រាជធានីភ្នំពេញ ៖ សហព័ន្ធកីឡាវាយកូនបាល់ នាថ្ងៃទី១១ កុម្ភៈ នេះ បានបើកវគ្គបណ្តបណ្តាលអាជ្ញា កណ្តាល និងគណៈកម្មាការថ្នាក់ជាតិ២០១៩ ដើម្បីត្រៀមការប្រកួតកីឡាជាតិលើកទី៣ ឆ្នាំ២០២០ដែលមានរយៈពេល៣ថ្ងៃ គឺចាប់ពីថ្ងៃទី១១ដល់១៣ កុម្ភៈ ឆ្នាំ២០២០ នៅអគ្គលេខាធិការដ្ឋានសហព័ន្ធក្នុងពហុកីឡដ្ឋានជាតិ ។
លោកជា ពៅ អគ្គលេខាធិការរងនៃសហព័ន្ធបានប្រាប់ឲ្យដឹងថា វគ្គខាងលើកនេះ មានសិក្ខាកាមចូលរួមចំនួន២២នាក់ (មកពី៤រាជធានី ខេត្ត-ក្រុង) រួមមានរាជធានីភ្នំពេញ ខេត្តកែប ខេត្តព្រះសីហនុ និងខេត្តសៀមរាប បង្រៀនដោយគ្រូ២នាក់ មកពីប្រទេសពីអ៊ីរ៉ង លោកAdel Borghei និងគ្រូម្នាក់ទៀតជនជាតិម៉ាឡេស៊ី គឺលោក Razmee Rawi ។
លោកបានបន្តថាក្នុងរយៈពេល២ថ្ងៃដំបូង យើងសិក្សាទ្រឹស្តីសុទ្ធជាមួយលោកគ្រូ សម្រាប់អាជ្ញាកណ្តាលនិងគណៈកម្មាការថ្នាក់ជាតិ ដើម្បីត្រៀមព្រឹត្តិការណ៍ការប្រកួតកីឡាជាតិលើកទី៣ឆ្នាំ២០២០ ដែលនឹងប្រព្រឹត្តចាប់ពីថ្ងៃទី៤ រហូតដល់ថ្ងៃទី១៥ ខែឧសភា ឆ្នាំ២០២០។
លោកអគ្គលេខាធិការរងបន្ថែមទៀតថា សម្រាប់ថ្ងៃចុងក្រោយសិក្ខាកាមទាំងអស់ នឹងធ្វើការអនុវត្តផ្ទាល់នៅលើទីលានទាំងអាជ្ញាកណ្តាល និងគណៈកម្មាការ ដោយការអនុវត្តនេះស្រដៀងនឹងការប្រកួតពិត។ វគ្គនេះ សហព័ន្ធប្រើប្រាស់ថវិការបស់ក្រសួងអប់រំ យុវជន និងកីឡា២០១៩ ៕
ចែករំលែកព័តមាននេះ