រាជធានីភ្នំពេញ ៖ ថ្លែងក្នុងពិធីប្រកាសឲ្យដំណើរការរចនាសម្ព័ន្ធថ្មីនៃរដ្ឋបាលខណ្ឌដូនពេញ នាព្រឹកថ្ងៃទី១២ ខែកុម្ភៈ លោក ឃួង ស្រេង អភិបាលរាជធានីភ្នំពេញ បានណែនាំដល់អភិបាលខណ្ឌទាំងអស់ ឲ្យជួយជំរុញប្រជាពលរដ្ឋបង់ថ្លៃប្រមូលសំរាមឲ្យបានទៀងទាត់ ដើម្បីបំពេញកាតព្វកិច្ចជាពលរដ្ឋល្អ ក្នុងការចូលរួម ធានាធ្វើឲ្យរាជធានីភ្នំពេញនៅតែរក្សាបានភាពស្អាតមានផាសុកភាព និងគុណភាពបរិស្ថាន ។
លោកអភិបាលរាជធានីភ្នំពេញបន្តថា ក្នុងរយៈពេល៨ខែទៀត ការរៀបចំនីតិវិធីក្នុងការគ្រប់គ្រងបញ្ហាសំរាមនេះបានល្អ ទាំងការប្រមូលសំរាមនិងការបង់ថ្លៃសេវាប្រមូលសំរាម ដោយមានក្រុមហ៊ុនត្រឹមត្រូវច្បាស់លាស់ ក្នុងការអនុវត្តកិច្ចការនេះ ។ សម្រាប់ខណ្ឌដូនពេញ លោក ឃួង ស្រេង បានណែនាំថា ចាំបាច់ណាស់ខណ្ឌដូនពេញគឺត្រូវតែស្អាតឲ្យបានជាប់ជាប្រចាំ ព្រោះខណ្ឌនេះជាចំណុចកណ្តាលនៃរាជធានីភ្នំពេញ សម្បូរទៅដោយតំបន់ទេសចរណ៍ដែលទាក់ទាញភ្ញៀវមកទស្សនាកម្សាន្តជាច្រើន ។
អភិបាលខណ្ឌដូនពេញ ត្រូវចុះពិនិត្យការលក់ដូររបស់ប្រជាពលរដ្ឋនៅលើចិញ្ចើញផ្លូវសាធារណៈ ព្រោះមិនត្រឹមតែខូចសណ្តាប់ធ្នាប់និងរបៀបរៀបរយសាធារណៈប៉ុណ្ណោះទេ ប៉ុន្តែពួកគាត់បានបង្កើតជាសំរាមគររាយប៉ាយដោយគ្មានការទទួលខុសត្រូវក្រោយពីការលក់ដូររួច ។ បន្ថែមពីនេះទៀត ត្រូវសន្យាលុបបំបាត់ឲ្យអស់នូវល្បែងកន្ទុយលេខតាមផ្សារ ល្បែងស្ទូចត្រីខុសច្បាប់ ដែលកំពុងមានសកម្មភាពរីកដុះដាលច្រើន។
សូមបញ្ជាក់ថា រដ្ឋបាលរាជធានីភ្នំពេញបានប្រកាសបើកទទួលយកថ្លៃប្រមូលសំរាមពីប្រជាពលរដ្ឋចាប់ពីថ្ងៃទី១ ខែកុម្ភៈដល់ថ្ងៃទី១៥ ខែកុម្ភៈ តាមរយៈប្រព័ន្ធទូទាត់អេឡិចត្រូនិក ដើម្បីបង្កលក្ខណៈងាយស្រួលដល់ប្រជាពលរដ្ឋបានចំណេញពេលវេលា និងកាត់បន្ថយការចំណាយផងដែរ ។ ប្រជាពលរដ្ឋដែលត្រូវបង់ថ្លៃសេវាប្រមូលសំរាមនៅក្នុងខែមករា គ្មានការប្រែប្រួលទេ គឺអនុវត្តតាមតារាងតម្លៃកាលពីខែតុលា ឆ្នាំ២០១៩កន្លងទៅជាគោល ។
បញ្ហាសំរាមនេះស្ទើរតែនិយាយលែងចេញទៅហើយ ព្រោះនៅកន្លែងណាក៏មានសំរាមដែរដោយសារតែការចោលសំរាមពាសវាលពាសកាល ហើយកន្លែងដេប៉ូសំរាមខ្លះការប្រមូលមិនបានអស់ក៏ដកចោល ។ ជារួម សេវាប្រមូលសំរាមប្រហែលជាបញ្ហាចោទច្រើនជាងការគិតគូរពីការបង់ថ្លៃសេវា ៕
ចែករំលែកព័តមាននេះ