ខេត្តកំពង់ចាម ៖ ស្របពេលដែលប្រទេសចិនបានផ្ទុះឡើងនូវការឆ្លងវីរុសCOVID-19ឬ(កូរ៉ូណា)ថ្មីបណ្ដាលឱ្យមានមនុស្សស្លាប់ និងឆ្លងវីរុសនោះ ស្ថិតនៅតាមផ្សារបឹងកុក ផ្សារធំកំពង់ចាម និងផ្សារសាមគ្គី ក្រុងកំពង់ចាម មិនមានពលរដ្ឋកម្ពុជាណាម្នាក់បានឆ្លងជំងឺឡើយ គិតនៅថ្ងៃទី១៣ កុម្ភៈ ២០២០ នេះ។
អាជីវករលក់បន្លែ ឈ្មោះម៉ាប់ ភេទស្រី អាយុ៣៩ឆ្នាំ នៅផ្សារបឹងកុក បានប្រាប់ឱ្យដឹង នៅព្រឹកថ្ងៃទី១៣កុម្ភៈថា កន្លងមក មានប្រជាពលរដ្ឋផ្អើលពីជំងឺកូរ៉ូណានេះជាច្រើនថ្ងៃមកហើយ ក្នុងនោះ បានឃើញនាំគ្នាពាក់ម៉ាស់ដើរមកចូលផ្សារទិញម្ហូប និងខ្លះទៀតក៏មិនបានពាក់ម៉ាស់ដែរ ។ ក្នុងគ្រាដំបូងគាត់ មានការភិតភ័យពេលអង្គុយលក់ដូរ ក៏ពាក់ម៉ាសដែរ។
គាត់បន្តថា ម្យ៉ាងគាត់មិនសូវចេះពាក់ម៉ាស់បានយូរទេ គឺពាក់តែមួយភ្លែត ត្រូវដោះចេញវិញព្រោះតែហប់ពេក។ ជាក់ស្តែង នៅព្រឹកថ្ងៃទី១៣ កុម្ភៈ អ្នកអង្គុយលក់ដូរនៅក្បែរគាត់ ក៏មិនបានពាក់ម៉ាស់ដែរដោយសារតែអាកាសធាតុរាងក្តៅផងនោះ ។
ផ្ទះរបស់គាត់នៅភូមិឡឥដ្ឋ សង្កាត់បឹងកុក ក្រុងកំពង់ចាម មានកូនប្រុស-ស្រីចំនួន៣នាក់ ពីមុនទៅរៀនដោយមានលោកគ្រូ អ្នកគ្រូ ណែនាំឱ្យពាក់ម៉ាស តែមួយរយៈចុងក្រោយនេះ មិនបានពាក់ម៉ាសនោះទេ។ដោយសារតែម៉ាសលក់នៅតាមឱសថស្ថានគេលក់អស់ ។ គាត់គិតថា នៅកម្ពុជាមានអាកាសធាតុក្តៅបែបណា ក៏នៅតែណែនាំឱ្យកូនៗ ត្រូវប្រុងប្រយ័ត្នការពារធ្វើយ៉ាងណាកុំឲ្យឆ្លងជំងឺកូរ៉ូណានេះ ។
ស្ត្រីចំណាស់ឈ្មោះសួរ ទី អាយុ៦០ឆ្នាំ បានប្រាប់ឲ្យដឹងថា តាំងតែមិនទាន់មានជំងឺកូរ៉ូណាបានផ្ទុះឡើង គឺគាត់តែងតែពាក់ម៉ាស់ជាប់ជាប្រចាំ ដើម្បីបង្ការកុំឲ្យឆ្លងជំងឺផ្តាសាយ ឬក៏ជំងឺផ្សេងៗទៀតពេលដែលដើរក្នុងចំណោមហ្វូងមនុស្សជាច្រើននៅក្នុងផ្សារបឹងកុក ។
កន្លងមក ម៉ាស់ប្រអប់តូចគាត់ទិញតម្លៃ៤.០០០រៀល ក្រោយមកក៏ឡើងថ្លៃ ៨.០០០៛ និងប្រអប់ធំតម្លៃ ៨.០០០៛ ឡើងដល់១៥.០០០៛ មកដល់ព្រឹកថ្ងៃទី១៣ កុម្ភៈ គាត់ដើររកទិញតាមឱសថស្ថាននៅផ្សារបឹងកុក មិនមានលក់នោះទេ។ ជាមួយនោះប្ដីរបស់គាត់ជាវេជ្ជបណ្ឌិតមួយរូប តែងតែប្រាប់ឲ្យសមាជិកក្រុមគ្រួសា រត្រូវចេះអនាម័យឲ្យបានជាប់ជាប្រចាំផងដែរ។
ម្ចាស់ឱសថស្ថាន១រូប នៅជិតផ្សារធំក្រុងកំពង់ចាមប្រាប់ថា ម៉ាសគឺគាត់បានលក់ក្នុងតម្លៃធម្មតាមិនបានឡើងថ្លៃនោះទេ តាំងតែមិនទាន់មានការភ្ញាក់ផ្អើលដែលជំងឺកូរូ៉ណាមកម្ល៉េះ។ លុះពេលក្រោយមកទៀតមានការភ្ញាក់ផ្អើលពីជំងឺនេះ ម៉ាសរបស់គាត់បានលក់រក្សាក្នុងតម្លៃដើម មិនបានឡើងថ្លៃនោះទេ ។ តែប្រជាពលរដ្ឋបាននាំគ្នាមកទិញយកទៅប្រើប្រាស់ស្ទើរតែអស់ ។ ហើយនៅសល់ប៉ុន្មានប្រអប់គាត់បានយកចែកចាយដល់សមាជិកក្រុមគ្រួសារបងប្អូននឹងជូនចាស់ៗសម្រាប់ប្រើប្រាស់ដោយមិនបានយកកម្រៃនោះទេព្រោះគាត់ជាអ្នកដែលចូលចិត្តធ្វើបុណ្យដាក់ទានមួយរូប។
លោកវេជ្ជបណ្ឌិតគីម សួរភិរុណ ប្រធានមន្ទីរសុខាភិបាលខេត្តកំពង់ចាម មានប្រសាសន៍ឲ្យដឹងថា ក្រោយពីបានទទួលការណែនាំពីលោកសាស្ត្រាចារ្យវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោកអ៊ុន ចាន់ដា អភិបាលខេត្ត រូបលោកបានបង្កើនការយកចិត្តទុកដាក់ ដោយបានរៀបចំបើកវគ្គបណ្ដុះបណ្ដាលសួស្ដីពីការត្រៀមបង្ការឆ្លើយតបទៅនឹងការរាតត្បាតជំងឺរលាកផ្លូវដង្ហើមដែលបង្កឡើងដោយវីរុសកូរ៉ូណា។
ចែករំលែកព័តមាននេះ