រាជធានីភ្នំពេញ ៖ ប្រជាពលរដ្ឋចំនួន៤នាក់ តំណាងឱ្យ៨គ្រួសារ បានធ្វើលិខិតទៅរដ្ឋបាលខណ្ឌប្ញស្សីកែវស្នើសុំបង្អង់ចំណាត់ការរដ្ឋបាល ពាក់ពន្ធ័នឹងទីតាំងដីទំនាស់នៅតំបន់អភិវឌ្ឍប្ញស្សីកែវ ជាបណ្តោះអាសន្ន ដើម្បីទុកលទ្ធភាពអោយប្រជាពលរដ្ឋ ទទួលបានការដោះស្រាយបន្តពីសាលារាជធានីភ្នំពេញ ។ ការស្នើសុំនេះ បន្ទាប់ពីអាជ្ញាធរបានបន្តអនុវត្តវិធានការរដ្ឋបាល ដោយឈូសឆាយចាក់ដី និងវាស់វែងលើដីទំនាស់នោះយកទៅចែកឱ្យប្រជាពលរដ្ឋចំនួន១៧៧គ្រួសារ ដោយមិនបានបន្តដោះស្រាយតាមស ជ ណរបស់ទីស្តីការគណៈរដ្ឋមន្ត្រីឡើយ ។
តាមលិខិតរបស់ប្រជាពលរដ្ឋបានអោយដឹងថា យើងខ្ញុំចំនួន៤នាក់ដែលទីលំនៅស្ថិតនៅតំបន់អភិវឌ្ឍន៍ ឫស្សីកែវភូមិស្ពានសង្កាត់គីឡូម៉ែត្រលេខ៦ និងភូមិទួលពពែសង្កាត់ទួលសង្កែ២ខណ្ឌឬស្សីកែវរាជធានីភ្នំពេញ ជាតំណាងប្រជា៨គ្រួសារដែលមានទំនាស់ដីធ្លីស្ថិតនៅតំបន់អភិវឌ្ឍន៍ប្ញស្សីកែវ សូមគោរពលោក ជា ពិសី អភិបាលនៃគណៈអភិបាលខណ្ឌប្ញស្សីកែវកម្មវត្ថុ សំណើសុំបង្អង់ចំណាត់ការរដ្ឋបាលពាក់ពន្ធ័នឹងទីតាំងដីទំនាស់ជាបណ្តោះអាសន្ន ដើម្បីទុកលទ្ធភាពអោយប្រជាពលរដ្ឋទទួលបានការដោះស្រាយបន្តពីសាលារាជធានីភ្នំពេញ ។
លិខិតស្នើសុំនេះ យោងទៅ ស.ជ.ណ លេខ ១០០ ចុះថ្ងៃទី១៧ ខែមករា ឆ្នាំ២០២០ របស់ស្តីទីការគណៈរដ្ឋមន្ត្រី, លិខិត «ពាក្យចុះថ្ងៃទី២៣ខែមករាឆ្នាំ២០២០របស់ប្រជាពលរដ្ឋ៨គ្រួសារ ,លិខិត២២១ ស.ជ.ណ ចុះថ្ងៃទី១០ខែកុម្ភៈឆ្នាំ២០២០របស់សាលាខណ្ឌ លិខិត២២០ ស.ជ.ណ ចុះថ្ងៃ ទីខែកុម្ភៈឆ្នាំ២០២០របស់សាលាខណ្ឌ, -លិខិត២១៨ ស.ជ.ណ ចុះថ្ងៃទី១០ខែកុម្ភៈឆ្នាំ២០២០ របស់សាលាខណ្ប្ញស្សីកែវ» ។ ក្នុងលិខិតស្នើសុំនោះបានអោយដឹងទៀតថា សម្តេចអគ្គមហាសេនាតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចារឯកភាពប្រគល់ជូនរដ្ឋបាលសាលារាជធានីបន្តដោះស្រាយ និងរាយការណ៍ជូនសម្តេចវិញ អំពីភាពមិនប្រក្រតី ពាក់ព័ន្ធនឹងដីទំនាស់របស់ប្រជាជន៨គ្រួសារ ស្ថិតនៅតំបន់អភិវឌ្ឍប្ញស្សីកែវតាមរយៈលិខិតលេខ១០០ស.ជ.ណ របស់ទីស្តីការរដ្ឋមន្ត្រី ចុះថ្ងៃទី១៧ខែមករាឆ្នាំ២០២០ ។
លិខិតនោះបានអោយដឹងថា ការទន្ទឹងរង់ចាំយ៉ាងអន្ទះសាររបស់ប្រជាពលរដ្ឋ៨គ្រួសារ ក្រោយពីទទួលបានគោលការណ៍ឯកភាពពីរាជរដ្ឋាភិបាលរាជធានីភ្នំពេញបន្តដោះស្រាយមក រហូតមកដល់ពេលនេះ មានរយៈ២៥ថ្ងៃហើយ ផ្ទុយទៅវិញប្រជាជន យើងខ្ញុំបែរជាទទួលបានលិខិតជូនដំណឹងជាបន្តបន្ទាប់បង្គាប់ឱ្យរុះរើសំណង់ របងថ្ម រោងដែក និងសម្ភារផ្សេងៗ ចេញពីលំនៅដ្ឋាន ខណៈដែលយើងខ្ញុំមានលិខិតទទួលពាក្យកាន់កាប់ចេញដោយប្រធានកសិកម្មស្រុកប្ញស្សីកែវលិខិតផ្ទេរ លិខិតបញ្ជាក់ប្រវត្តិដីនិងឯកសារគតិ
យុត្តជាច្រើនផ្សេងទៀត ដែលទទួលស្គាល់ភាពជាម្ចាស់ស្របច្បាប់ដោយរដ្ឋអំណាចគ្រប់ជាន់ថ្នាក់អស់រយៈកាលជិត៣០ឆ្នាំមកហើយ។
យើងខ្ញុំទាំង៨គ្រួសារ បាននឹងកំពុងរង់ចាំយន្តការដោះស្រាយបន្តពីរដ្ឋបាលសាលារាជធានី, សេចក្តីជូនដំណឹងដែលបង្គាប់អោយរុះរើ សំណង់របងថ្មនិងសម្ភារៈផ្សេងៗចេញពីដីលំនៅដ្ឋាននោះគឺផ្ទុយពីស្មារតីនៃលិខិតលេខ១០០ស.ជ.ណ របស់ទីស្តីការគណៈរដ្ឋមន្ត្រី ចុះថ្ងៃទី១៧ ខែមករា ឆ្នាំ២០២០ ។ តាមព័ត៌មានបានអោយដឹងថា បន្ទាប់ពីធ្វើលិខិតស្នើសុំប្រជាពលរដ្ឋក៍បានយកទៅដាក់ចូលទៅរដ្ឋបាលខណ្ឌឬស្សីកែវ តែពុំត្រូវបានអាជ្ញាធរទទួលឡើយ ។
តាមប្រជាពលរដ្ឋបានអោយដឹងថា បន្ទាប់ពីទទួលបានស ជ ណ របស់ទីស្តីការគណះរដ្ឋមន្ត្រី ដែលរាជរដ្ឋាភិបាលបានឯកភាពប្រគល់ជួនរដ្ឋបាលរាជធានីភ្នំពេញបន្តដោះស្រាយ និងរាយយការណ៍ជួនសម្តេច តេជោសម្តេចនាយករដ្ឋមន្ត្រី ។
ចែករំលែកព័តមាននេះ