អាហ្វ្រិកខាងកើត ៖ ចាប់តាំងពីច្រើនសប្ដាហ៍មកហើយ ហ្វូងកណ្ដូបអត់ឃ្លានបានរាតត្បាតបំផ្លាញដំណាំដាំដុះ និងរុក្ខជាតិ នៅអាហ្វ្រិកខាងកើត ចាប់ពីប្រទេសអេត្យូពីរហូតដល់កេនយ៉ានិងអ៊ូហ្គង់ដា ដោយបំផ្លាញតំបន់ដ៏ធំនៅទីនោះ។ អ.ស.បកាលពីថ្ងៃទី១១ ខែកុម្ភៈ ឆ្នាំ ២០២០នេះ បានសម្ដែងការព្រួយបារម្ភយ៉ាងខ្លាំងរបស់ខ្លួន។
ហ្វូងកណ្ដូបដែលមានទំហំធំជាប្រវត្តិសាស្ត្រ មានចំនួនសរុបច្រើនពាន់លានក្បាល បានបំផ្លាញចាប់តាំងពីច្រើនសប្ដាហ៍មកហើយ តំបន់ដ៏ធំនៃអាហ្វ្រិកខាងកើត ក្រោយមានការផ្លាស់ប្ដូរខ្លាំងនៃបរិយាកាស ដែលអាចនាំឲ្យមានគ្រោះមហន្តរាយសម្រាប់តំបន់មួយ ដែលជួបប្រទះរួចហើយនូវគ្រោះរាំងស្ងួតនិងទឹកជំនន់។
ពពកហ្វូងកណ្ដូបដ៏ក្រាស់បានហោះកាត់ចាប់ពីអេត្យូពី ដល់សូម៉ាលីនិងរហូតដល់កេនយ៉ានិងអ៊ូហ្គង់ដា ចាប់តាំងពីថ្ងៃ្ងទី៩កុម្ភៈមក។ អង្គការFAOវាយតម្លៃថា ហ្វូងតែមួយនៃហ្វូងកណ្ដូបទាំងនេះ គ្របដណ្ដប់លើផ្ទៃដីមួយមានទំហំ២៤០០គីឡូម៉ែត្រក្រឡា។
ហ្វូងកណ្ដូបដ៏ធំបែបនេះមានកណ្ដូបប្រមាណជា២០០ពាន់លានក្បាល ហើយកណ្ដូប១ក្បាលៗក្នុង១ថ្ងៃស៊ីរុក្ខជាតិអស់ស្មើនឹងទម្ងន់ខ្លួនវា គឹប្រមាណជា២ក្រាម ដូច្នេះពួកវាត្រួវការស្បៀងសរុប១ថ្ងៃ៤០០.០០០តោន។
វាអាចហោះហើរបានក្នុង១ថ្ងៃចម្ងាយ១៥០គីឡូម៉ែត្រ ហើយបំផ្លាញដំណាំដាំដុះរបស់ប្រជាជន តាមផ្លូវហោះហើររបស់ពួកវា ដើម្បីចិញ្ចឹមជីវិតនិងកកើតកូនថែម។ ប្រទេសអេត្យូពីនិងសូម៉ាលីបានចេញការប្រកាសអាសន្នជាតិ ដោយពុំធ្លាប់ជួបប្រទះហ្វូងកណ្ដូបធំបែបនេះចាប់តាំងពី២៥ឆ្នាំមកហើយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា) (ប្រភពវីដេអូ ៖ Le Parisien)
ចែករំលែកព័តមាននេះ