តុលាការឧក្រិដ្ឋកម្មថៃ កាលពីថ្ងៃទី២៨ ធ្នូ បានសំរេចមិនលុបចោលវិញនូវការឱ្យនៅក្រៅឃុំ ដោយការបង់ប្រាក់ធានាសំរាប់លោកចាទុផន ព្រំផាន់ ជាមេដឹកនាំក្រុមអាវក្រហមសំខាន់មួយរូប និងជាសមាជិកសភាគណបក្សភឿថៃ ប៉ុន្តែតុលាការនោះបានដាក់លក្ខខណ្ឌហាមលោកចាទុផន មិនឱ្យចូលរួមក្នុងការប្រមូលផ្តុំ និងធ្វើសកម្មភាពផ្នែកនយោបាយរយៈពេល៥ឆ្នាំ ។
កាលពីថ្ងៃទី២៧ ធ្នូ កន្លងមក លោក Tharit Pengdit អគ្គនាយកនាយកដ្ឋានស៊ើបការណ៍ពិសេស (DSI) បានទទូចសុំឱ្យលុបចោលការអនុញ្ញាតឱ្យនៅក្រៅឃុំ ដោយការបង់ប្រាក់ធានាសំរាប់លោកចាទុផន ដោយផ្អែកលើមូលដ្ឋានដែលលោកត្រូវចោទប្រកាន់ពីបទផ្សព្វផ្សាយព័ត៌មានមិនពិតក្នុងគោលបំណងឱ្យជះឥទ្ធិពលលើការធ្វើអង្កេតការណ៍ចោទប្រកាន់លោកពីបទភេរវកម្មពាក់ព័ន្ធជាមួយនឹងការធ្វើបាតុកម្មប្រឆាំងរដ្ឋាភិបាល លោកអាប់ភីស៊ីត ដោយក្រុមបាតុករអាវក្រហមកាលពីខែមេសា និងខែឧសភា កន្លងមក។ លោក Tharit អះអាងថា លោកចាទុផន ដែលត្រូវបានចោទប្រកាន់ពីបទភេរវកម្ម និងពីបទញុះញុងឱ្យមានភាពចលាចលបានរំលោភបំពានលក្ខខណ្ឌសំរាប់ការដោះលែងលោកបណ្តោះអាសន្ន ។ DSI បានចាត់វិធានការប្រឆាំងលោកចាទុផន ក្រោយពីលោកបានអះអាងថា រូបលោកបានទទួលលទ្ធផលពីការស៊ើបអង្កេតដែលបង្ហាញថា កងទាហានជាអ្នកទទួលខុសត្រូវចំពោះការស្លាប់បាតុករអាវក្រហម និងបុគ្គលិកជួយសង្គ្រោះនៅវត្ត Pathum Wana- ram កាលពីខែឧសភា កន្លងមក៕
ចែករំលែកព័តមាននេះ