម្តាយនោះទេ គឺគ្រាន់តែឲ្យស្ថាប័នច្បាប់ជួយធ្វើយ៉ាងណា កុំឲ្យម្តាយលក់ដីនៅរាល់ថ្ងៃទៅឲ្យអ្នកដទៃតែប៉ុណ្ណោះ ។ គាត់ថា បើម្តាយចង់បានលុយថ្លៃប៉ុន្មានគាត់សុខចិត្តទិញ ដើម្បីកុំឲ្យទ្រព្យកេរដូនតាបាត់បង់ទៅលើដៃរបស់អ្នកដទៃ ។
លោក អំ សេងអ៊ូ មេឃុំព្រះអណ្តូង មានប្រសាសន៍ថា ចំពោះដីផ្ទះរាល់ថ្ងៃរបស់ស្ត្រីមេម៉ាយខាងលើនេះគឺពិតជារបស់គាត់មែនមិនមែនរបស់កូនប្រុសឈ្មោះប៉ាវ គង់ នោះទេ ហើយថែមទាំងបានផ្តិតមេដៃឲ្យអាជ្ញាធរភូមិឃុំដឹងឮថែមទៀត ។ ក្នុងរយៈពេលចុងក្រោយ ពេលដែលម្តាយឈឺកូនប្រុសនោះមិនបានមកមើលម្តាយទេ គឺម្ដាយនៅតែជាមួយនឹងកូនប្រុសច្បងឈ្មោះប៉ាវ រ៉ា ដែលមានផ្ទះនៅ ក្នុងភូមិព្រែកស្តីនោះដែរ មកជួយដេកកំដរម្តាយ ហើយសូម្បីតែជីដូនអាយុជាង៩០ឆ្នាំស្លាប់ក៏កូនប្រុសពៅរូបនេះ មិនបានមកចូលរួមបុណ្យដែរ នាពេលកន្លងមក ៕
ចែករំលែកព័តមាននេះ