ខេត្តក្រចេះ ៖ ប៉ូលិសស្រុកសំបូរសម្រេចបាញ់ផ្តាច់ជីវិតក្របីឈ្មោលឡើង.កមួយក្បាលចោលនៅក្នុងព្រៃ បន្ទាប់ពីសត្វក្របីដែលកាចមួយក្បាលក្នុងចំណោមសត្វក្របីជាច្រើនក្បាល បានដេញវ័ធត្រូវមន្ត្រីប៉ូលិសប៉ុស្តិ៍រដ្ឋបាលម្នាក់បណ្តាលឲ្យរងរបួសធ្ងន់នៅពេលកំពុងចុះប្រតិបត្តិការបង្ក្រាបអំពើចោរកម្មលួចក្របីមួយករណី។
ប៉ូលិសស្រុកសំបូរបាននិយាយថា សត្វក្របីញីឈ្មោលធំៗចំនួន៤ក្បាល ត្រូវបានក្រុមចោរ លួចដឹកជម្លៀសទៅចងចោលក្នុងព្រៃមួយកន្លែង ស្ថិតក្នុងភូមិស្រែស្បូវ ឃុំក្បាលដំរីស្រុកសំបូរ។ ក្រោយទទួលបានព័ត៌មានពីករណីនេះភ្លាម នគរបាលព្រហ្មទណ្ឌស្រុក និងកម្លាំងនគរបាលប៉ុស្តិ៍រដ្ឋបាលនៅព្រឹកថ្ងៃទី១២ ខែកុម្ភៈ បានចុះទៅពិនិត្យមើល។
តាមប្រភពដដែលបានបន្តថា នៅពេលនគរបាលចុះទៅពិនិត្យនិងហ៊ុមព័ទ្ឋព្រៃដែលមានជនមិនស្គាល់មុខបានលួចដឹកក្របីទាំងនោះមកចង់ ស្រាប់តែមានសត្វក្របីឈ្មោលឡើង.កធំមួយក្បាលមានចរិកកាចសាហាវ បានដេញវ័ធមន្ត្រីប៉ុស្តិ៍នគរបាលរដ្ឋបាលម្នាក់ឈ្មោះ ឈឹម កែវ ពេញក្នុងព្រៃ បណ្តាលឲ្យរងរបួសយ៉ាងដំណំលើរាងកាយ ដោយសារបុកមុតនឹងស្នែងរបស់សត្វក្របីមួយក្បាលនោះ។
អធិការរងនគរបាលស្រុកសំបូរ លោក ណយ ស៊ីថាច បានឲ្យដឹងថា ភ្លាមៗនោះ ក្រោយពីមានការស្រែកឲ្យជួយពីមន្ត្រីនគរបាលប៉ុស្តិ៍ដោយសារតែក្របីដេញវ័ធ ទើបកម្លាំងនគរបាលក៏សម្រេចបាញ់ផ្តាច់ជីវិតសត្វក្របីឈ្មោលឡើង.កមួយក្បាលនោះចោលនៅក្នុងព្រៃតែម្តង។
លោកអធិការនគរបាលរងស្រុកសំបូរបានបន្តថា មន្ត្រីនគរបាលម្នាក់ដែលបានរងគ្រោះធ្ងន់ធ្ងរដាច់រយះពេញរាងកាយ ដោយសារតែសត្វក្របីឈ្មោលមួយក្បាលនោះបុកនិងវ័ធ ក៏ត្រូវបាននាំមកសង្គ្រោះនៅនិងមន្ទីរពេទ្យភ្លាមៗ។ ដោយឡែកករណីអំពើរចោរកម្មលួចសត្វក្របីខាងលើនេះ ត្រូវបាននគរបាលព្រហ្មទណ្ឌស្រុកកំពុងតែបើកការស្រាវជ្រាវស៊ើបអង្កេត ហើយ ៕ (កែសម្រួលដោយ ៖ ធីតា)
ចែករំលែកព័តមាននេះ