ខេត្តសៀមរាប ៖ សមត្ថកិច្ចចម្រុះបានធ្វើការបង្ក្រាបគោយន្តដឹកឈើល្មើសច្បាប់មួយគ្រឿងនៅវេលាម៉ោង៩ព្រឹកថ្ងៃទី២៤ ខែកុម្ភៈ ឆ្នាំ២០២០នេះ ខណៈកំពុងដឹកឈើចូលទម្លាក់ក្នុងដេប៉ូឈើមួយកន្លែងស្ថិតក្នុងភូមិគោកចាន់ ឃុំអំពិល ស្រុកប្រាសាទបាគង ខេត្តសៀមរាប។ លោកវរសេនីយ៍ទោ…
ខេត្តសៀមរាប ៖ សមត្ថកិច្ចចម្រុះបានធ្វើការបង្ក្រាបគោយន្តដឹកឈើល្មើសច្បាប់មួយគ្រឿងនៅវេលាម៉ោង៩ព្រឹកថ្ងៃទី២៤ ខែកុម្ភៈ ឆ្នាំ២០២០នេះ ខណៈកំពុងដឹកឈើចូលទម្លាក់ក្នុងដេប៉ូឈើមួយកន្លែងស្ថិតក្នុងភូមិគោកចាន់ ឃុំអំពិល ស្រុកប្រាសាទបាគង ខេត្តសៀមរាប។
លោកវរសេនីយ៍ទោ ម៉េង សំណាង នាយរងការិយាល័យ ប្រឆាំងបទល្មើសសេដ្ឋកិច្ចនៃស្នងការដ្ឋានខេត្តសៀមរាប បានឲ្យដឹងថា ប្រតិបត្តិការនេះដឹកនាំដោយលោកផ្ទាល់ក្រោមការបញ្ជារពីលោកប្រធានការិយាល័យ ប្រឆាំងបទល្មើសសេដ្ឋកិច្ច ខេត្តសៀមរាប និងលោកឧត្តមសេនីយ៍ត្រី ម៉ក់ ធារ៉ា ស្នងការរងទទួលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋានខេត្តសៀមរាបដោយមានការសហការជាមួយកម្លាំងផ្នែករដ្ឋបាលព្រៃឈើបន្ទាយស្រី។
លោកវរសេនីយ៍ទោ ម៉េង សំណាង បានបន្តថា ម្ចាស់ឈើឈ្មោះ គាំ លន ភេទ ប្រុស អាយុ៣១ឆ្នាំ រស់នៅឃុំចាន់ស ស្រុកសូទ្រនិគម បានដឹកឈើចេញពីភូមិសាស្ត្រឃុំខ្វាវ ស្រុកជីក្រែង យកមកលក់ឲ្យដេប៉ូដែលមានម្ចាស់ឈ្មោះ តង ហ៊ីង ភេទប្រុស អាយុ៣១ឆ្នាំ រស់នៅភូមិគោកចាន់ ឃុំអំពិល ស្រុកប្រាសាទបាគង ខេត្តសៀមរាប ។ ឈើដែលសមត្ថកិច្ចចាប់បាននោះមានចំនួន៤,៩ម៉ែត្រគូប ជាឈើផ្លុង ប្រភេទលេខ៣ ។ លោកបញ្ជាក់ថា ឈើទាំងនេះដឹកមកលក់នៅក្នុងដេប៉ូខាងលើ គឺគ្មានច្បាប់ទម្លាប់ត្រឹមត្រូវនោះទេ។
លោកវរសេនីយ៍ទោ ម៉េង សំណាង បញ្ជាក់ទៀតថា ឈើដែលសមត្ថកិច្ចចាប់បានទាំងអស់នេះ ប្រគល់ឲ្យផ្នែករដ្ឋបាលព្រៃឈើបន្ទាយស្រី ស្ថិតនៅភូមិព្រះដាក់ឃុំព្រះដាក់ ស្រុកបន្ទាយស្រី ដើម្បីរក្សាទុករង់ចាំដោះស្រាយតាមផ្លូវច្បាប់។ លោកបញ្ជាក់បន្ថែមថា ដោយទទួលបានការណែនាំពីថ្នាក់លើ ហេតុនេះកម្លាំងនគរបាលប្រឆាំងបទល្មើសសេដ្ឋកិច្ចខេត្ត សៀមរាបនឹងបន្តតាមដាននិងឈានដល់ការបង្ក្រាបជាបន្តបន្ទាប់ទៀត ៕ (កែសម្រួលដោយ ៖ ធីតា)
ចែករំលែកព័តមាននេះ