រាជធានីភ្នំពេញ ៖ ការជួញដូរឧបករណ៍និស្សន្ទ(ការជួញដូរមាសប្រាក់តាមអនឡាញ)ជាផ្នែកមួយនៃវិស័យមូលបត្រកម្ពុជា ដែលជាវិស័យថ្មីមួយក្នុងវិស័យហិរញ្ញវត្ថុកម្ពុជា ។ ក្នុងពេលបច្ចុប្បន្ននេះ ការជួញដូរឧបករណ៍និស្សន្ទ ត្រូវបានមើលឃើញថាចាប់ផ្ដើមកក្រើកបន្តិចម្ដងៗ បន្ទាប់ពីរាជរដ្ឋាភិបាលបានផ្ដល់អាជ្ញាប័ណ្ណបន្តបន្ទាប់ទៅក្រុមហ៊ុនធ្វើអាជីវកម្មក្នុងវិស័យថ្មីមួយនេះ ។
បើតាមលោក George Black ប្រធានប្រឹក្សាហិរញ្ញវត្ថុ នៃក្រុមហ៊ុនជួញដូរឧបករណ៍និស្សន្ទមួយនៅកម្ពុជាបានអោយដឹងថា ទីផ្សារមួយនេះនាពេលបច្ចុប្បន្នហាក់មានការរីកចម្រើនយ៉ាងឆាប់រហ័ស នៅប្រទេសកម្ពុជា ដោយមានក្រុមហ៊ុនផ្ដល់នូវឧបករណ៍និងសេវាកម្មប្រកបដោយវិជ្ជាជីវៈសម្រាប់វិនិយោគិនកម្ពុជា និងបាននាំអ្នកវិនិយោគចូលរួមជាមួយទីផ្សារអន្តរជាតិ ដើម្បីទាញយការវិនិយោគពីបរទេសផងដែរ ។
លោក George Black បានបន្តថា «តាមពិតទៅ វិស័យនេះវាបើកទូលាយសម្រាប់សាធារណជនក្នុងការវិនិយោគ មិនប្រកាន់មុខរបរការងារឡើយ មិនថាគ្រូពេទ្យ គ្រូបង្រៀន និស្សិត អាជីវករ ឬអ្នកជំនួញឡើយ » ។ លោកបន្តថា នៅក្នុងការធ្វើអាជីវកម្មបែបនេះ គឺត្រូវមានការសហការគ្នាដើម្បីអោយមានការរីកចម្រើនកាន់តែខ្លាំង ជាក់ស្ដែងក្រុមហ៊ុនដែលលោកកំពុងបម្រើការ គឺបានធ្វើការសហការជាមួយក្រុមហ៊ុនឈ្មួញជើងសារដទៃទៀតដែលមានអាជ្ញាប័ណ្ណ ដោយប្រើយុទ្ធសាស្ត្របែបទីផ្សារផ្សេងគ្នា តែផ្ដោតទៅលើការអប់រំបណ្ដុះបណ្ដាលអតិថិជន ដើម្បីអោយវិនិយោគិនមានមូលដ្ឋានគ្រឹះរឹងមាំ ក្នុងការវិនិយោគ ឈានទៅរកភាពជោគជ័យ ។
អ្នកជំនាញរូបនេះបានបន្ថែមថា ទីផ្សារឧបករណ៍និស្សន្ទ នៅក្នុងប្រទេសកម្ពុជា គឺមានការបើកទូលាយ ដែលផ្ដល់ឱកាសដល់វិនិយោគិនដើម្បីធ្វើការវិនិយោគ ។ បច្ចុប្បន្នកម្ពុជាក្នុងវិស័យនេះ មានច្បាប់ មានបទបញ្ញតិ្តដើម្បីការពារនូវផលប្រយោជន៍ របស់វិនិយោគិន ។ អ្វីដែលគួរអោយកត់សម្គាល់នោះ គឺមានប្រព័ន្ធធនាគារ ការពារដើមទុនរបស់វិនិយោគិនដែលបានបណ្ដាក់ទុនជាមួយក្រុមហ៊ុនដែលទទួលបានអាជ្ញាប័ណ្ណធ្វើអាជីវកម្មនេះ ហើយមិនតែប៉ុណ្ណោះ ក្រុមហ៊ុនក៏មានអ្នកជំនាញ ក្នុងការប្រឹក្សាយោបល់ដូចជាក្រុមហ៊ុន Goldwell Capital ដែលលោកកំពុងធ្វើការនេះជាដើម ។
លោក George Black បានបន្ថែមទៀតថា កត្តាសំខាន់ដែលនឹងជំរុញអោយវិនិយោគិនអាចទទួលបានជោគជ័យក្នុងអាជីវកម្មជួញដូរ ឧបករណ៍និស្សន្ទ គឺបទពិសោធន៍ និងចំណេះដឹង ដែលបានមកពីបទពិសោធន៍ផងដែរ ។ អ្នកជំនាញក៏អាចជួយប្រឹក្សាយោបល់ដល់វិនិយោគិនថ្មីៗ ក្នុងវិស័យបានផងដែរ តែសំខាន់គឺអ្នកវិនិយោគត្រូវជ្រើសរើសយកអ្នកជំនាញណាដែលមានបទពិសោធន៍ល្អៗ ក្នុងវិស័យនេះជាច្រើនឆ្នាំ ដើម្បីសហការជាមួយ ។
លោកស៊ូ សុជាតិ អគ្គនាយកគណៈកម្មការមូលបត្រកម្ពុជា បានលើកឡើងកន្លងមកថា វិស័យមូលបត្រក្នុងប្រទេសចាប់ផ្ដើមមានសកម្មភាពកាន់តែខ្លាំង ជាពិសេសក្នុងឆ្នាំ ២០១៩កន្លងទៅនេះ អាចនិយាយបានជាឆ្នាំសករាជ្យនៃវិស័យមូលបត្រ ។ គណៈកម្មការមូលបត្រកម្ពុជាបានផ្ដល់អាជ្ញាប័ណ្ណដល់ក្រុមហ៊ុនធ្វើអាជីវកម្មក្នុងវិស័យនេះ ជាបន្តបន្ទាប់ ហើយក៏កំពុងពិនិត្យដែលអាចផ្ដល់ជូនបន្តបន្ទាប់ទៀត នៅក្នុងឆ្នាំនេះនិងឆ្នាំបន្តបន្ទាប់ ។
បើតាមលោកស៊ូ សុជាតិ ទោះបីជាកំណើននៃអាជីវកម្មនេះ ក្នុងប្រទេសកម្ពុជាទទួលបានក្នុងកម្រិតនេះ តែបើប្រៀបធៀបនឹងប្រទេសជិតខាងគឺយើងនៅមានកម្រិតនៅឡើយ ដោយសារតែវិស័យនេះ ជាវិស័យថ្មី នៅក្នុងប្រទេសកម្ពុជា ដែលត្រូវការពេលវេលាបន្ថែមទៀត ដើម្បីអភិវឌ្ឍន៍ទីផ្សារនេះ តែយើងបានប៉ុណ្ណេះ ក៏ចាត់ទុកថា វាជាការល្អប្រសើរមួយដែរ ។
សូមបញ្ជាក់ថា ការជួញដូរឧបករណ៍និស្សន្ទ ឬដេរីវ៉េទីវ សំដៅទៅការជួញដូរលើកិច្ចសន្យាលើគម្លាតថ្លៃនៃឧបករណ៍ហិរញ្ញវត្ថុដើម ដែលចេញពីមូលបត្រសន្ទស្សន៍លោហៈធាតុមានតម្លៃរូបិយប័ណ្ណអន្តរជាតិ និងប្រេងឆៅជាដើមការជួញដូរឧបករណ៍និស្សន្ទនេះ មានការពេញនិយមយ៉ាងខ្លាំងនៅបណ្ដាប្រទេសរីកចម្រើន ដូចជាចក្រភពអង់គ្លេស និងប្រទេសសិង្ហបុរីជាដើម ហើយកំពុងតែទទួលបានប្រជាប្រិយភាពកាន់តែច្រើនឡើងនៅប្រទេសកម្ពុជាយើង។ វិនិយោគិនមិនចាំបាច់មានដើមទុនធំពេកទេ ដើម្បីអាចបណ្ដាក់ទុនវិនិយោគបាននោះ។
បម្រែបម្រួលនៃទីផ្សារឧបករណ៍និស្សន្ទ មានទំនាក់ទំនងនឹងកត្តាសេដ្ឋកិច្ច កត្តាភូមិសាស្ត្រនយោបាយ និងកត្តាបច្ចេកទេសផងដែរ។ ដូច្នេះ វិនិយោគិនមានឱកាសច្រើនក្នុងការក្ដាប់បម្រែបម្រួលនៃទីផ្សារ និងបង្កើនប្រាក់ចំណេញ តែហាក់មិនទាន់មានសកម្មភាពផុសផុលខ្លាំងដូចប្រទេសជិតខាងនៅឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ