តាមប្រភពព័ត៌មាន Channel News Asia បានឱ្យដឹងថា រដ្ឋមន្ត្រីឥណ្ឌូនេស៊ីកាលពីថ្ងៃពុធ (១៩ កុម្ភៈ) បានស្នើសុំអោយអ្នកមានរៀបការជាមួយអ្នកក្រ ដើម្បីជាមធ្យោបាយមួយក្នុងការកាត់បន្ថយអត្រាភាពក្រីក្ររបស់ប្រទេស។…
តាមប្រភពព័ត៌មាន Channel News Asia បានឱ្យដឹងថា រដ្ឋមន្ត្រីឥណ្ឌូនេស៊ីកាលពីថ្ងៃពុធ (១៩ កុម្ភៈ) បានស្នើសុំអោយអ្នកមានរៀបការជាមួយអ្នកក្រ ដើម្បីជាមធ្យោបាយមួយក្នុងការកាត់បន្ថយអត្រាភាពក្រីក្ររបស់ប្រទេស។
តើមានអ្វីកើតឡើងប្រសិនបើ ប្រជាជនក្រីក្រកំពុងស្វែងរកអ្នកក្រផ្សេងទៀត (សម្រាប់អាពាហ៍ពិពាហ៍)? លោក Muhadjir Effendy រដ្ឋមន្ត្រីក្រសួងអភិវឌ្ឍន៍មនុស្សនិងវប្បធម៍ បានមានប្រសាសន៍ថា៖ «តើនឹងមានអ្វីកើតឡើង ប្រសិនបើអ្នកក្ររកមើលតែអ្នកក្រដូចគ្នាដើម្បីរៀបការ? ចំនួនអ្នកក្រនឹងកាន់តែកើនឡើងលើសដើម។ នេះជាបញ្ហានៅឥណ្ឌូណេស៊ី។»
លោករដ្ឋមន្ត្រីបានមានប្រសាសន៍ថា មានគ្រួសារក្រីក្រប្រហែល ៥លានគ្រួសារនៅក្នុងប្រទេសឥណ្ឌូនេស៊ីដែលមានចំនួន ៩.៤% នៃគ្រួសារសរុបចំនួន ៥៧.១លាននាក់។
លោក Effendy បានស្នើទៅរដ្ឋមន្ត្រីក្រសួងកិច្ចការសាសនា លោក Fachrul Razi ឱ្យចេញច្បាប់ដោយបញ្ជាឱ្យប្រជាជនក្រីក្រស្វែងរកអ្នកមាន ដើម្បីរៀបការ ស្របពេលដែលអ្នកមានក៏ត្រូវតែរកអ្នកក្រដើម្បីរៀបការដែរ។ ក្រៅពីនេះលោកក៏បានស្នើសុំកម្មវិធីជំនួយថវិកាមុនរៀបការសម្រាប់គូស្វាមីភរិយា ដែលមិនមានស្ថេរភាពផ្នែកសេដ្ឋកិច្ច ប៉ុន្តែមានបំណងចង់រៀបការ ក្នុងគោលបំណងជួយរកការងារឱ្យពួកគេធ្វើក្រោយពេលរៀបការ។ កម្មវិធីនេះ ផ្តល់ការបណ្តុះបណ្តាលជំនាញដល់អ្នកចូលរួម ដែលចង់រកការងារធ្វើក្រោយពេលរៀបការជាមួយគ្នាហើយ។
លោក Effendy មានប្រសាសន៍ថា កម្មវិធីមុនរៀបការបែបនេះនឹងជួយជំរុញអត្រាគ្រួសារក្រីក្រនៅក្នុងប្រទេសឥណ្ឌូនេស៊ីមានការថយចុះ។ យោងតាមកាសែត Jakarta Post ធនាគារពិភពលោកបានរាយការណ៍នាពេលថ្មីៗនេះថាប្រជាជនឥណ្ឌូនេស៊ី ៤៥% ឬ ឥណ្ឌូណេស៊ីប្រហែលជា ១១៥លាននាក់មិនទាន់ទទួលបាននូវសន្តិសុខសេដ្ឋកិច្ចនិងរបៀបរស់គ្រាន់បើនៅឡើយទេ។
ទោះជាយ៉ាងនេះក្តីឥណ្ឌូនេស៊ីបានចាត់ការយ៉ាងមានប្រសិទ្ធភាពក្នុងការកាត់បន្ថយភាពក្រីក្រក្នុងរយៈពេល ១៥ឆ្នាំកន្លងមកនេះ ដែលបានជំរុញឱ្យប្រទេសនេះមានអត្រាភាពក្រីក្រតិចជា ១០%។ វណ្ណៈកណ្តាលក៏បានកើនឡើងពី ៧% មកដល់ ២០% ក្នុងពេលនេះ ៕
ចែករំលែកព័តមាននេះ