រាជធានីភ្នំពេញ ៖ ផ្ទះឈើប្រក់សង្ក័សីមួយខ្នងត្រូវបានអគ្គីភ័យឆាបឆេះរងការខូចខាតអស់ទាំងស្រុង សង្ស័យមកពីឆ្លងចរន្តអគ្គិសនី បង្កការភ្ញាក់ផ្អើលយ៉ាងខ្លាំងដល់សមត្ថកិច្ចនិងរថយន្តពន្លត់អគ្គីភ័យចុះមកធ្វើការបាញ់ពន្លត់កាលពីវេលាម៉ោង១រំលងអាធ្រាត្រឈានចូលថ្ងៃទី២៥ ខែកុម្ភៈ ឆ្នាំ២០២០ ត្រង់ចំណុចខាងក្រោយរោងសិប្បកម្មផលិតគ្រឿងសង្ហារឹមឈើគ្មានយីហោមួយកន្លែង តាមបណ្ដោយផ្លូវរថភ្លើង ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពពីស្ត្រីជាម្ចាស់ផ្ទះរងគ្រោះឈ្មោះ ទន់ គឹមហ័ង អាយុ៤៥ឆ្នាំ មុខរបរជាកម្មករសំណង់ បានរៀបរាប់ប្រាប់ឲ្យដឹងថា ផ្ទះដែលត្រូវបានភ្លើងឆាបឆេះខាងលើជាប្រភេទផ្ទះឈើប្រក់សង្ក័សីមានទំហំ១៥ម៉ែត្រគុណនឹង៧ម៉ែត្រ។ ដីនិងផ្ទះខាងលើនេះ គឺគាត់បានជួលពីម្ចាស់គេក្នុងតម្លៃ៥០ដុល្លារក្នុងមួយខែ ដើម្បីសាងសង់ផ្ទះស្នាក់នៅជាមួយក្រុមគ្រួសារដែលមានគ្នាចំនួន៨នាក់។
តាមប្រភពដដែលបានបន្តថា មុនពេលកើតហេតុ គ្រួសាររបស់គាត់បានសំរាន្តលង់លក់នៅខាងក្នុងផ្ទះទាំងអស់គ្នាជាធម្មតាដូចសព្វដង។ លុះដល់វេលាកើតហេតុ ខណៈពេលដែលគាត់ភ្ញាក់ដឹងខ្លួនឡើង ស្រាប់តែឃើញមានអណ្ដាតភ្លើងកំពុងឆាបឆេះចេញមកពីផ្នែកខាងក្រោយផ្ទះ ដែលជាផ្ទះបាយយ៉ាងសន្ធោសន្ធៅ។ ភ្លាមៗនោះគាត់ក៏ប្រញាប់ប្រញាល់ដាស់កូនៗនិងប្តីនាំគ្នារត់ចេញទៅខាងក្រៅផ្ទះ និងស្រែកឆោឡោបង្កការភ្ញាក់ផ្អើលដល់ប្រជាពលរដ្ឋដែលរស់នៅក្បែរខាងនាំគ្នារត់មកជួយអន្តរាគមន៍។ និងបានរាយការណ៍ជូនសមត្ថកិច្ចមូលដ្ឋានរួមជាមួយរថយន្តពន្លត់អគ្គិភ័យអោយចុះមកធ្វើការបាញ់ទឹកពន្លត់។
តាមប្រភពដដែលបានបន្តថា ភ្លាមៗនោះភ្លើងបានឆាបឆេះកាន់តែខ្លាំងឡើងៗ ធ្វើឱ្យគាត់មិនអាចចូលទៅជញ្ជូនសម្ភារៈនិងរបស់របរមានតម្លៃចេញមកខាងក្រៅបានឡើយ។ បន្ទាប់មកក៏មានកម្លាំងសមត្ថកិច្ចមូលដ្ឋានរួមជាមួយរថយន្តពន្លត់អគ្គីភ័យរបស់ការិយាល័យបង្កការនិងពន្លត់អគ្គីភ័យនៃស្នងការនគរបាលរាជធានីភ្នំពេញចុះមកជួយអន្តរាគមន៍ចំនួន៤គ្រឿង។ រួចក៏បានធ្វើការបាញ់ទឹកពន្លត់អស់រយៈពេលប្រមាណ៤០នាទីក្រោយមក ភ្លើងក៏បានរលត់ទៅវិញជាស្ថាពរ គឺរលត់នៅម៉ោង១និង៤០នាទីរំលងអាធ្រាត្រថ្ងៃដដែល ដោយប្រើប្រាស់ទឹកអស់ទាំង៤រថយន្ត។
ក្រោយពេលកើតហេតុ សមត្ថកិច្ចមូលដ្ឋានបានឲ្យដឹងថា ក្នុងហេតុការណ៍នោះ មិនបង្កឲ្យឆាបឆេះរាលដាលដល់ផ្ទះប្រជាពលរដ្ឋជិតខាងនោះទេ គឺខូតខាតតែផ្ទះកើតហេតុនិងទ្រព្យសម្បត្តិដែលនៅខាងក្នុងផ្ទះអស់ទាំងស្រុង ចំពោះមូលហេតុត្រូវបានសមត្ថកិច្ចសន្និដ្ឋានថា បណ្ដាលមកពីឆ្លងចរន្តអគ្គិសនី៕ (កែសម្រួលដោយ ៖ ធីតា)
ចែករំលែកព័តមាននេះ