យោងតាមប្រភពព័ត៌មានពីទីភ្នាក់ងារព័ត៌មានក្យូដូរបស់ជប៉ុនឱ្យដឹងថា ពេលនេះគណបក្សកុម្មុយនីស្តចិន និងគណបក្សពលកររបស់កូរ៉េខាងជើងកំពុងរៀបចំដំណើរទស្សនកិច្ចមួយទៅកាន់ប្រទេសចិន របស់កូនប្រុសពៅមេដឹកនាំកូរ៉េខាងជើង លោកគីម ជុងអ៊ីល នៅខែកក្កដាខាងមុខនេះ ។ អ្នកវិភាគនិយាយថា ប្រសិនបើលោកគីម ជុងអ៊ុន ជាកូនប្រុសពៅរបស់លោកគីម ជុងអ៊ីល ទៅបំពេញទស្សនកិច្ចនៅប្រទេសចិនមែននោះ វានឹងជួយពង្រឹង និងពង្រីកគោលជំហររបស់លោកនៅពេលលោកកាន់តំណែងជាមេដឹកនាំកូរ៉េខាងជើងបន្តវេនពីឪពុកលោក ។
លោកគីម ជុងអ៊ុន ត្រូវបានគេរំពឹងថា ជាមនុស្សតែម្នាក់គត់ដែលនឹងឡើងបន្តតំណែងពីលោកគីម ជុងអ៊ីល ។ ប៉ុន្តែបើទោះបីជាបែបណា ប្រភពមួយឱ្យដឹងថា គណបក្សទាំង២នោះមិនទាន់កំណត់កាលបរិច្ឆេទច្បាស់លាស់សម្រាប់ទស្សនកិច្ចនោះនៅឡើយទេ ។
ទីភ្នាក់ងារព័ត៌មានយ៉ុនហាប់របស់កូរ៉េខាងត្បូងរាយការណ៍ថា ចិនបានអញ្ជើញលោកគីម ជុងអ៊ុន ទៅបំពេញទស្សនកិច្ចក្នុងប្រទេសខ្លួនជាផ្លូវការ ៕
ចែករំលែកព័តមាននេះ