រាជធានីភ្នំពេញ ៖ ថ្លែងនៅក្នុងជំនួបពិភាក្សាការងារជាមួយរដ្ឋមន្ត្រីក្រសួងទេសចរណ៍កាលពីថ្ងៃទី១៥ សីហា ២០១៤ លោករដ្ឋមន្ត្រីក្រសួងដែនដីហេដ្ឋារចនាសម្ព័ន្ធដឹកជញ្ជូន និងទេសចរណ៍ជប៉ុនបានអះអាងថា គ្មានប្រជាជនជប៉ុនណាម្នាក់ដែលមិនស្គាល់ប្រាសាទអង្គរវត្តរបស់ប្រទេសកម្ពុជានោះទេ ព្រោះថាក្រៅពីអ្នកទេសចររាប់សែននាក់ដែលមកទស្សនាអង្គរវត្តដោយផ្ទាល់នោះ ប្រទេសជប៉ុនបានបញ្ចូលប្រាសាទអង្គរវត្តទៅក្នុងប្រវត្តិសាស្ត្រនៃប្រទេសជប៉ុនសម្រាប់ការសិក្សារបស់សិស្សអនុវិទ្យា
ល័យ ។
គួរបញ្ជាក់ថា លោក ថោង ខុន រដ្ឋមន្ត្រីក្រសួងទេសចរណ៍បានជួបពិភាក្សាការងារជាមួយលោក Akihiro Ohta រដ្ឋមន្ត្រីក្រសួងដែនដីហេដ្ឋារចនាសម្ព័ន្ធដឹកជញ្ជូន និងទេសចរណ៍ជប៉ុន កាលពីថ្ងៃទី១៥ សីហា ២០១៤ នេះនៅទីស្ដីការក្រសួងទាក់ទងការពង្រឹង និងការអភិវឌ្ឍវិស័យទេសចរណ៍នៅកម្ពុជា ជាពិសេសការអភិវឌ្ឍតំបន់ទេសចរណ៍អង្គរ និងតំបន់ឆ្នេរ ។
លោក Akihiro Ohta បានលើកឡើងថា បច្ចុប្បន្ននេះជប៉ុនបានបញ្ចូលប្រាសាទអង្គរវត្តក្នុងប្រវត្តិសាស្ត្រ ដើម្បីបង្រៀនសិស្សថ្នាក់អនុវិទ្យាល័យ ។ ដូច្នេះគ្មានប្រជាជនជប៉ុនណាម្នាក់ដែលមិនស្គាល់អង្គរវត្តនោះទេ ។ លោកបញ្ជាក់ថា បន្ថែមលើកំណត់ត្រាក្នុងប្រវត្តិសាស្ត្រនោះ ក៏មានប្រជាជនជប៉ុនប្រមាណជា២សែននាក់ បានមកទស្សនាប្រាសាទអង្គរវត្តដោយផ្ទាល់គិតក្នុងឆ្នាំ២០១៣ កន្លងមកនេះ ហើយចំនួនភ្ញៀវទេសចរជប៉ុននឹងកើនឡើងច្រើនជាងនេះទៀតនៅពេលខាងមុខ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ