ខេត្តសៀមរាប ៖ នាពេលថ្មីៗកន្លងមកប្រជាពលរដ្ឋនៅស្រុកស្វាយជាង៣០០គ្រួសារ បានសម្តែងការមិនពេញចិត្តចំពោះសហគមន៏ទឹករបស់ឃុំស្វាយលើ ដែលបានបង្កើតឡើងតាំងពីឆ្នាំ២០០៣មកម្ល៉េះ ដើម្បីផ្គត់ផ្គង់ទឹកជូនដល់បងប្អូនប្រជាពលរដ្ឋរស់នៅក្នុងឃុំប្រើប្រាស់ កាលនោះសម្រាប់ការប្រើប្រាស់ទឹកពុំទាន់បានគិតប្រាក់ និងគិតម៉ែត្រគូបអ្វីពីប្រជាពលរដ្ឋឡើយ ប៉ុន្តែក្រោយមកក៏លែងដំណើរការទៅវិញ។
ទើបនៅដើមឆ្នាំ២០២០នេះ ក្រុមការងារសហគមន៏ឃុំស្វាយលើបានចាប់ផ្តើមធ្វើការរៀបចំគម្រោងថវិកាបដិភាគពីបងប្អូនប្រជាពលរដ្ឋក្នុងន័យជួយផ្គត់ផ្គង់ទឹក នឹងរៀបចំប្រព័ន្ធទុយោទឹកពីលើភ្នំគូលែនត្រង់ចំណុចភូមិតាពេញតចុះមកក្រោមដើម្បីចែកចាយទឹកប្រើប្រាស់ទៅតាមភូមិនានា នៅក្នុងឃុំស្វាយលើ ស្រុកស្វាយលើ ខេត្តសៀមរាប ក្នុងនោះមានភូមិចំនួន៤ គឺភូមិបិតផ្កា ភូមិជប់លើ ភូមិជប់ក្រោម និងភូមិត្រពាំងខ្នា ប្រជាពលរដ្ឋបានប្រើប្រាស់ប្រព័ន្ធទឹកនេះប្រមាណជាង៣០០គ្រូសារឯណោះ ដោយក្នុង១គ្រួសារៗខាងសហគមន៏ទឹកឃុំស្វាយលើ តម្រូវឲ្យបង់ថវិកាបដិភាគប្រមាណជាង១០ម៉ឺនរៀលដំបូង ដើម្បីយកថវិកាទាំងនេះទៅរៀបចំប្រព័ន្ធទុយោចូលតាមផ្ទះ និងដាក់កុងទ័រទឹកងាយស្រួលក្នុងការគិតប្រាក់បន្តទៀត បើប្រជាពលរដ្ឋប្រើទឹកអស់១ម៉ែត្រគូបទឹក តម្លៃ១.០០០រៀល ក្នុង១គ្រួសារៗ ភាគ ច្រើនប្រើអស់ចាប់ពី៥ម៉ែត្រគូបឡើងទៅ។ នេះបើតាមប្រភពពីប្រជាពលរដ្ឋបានឲ្យដឹងកាលពីព្រឹកថ្ងៃទី២៤ខែកុម្ភ: ឆ្នាំ២០២០ ស្ថិតនៅក្នុងភូមិ ឃុំ ខាងលើ។
ចំណែកអ្នកស្រី ទុយ លឿ រស់នៅភូមិត្រពាំងខ្នា បានលើកឡើងថា សព្វថ្ងៃពួកគាត់បានប្រើប្រាស់ទឹករបស់សហគមន៍ឃុំស្វាយលើ ប៉ុន្តែការប្រើប្រាស់ទឹកនោះមិនគ្រប់គ្រាន់ឡើយហើយនៅពេលដែលបើកទឹកប្រើគឺវិលតែកុងទ័រប៉ុណ្ណោះ ចំណែកទឹកហូរចេញមកពីក្នុងទុយោតិចណាស់ប្រើប្រាស់ទឹកនោះមិនគ្រប់គ្រាន់នោះទេ ដាច់ខែគិតលុយអស់ពី៥-៦ ម៉ែត្រគូប ក្នុង១ម៉ែត្រគូបទឹកតម្លែ១០០០រៀលជារៀងរាល់ខែ។ អ្នកស្រីបានសំណូមពរដល់អាជ្ញាធរពាក់ព័ន្ធមេត្តាជួយរកដំណោះស្រាយ នឹងចុះត្រួតពិនិត្យមើលឲ្យបានត្រឹមត្រូវផង ពីព្រោះខាងសហគមន៏នេះបានដាក់ទុយោទឹក និងកុងទ័រវាស់ទឹក តែអត់មានទឹកប្រើប្រាស់គ្រប់គ្រាន់នារដូវប្រាំង ពួកគាត់មានភាពលំបាកយ៉ាងខ្លាំងជាមួយនឹងការកង្វះខាតទឹកប្រើប្រចាំថ្ងៃនេះ។
រីឯលោក យ៉ែម សាវុន ជំទប់ទី២ឃុំស្វាយលើ បានឱ្យដឹងថា បច្ចុប្បន្នយើងមានសហគមន៍ ទឹកឃុំស្វាយលើមួយដោយចងក្រងជាក្រុមមានបងប្អូនប្រជាពលរដ្ឋប្រមាណជាង៣០០គ្រួសារនៅក្នុងឃុំស្វាយលើ ស្រុកស្វាយលើ ខេត្តសៀមរាប ក្នុងនោះមានភូមិចំនួន៤ គឺភូមិបិតផ្កា ភូមិជប់លើ ភូមិជប់ក្រោម និងភូមិត្រពាំងខ្នា ប្រជាពលរដ្ឋបានប្រើប្រាស់ប្រព័ន្ធទឹកនេះប្រមាណជាង៣០០គ្រូសារដែរ។
ឥឡូវនេះ ចំពោះសហគមន៏ទឹកឃុំស្វាយ យើងបានរៀបចំឲ្យមានប្រព័ន្ធទឹក អាងស្តុកទឹកដើម្បីចម្រោះយកទឹកស្អាតសម្រាប់ទុកឲ្យប្រជាពលរដ្ឋប្រើប្រាស់នារដូវប្រាំងនៅតាមមូលដ្ឋានរបស់ពួកគាត់ ដែលអាចផ្គត់ផ្គង់ទឹកសម្រាប់ប្រើប្រាស់ប្រចាំថ្ងៃចំនួន៤ភូមិក្នុងឃុំស្វាយលើ ។ ក្រោយពីទុយោទឹកចាស់ៗបានបាក់បែកខ្លះៗ មកទើបនៅឆ្នាំ២០២០នេះខាងសហគមន៏ឃុំស្វាយលើបានរៀបចំសាជាថ្មី ដើម្បីឲ្យប្រជាពលរដ្ឋបានប្រើប្រាស់ទឹកទៅតាមតម្រូវការតាមមូលដ្ឋាន តែយើងមិនទាន់បានរៀបចំឲ្យស្រួលមូលនៅឡើយទេ ដោយសារខ្វះថវិកាកន្លងមកគឺខាងសហគមន៏ទឹកបានទទួលថវិកាបដិភាគពីប្រជាពលរដ្ឋដើម្បីរៀបចំឲ្យប្រព័ន្ធទឹកបានដំណើរការក្នុងការប្រើប្រាស់ឲ្យបានល្អប្រសើរថែមទៀត។
លោក អៀង ពិសិទ្ធ អភិបាលស្រុកស្វាយលើ បានមានប្រសាសន៍ថា ចំពោះសហគមន៍ទឹកនៅក្នុងឃុំស្វាយលើនេះ គឺមិនទាន់មានច្បាប់មកដល់ស្រុកនៅឡើយទេ គឺមានត្រឹមតែឃុំប៉ុណ្ណោះ ។ ពាក់ព័ន្ធបញ្ហាទឹកដែលសហគមន៏បានរៀបចំកន្លងមកឃើញថា ពុំទាន់មានភាពរលូនទេជាមួយការប្រើប្រាស់ទឹកប្រចាំថ្ងៃរបស់បងប្អូនប្រជាពលរដ្ឋតាំងពីមានទឹកដែលបង្ហូរចូលអាងស្តុបទឹកចម្រោះទឹកថ្មី ដែលសាងសង់ដោយព្រះសង្ឃពុទ្ធបរិស័ទ និងសហគមន៍ទឹកនៅក្នុងឃុំស្វាយលើ ធ្វើឱ្យមានបញ្ហាប្រឈមជាច្រើនជាមួយប្រជាពលរដ្ឋ។
លោកអភិបាលស្រុកស្វាយលីបានបន្តថា កាលពីមុនមានក្រុមហ៊ុនឯកជនមួយបានមកវិនិយោគទៅលើគម្រោងផ្គត់ផ្គង់ទឹកស្អាតសម្រាប់ការប្រើប្រាស់ទឹកទៅដល់ប្រជាពលរដ្ឋចំនួន២ឃុំ គឹឃុំស្វាយលើ និង ឃុំតាសៀម តែនៅពេលដែលក្រុមហ៊ុនចាប់ផ្តើមដំណើរការ ក៏ស្រាប់តែបងប្អូនប្រជាពលរដ្ឋមូយចំនួនបានមកតវ៉ាមិនឲ្យក្រុមហ៊ុនឯកជនធ្វើបន្តទៀតទេ ដោយសារពួកគាត់គិតថា បើសិនក្រុមហ៊ុនធ្វើវាអាចមានផលប៉ះពាល់ដល់ពួកគាត់ដែលធ្លាប់ប្រើប្រាស់ប្រព័ន្ធទឹកខាងលើភ្នំយូរណាស់មកហើយនោះ។
លោកអភិបាលស្រុកស្វាយលើបានបញ្ជាក់ថា អាជ្ញាធរស្រុកនឹងអញ្ជើញសហគមន៏ទឹកនៅក្នុងឃុំស្វាយលើ និងអ្នកពាក់ព័ន្ធមកប្រជុំជាបន្ទាន់ ដើម្បីរកដំណោះស្រាយណា មួយពាក់ព័ន្ធជាមួយប្រជាពលរដ្ឋក្នុងការប្រើប្រាស់ទឹក និងការបង់វិភាគទានទាំងនោះទៅឲ្យសហគមន៍ទឹកជារៀងរាល់ខែផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ