តាមប្រភពព័ត៌មាន Nation Thailand បានឱ្យដឹងថា ធនាគារសន្សំរដ្ឋាភិបាល (GSB) នៅថ្ងៃទី១០ ខែកុម្ភៈ បានប្រកាសផ្តល់ជំនួយហិរញ្ញវត្ថុសម្រាប់ជនរងគ្រោះនៃការបាញ់ប្រហារដ៏ធំនៅខេត្តណាខនរ៉ាក់ស៊ីម៉ា (Nakhon Ratchasima) កាលពីចុងសប្តាហ៍ ដែលបណ្តាលឱ្យមនុស្ស៣០នាក់បាត់បង់ជីវិត និង ៥៨នាក់រងរបួស ។
បំណុលទាំងអស់របស់ប៉ូលិស និងបុគ្គលិកយោធា ដែលបានបាត់បង់ជីវិតនឹងត្រូវលុបចោល ហើយគ្រួសាររបស់ពួកគេនឹងទទួលបានថវិកាចំនួន ១០០០០០បាត ដែលជាជំនួយហិរញ្ញវត្ថុ ។ ចំណែកឯជនស៊ីវិល ដែលបានស្លាប់ និងជាកូនបំណុលរបស់ធនាគារនឹងមានការបញ្ចុះភាគរយការប្រាក់ចុះដល់ត្រឹម ០.០១% សម្រាប់ការសងប្រាក់ដែលនៅសល់ ។
រីឯអ្នករងរបួសធ្ងន់ធ្ងរ ដែលជាកូនបំណុលរបស់ធនាគារ នឹងមានអត្រាការចុះនៅសល់ត្រឹមតែ ០.០១% សម្រាប់រយៈពេល៥ឆ្នាំ ។ វិធានការណ៍នេះមានប្រសិទ្ធិភាពចាប់ពីថ្ងៃទី៩ ខែកុម្ភៈ ។
ជាមួយគ្នានេះដែរ បន្ទាប់ពីការបាញ់ប្រហារដ៏រន្ធត់មួយ ដែលបណ្តាលឱ្យមនុស្ស ៣០នាក់បានាបាត់បង់ជីវិត រួមទាំងខ្មាន់កាំភ្លើង និង៥៧នាក់ផ្សេងទៀតរងរបួស នាយករដ្ឋមន្ត្រីថៃលោក ប្រាយុទ្ធ ចាន់អូចា កាលពីថ្ងៃអាទិត្យ បានបញ្ជាឱ្យពិនិត្យឡើងវិញនូវវិធានការសន្តិសុខ នៅឯមូលដ្ឋានទ័ពរបស់យោធា ។
គួរបញ្ជាក់ផងដែរថា ការបាញ់ប្រហារបានផ្ទុះឡើងនៅច្រកចូលនៃមជ្ឈមណ្ឌលពាណិជ្ជកម្ម Terminal 21 ក្នុងខេត្តណាខនរ៉ាតចាស៊ីម៉ា ដោយខ្មាន់កាំភ្លើងមានឈ្មោះ Jakraphanth Thomma ហើយជននេះត្រូវបានបាញ់សម្លាប់ ដោយកងកុំម៉ង់ដូ ពិសេសនៅកន្លែងកើតហេតុផ្ទាល់តែម្តង ៕
ចែករំលែកព័តមាននេះ