ខេត្តកំពង់ស្ពឺ ៖ ជនសង្ស័យជាចោរប្លន់ម្នាក់ត្រូវនគរបាលព្រហ្មទណ្ឌក្រសួងមហាផ្ទៃសហការជាមួយនគរបាលខេត្តកំពង់ស្ពឺឃាត់ខ្លួនតាមដីកាបង្គាប់លេខ១៧៥៧ ដបច/14 ចុះថ្ងៃទី១៤ សីហា ២០១៤ ដោយព្រះរាជអាជ្ញាអមសាលាដំបូងខេត្តកំពង់ស្ពឺ លោកកែវ សុធា ។
ជនសង្ស័យត្រូវបានឃាត់ខ្លួនកាលពីវេលាម៉ោង៩ព្រឹក ថ្ងៃទី១៨ សីហា ២០១៤ នៅផ្ទះជួលរបស់ជនសង្ស័យស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែន។
ជនសង្ស័យដែលនគរបាលឃាត់ខ្លួនឈ្មោះកឿង ពូនាង អាយុ៣០ឆ្នាំ មុខរបរមិនពិតប្រាកដ រស់នៅភូមិព្រៃក្តី ឃុំកាហែង ស្រុកសំរោងទង ។
គួរបញ្ជាក់ថា កាលពីថ្ងៃទី៣០ មករា ២០១៤ នគរបាលខេត្តកំពង់ស្ពឺបានចុះបង្ក្រាបឃាត់ខ្លួនបានជនសង្ស័យ២នាក់ដែលជាប់ពាក់ព័ន្ធករណីប្លន់ប្រដាប់អាវុធ និងទទួលផលចោរកម្មដោយដកហូតបានរថយន្ត២គ្រឿង និងម៉ូតូ៧គ្រឿងកសាងសំណុំរឿងបញ្ជូនទៅតុលាការ ចំណែកបក្សពួកជាច្រើននាក់ទៀតបានរត់គេចខ្លួនអស់។
រហូតដល់ព្រឹកថ្ងៃទី១៨ សីហា ២០១៤ កម្លាំងជំនាញនគរបាលខេត្តកំពង់ស្ពឺសហការជាមួយនគរបាលព្រហ្មទណ្ឌក្រសួងមហាផ្ទៃឃាត់ខ្លួនបានជនសង្ស័យខាងលើម្នាក់ទៀត ចំណែកក្រុមជនសង្ស័យដែលកំពុងគេចខ្លួន នគរបាលកំពុងធ្វើការស្រាវជ្រាវស្វែងរកចាប់ខ្លួនបន្តទៀត៕
ចែករំលែកព័តមាននេះ