ខេត្តស្វាយរៀង ៖ ភ្ញៀវទេសចរបរទេសមកពីប្រទេសបែកអឺរ៉ុបបានឆ្លងកាត់ប្រទេសវៀតណាមចូលមកព្រះរាជាណាចក្រកម្ពុជាតាមច្រកទ្វារព្រំដែនអន្តរជាតិបាវិត ក្នុងក្រុងបាវិត ហាក់បីដូចមានជំនឿទុកចិត្តមកលើរាជរដ្ឋាភិបាលកម្ពុជា ដោយមិនមានការភ័យខ្លាចឆ្លងនូវវីរុសកូរ៉ូណាឬកូវីដ១៩នោះទេ គឺភ្ញៀវទាំងអស់ជឿជាក់ថាកម្ពុជាគ្មានវីរុសកូរ៉ូណាទេ ដូច្នេះពួកគេក៏មិនចាំបាច់ពាក់ម៉ាស់ដែរ។
ទាក់ទិននឹងករណីខាងលើនេះដែរ លោកវេជ្ជបណ្ឌិត អុឹម បុត្រ ប្រធានក្រុមការងារចត្តាឡីសក័ប្រចាំនៅច្រកទ្វាព្រំដែនអន្តរជាតិបាវិតបានឲ្យដឹងថា ចាប់តាំងពីអន្តរជាតិមានផ្ទុះជំងឺរលាកផ្លូវដង្ហើមប្រភេទថ្មីបង្កឡើងដោយវីរុសកូរ៉ូណា ឬកូវីដ១៩មក នៅច្រកទ្វារព្រំដែនអន្តរជាតិបាវិត ក្នុងក្រុងបាវិត គឺមានភ្ញៀវជាតិនិងអន្តរជាតិគ្រប់ជាតិសាសន៍បានចេញចូលធម្មតា ហើយមន្ត្រីចត្តាឡីសក័បានដាក់ម៉ាស៊ីនស្គែនពិនិត្យរកមេរោគរលាកផ្លូវដង្ហើមប្រភេទថ្មី (កូរ៉ូណាវីរុស) ពុំទាន់ឃើញមានការសង្ស័យទៅលើភ្ញៀវទេសចរណាម្នាក់នៅឡើយទេ រហូតមកដល់ថ្ងៃទី១៨ កុម្ភៈ ឆ្នាំ២០២០នេះ។
លោកវេជ្ជបណ្ឌិតបានបន្តទៀតថា នៅច្រកទ្វារព្រំដែនអន្តរជាតិបាវិតនេះយើងបែងចែកការត្រួតពិនិត្យជាពីកន្លែងគឺឲ្យភ្ញៀវចូលតាមច្រកបញ្ជរដែលមានដាក់ម៉ាស៊ីនស្គែននិងអ្នកដើរ ឬភ្ញៀវដែលជិះម៉ូតូ យើងមានមន្ត្រីចត្តាឡីស័កត្រួតពិនិត្យតាមម៉ាស៊ីនស្ទង់កំដៅ ធ្វើយ៉ាងណាត្រួតពិនិត្យឲ្យបានគ្រប់ភ្ញៀវ ដើម្បីទប់ស្កាត់និងការពារឲ្យមានប្រសិទ្ធិភាពខ្ពស់។ ចំណែកភ្ញៀវទេសចរបរទេសមកពីប្រទេសអឺរ៉ុបភាគច្រើនគឺពួកគាត់មានជំនឿមកលើរាជរដ្ឋាភិបាលកម្ពុជា អំពីការត្រួតពិនិត្យ និងការពារការឆ្លងនូវជំងឺរលាកផ្លូវដង្ហើមប្រភេទថ្មី(កូរ៉ូណាវីរុស)នៅកម្ពុជា គឺគ្មានវីរុសកូរ៉ូណាទេ ទើបពួកគាត់មិនមានពាក់ម៉ាស់ ៕ (កែសម្រួលដោយ ៖ ធីតា)
ចែករំលែកព័តមាននេះ