រាជធានីភ្នំពេញ ៖ ចំពោះការសម្រេចដកអនុគ្រោះពន្ធពីសភាពសហភាពអឺរ៉ុបត្រូវបានមេសហជីពអះអាងថា កម្ពុជានឹងបាត់បង់ថវិកា១០០០លានដុល្លារក្នុងមួយឆ្នាំ ពីវិស័យកាត់ដេរ និងផលិតស្បែកជើង ។ លោក ប៉ាវ ស៊ីណា…
រាជធានីភ្នំពេញ ៖ ចំពោះការសម្រេចដកអនុគ្រោះពន្ធពីសភាពសហភាពអឺរ៉ុបត្រូវបានមេសហជីពអះអាងថា កម្ពុជានឹងបាត់បង់ថវិកា១០០០លានដុល្លារក្នុងមួយឆ្នាំ ពីវិស័យកាត់ដេរ និងផលិតស្បែកជើង ។ លោក ប៉ាវ ស៊ីណា ប្រធានសហភាពចលនាកម្មករកម្ពុជា បានបញ្ជាក់ឲ្យដឹងនៅថ្ងៃទី១៣ ខែកុម្ភៈនេះ យ៉ាងដូច្នេះថា៖ «ការដកអនុគ្រោះពន្ធមានប្រហែល២០% ពីកម្ពុជាយើងមានការសោកស្តាយព្រោះថា យើងទទួលបានការថែរក្សា ដើម្បីផលប្រយោជន៍ប្រជាពលរដ្ឋយើង ។ ចំនួន២០%នេះស្មើប្រមាណជាង១០០០លានបានបំរើដល់ប្រជាពលរដ្ឋរាប់ម៉ឺននាក់ ។ក្នុងន័យនេះ បើយើងបាត់ស្មើនឹងពលរដ្ឋយើងរាប់ម៉ឺននាក់នឹងបាត់ការងារដែរ» ។
ជាមួយគ្នានោះដែរ ប្រធានសភាសហជីពដែលគិតពីប្រយោជន៍កម្មករក៏បានលើកឡើងថា ការចេញសម្រេចរបស់សហភាពអឺរ៉ុបក៏បានផ្តល់ឲ្យឱកាសដល់កម្ពុជា ក្នុងរយៈពេលកន្លះឆ្នាំទៀត (ពីខែកុម្ភៈដល់ខែសីហា) ក្នុងពិចារណាលើកអ្វីដែលមិនទាន់មានភាពល្អប្រសើរ ។ ដូច្នេះយើងមានឱកាសក្នុងការកែល្អឡើងវិញ ។ លោកគូសបញ្ជាក់ថា ៖«ខ្ញុំថា រាជរដ្ឋាភិបាលមានឱកាសក្នុងការចចារជាមួយសហភាពអឺរ៉ុបបន្តទៀត ព្រោះថា ក្នុងសេចក្តីសម្រេចសហភាពអឺរ៉ុបបានបញ្ជាក់ជំហថា បន្តធ្វើកិច្ចសហប្រតិបត្តិការជាមួយកម្ពុជាដដែល» ។
សូមជម្រាបថា ការលើកឡើងរបស់មេសហជីពរូបនេះ បន្ទាប់ពីសហភាពអឺរ៉ុបកាលពីថ្ងៃទី១២ ខែកុម្ភៈបានសម្រេចដកអនុគ្រោះពន្ធពីកម្ពុជា ។ ប៉ុន្តែការសម្រេចនេះត្រូវរាជរដ្ឋាភិបាលបានសម្តែងការសោកស្តាយ ។ ក្រសួងការបរទេស ចេញផ្សាយកាលពីយប់ថ្ងៃទី១២ កុម្ភៈ បញ្ជាក់ក្នុងសេចក្តីថ្លែងការណ៍ថាសេចក្តីសម្រេចរបស់គណៈកម្មការអឺរ៉ុបពាក់ព័ន្ធនឹងប្រព័ន្ធអនុគ្រោះពន្ធ EBA នៅថ្ងៃទី១២ ខែកុម្ភៈ ឆ្នាំ២០២០ ពាក់ព័ន្ធនឹងការដកជាបណ្តោះអាសន្ននូវផ្នែកខ្លះនៃប្រព័ន្ធអនុគ្រោះពន្ធ «គ្រប់មុខទំនិញលើកលែងសព្វាវុធ» ដែលអនុលោមតាមមាត្រា១៩ នៃបទប្បញ្ញត្តិស្តីពីប្រព័ន្ធអនុគ្រោះពន្ធទូទៅ (GSP) របស់សហភាពអឺរ៉ុប ៕
ចែករំលែកព័តមាននេះ