ខេត្តសៀមរាបរៀបចំព្រឹត្តិការណ៍ប្រកួតប្រណាំងទូកប្រពៃណីខ្នាតអន្តរជាតិ
- សៀមរាប
ខេត្តសៀមរាប ៖ កាលពីរសៀលថ្ងៃទី១២ ខែកុម្ភ: ឆ្នាំ ២០២០ លោក ពៅ ពិសិដ្ឋ អភិបាលរងខេត្តតំណាងឱ្យលោក…
ខេត្តសៀមរាប ៖ កាលពីរសៀលថ្ងៃទី១២ ខែកុម្ភ: ឆ្នាំ ២០២០ លោក ពៅ ពិសិដ្ឋ អភិបាលរងខេត្តតំណាងឱ្យលោក…
ខេត្តសៀមរាប ៖ កាលពីរសៀលថ្ងៃទី១២ ខែកុម្ភ: ឆ្នាំ ២០២០ លោក ពៅ ពិសិដ្ឋ អភិបាលរងខេត្តតំណាងឱ្យលោក ទៀ សីហា អភិបាល នៃគណៈអភិបាលខេត្តសៀមរាប អញ្ជើញចូលរួមក្នុងកិច្ចប្រជុំពិភាក្សាស្តីពីការរៀបចំព្រឹត្តិការណ៍ប្រកួតប្រណាំងទូកប្រពៃណីខ្នាតអន្តរជាតិ ទូកនាគ ទូកកានូ ការយ៉ាក់ និងទូករ៉ូអុីង ជ្រើសរើសជើងឯកភូមិភាគបឹងទន្លេសាប ដែលមានការចូលរួមពីខេត្តពោធិសាត់ ខេត្តកំពង់ឆ្នាំង ខេត្តសៀមរាប ខេត្តបន្ទាយមានជ័យ ខេត្តបាត់ដំបង និងខេត្តប៉ៃលិន ដើម្បីទទួលបានពានរង្វាន់សម្តេចក្រឡាហោម ស ខេង លើកទី២ ឆ្នាំ២០២០ នឹងប្រព្រឹត្តទៅចាប់ពីថ្ងៃទី២២-២៣ ខែកុម្ភៈ ឆ្នាំ ២០២០ នៅបឹងឈូក ស្រុកបន្ទាយស្រី ខេត្តសៀមរាប និងមានរៀបចំពិធីតាំងពិព័រណ៍ ព្រមទាំងប្រគំតន្ត្រីចាប់ពីថ្ងៃទី១៧-២៣ ខែកុម្ភ: ឆ្នាំ២០២០ នៅក្រុងសៀមរាប ខេត្តសៀមរាប ដែលរៀបចំឡើងដោយសហព័ន្ធកីឡាទូកកានូ និងទូករ៉ូអុីង។
ក្នុងកិច្ចប្រជុំខាងលើនេះក៏មានការចូលរួមពីលោកបណ្ឌិត មាស សារិន អនុប្រធានអចិន្ត្រៃយ៍ សហព័ន្ធកីឡាទូកកានូ និងទូករ៉ូអុីងកម្ពុជា និងសមាជិកប្រតិភូ ព្រមទាំងមានការអញ្ជើញចូលរួមពីលោកនាយករងរដ្ឋបាលសាលាខេត្ត លោក លោកស្រីជាប្រធាន និងអនុប្រធានមន្ទីរ-អង្គភាពក្នុងខេត្ត លោក លោកស្រី អភិបាលក្រុង ស្រុក ។
ការរៀបចំកម្មវិធីខាងលើនេះធ្វើឡើងនៅរដ្ឋបាលខេត្តសៀមរាប គឺដើម្បីបំផុស និងលើកកម្ពស់ប្រភេទកីឡាប្រណាំងទូកប្រពៃណីខ្នាតអន្តរជាតិ ទូកនាគ ទូកកានូ ការយ៉ាក់ និងទូករ៉ូអុីង ឱ្យមានសកម្មភាពទូទាំងប្រទេស ជាពិសេសយុវជនចូលរួមលេងកីឡា និងចៀសផុតពីគ្រឿងញៀន និងលើកកម្ពស់សុខុមាលភាព សមត្ថភាព សម្រាប់ចូលរួមការប្រកួតប្រណាំងទូកថ្នាក់ជាតិ និងថ្នាក់អន្តរជាតិ ដើម្បីឆ្ពោះទៅកីឡាស៊ីហ្គេម Sea Games លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ៕ (កែសម្រួលដោយ ៖ ធីតា)
ចែករំលែកព័តមាននេះ