ខេត្តសៀមរាប ៖ បទល្មើសជលផលប្រភេទ ឆ្នុកចាប់ដោយភ្លើងពណ៌និងសម្រាសកំប្លោកកំពុងសម្រុកធ្វើសកម្មភាពយ៉ាងគគ្រឹក គគ្រេងនៅក្នុងដែនដីខេត្តសៀមរាប និងខេត្តកំពង់ធំដោយមិនឃើញមានអាជ្ញធរដែនដី និងសមត្ថកិច្ចជំនាញណាមួយហ៊ានចេញមុខបង្ក្រាបករណីល្មើសច្បាប់ខាងលើ ឱ្យសមស្របទៅនឹងបទបញ្ជារបស់ប្រមុខនៃរាជរដ្ឋាភិបាលដែលបានដាក់ចេញ ។
យោងតាមរូបភាពជាក់ស្ដែងដែលបានផ្តិតពីផ្ទៃបឹងទន្លេសាបនៅ ខេត្តសៀមរាប និងខេត្តកំពង់ធំបានបង្ហាញឱ្យដឹងថា រដូវបិទនេសាទឈានចូលមកដល់បទល្មើសនេសាទគ្រប់ប្រភេទមានដូចជាឆ្នុក,លប,រាវ, ប័រ,រុញស៊ីប,អូសអ៊ួន, សាច់ស្បៃមុងក្រឡាញឹកជាដើមកំពុងកើតមានដូចទឹកបាក់ទំនប់ដោយគេដាក់ការសង្ស័យថា សមត្ថកិច្ចជំនាញមួយចំនួនទទូលសំណូកឬក៏ដាក់ខែពីអ្នកប្រព្រឹត្តិបទល្មើសនេសាទគ្រប់ប្រភេទទាំងនោះដើម្បីយកទៅដាក់ហោប៉ៅធ្វើមានធ្វើបានទើបគេសង្កេតឃើញថា ពីមួយឆ្នាំទៅមួយឆ្នាំផលត្រីធ្លាក់ចុះជាលំដាប់ ដែលបណ្តែតបណ្តោយឱ្យ ពលរដ្ឋមួយចំនួនបង្ខំចិត្តទទួលទានត្រីចិញ្ចឹមសិប្បនិមិ្មតនៅតាមទីផ្សារទៅវិញ។
ទាក់ទិនទៅនឹងការលើកឡើងខាងលើនេះដែរ នាយខណ្ឌរដ្ឋបាលជលផលខេត្តសៀមរាបលោកព្រ្ទិន សាវិន មិនអាចទាក់ទងសុំការពន្យល់ពីលោកបានទេនៅរសៀល ថ្ងៃទី១៥ ខែសីហានេះ ស្រដៀងគ្នានេះដែរនាយខណ្ឌរដ្ឋបាលជនផលខេត្តកំពង់ធំលោក ប៉ែន វណ្ណារិទ្ធ ក៏មិនអាចទំនាក់ទំនងសុំការបំភ្លឺពីលោកបានទេ។ ជុំវិញបញ្ហាបទល្មើសនេសាទដែលកើតមានពេញផ្ទៃបឹងទន្លេសាបនៃខេត្តសៀមរាប និងខេត្តកំពង់ធំនេះដែរ គេនៅទន្ទឹងរកចំាមើលថាតើលោកអភិបាលខេត្តទាំងពីរ អាចមានចំណាត់ការបែបណាដើម្បីឱ្យផលត្រីកើនឡើងវិញនិងជាពិសេសគួរតែចាត់តាំងអង្គភាពឯករាជ្យមួយដើម្បីតាមដាននូវរាល់បទល្មើសផ្សេងៗព្រមទាំងចាត់វិធានការក្តៅណាមួយដូចជាដុះក្អែលទៅលើមន្ត្រីជំនាញមួយចំនួនដែលទទួលសំណូក ហ៊ានអនុវត្តផ្ទុយពីបទបញ្ជារបស់ប្រមុខរាជរដ្ឋាភិបាល។
ចែករំលែកព័តមាននេះ