ខេត្តមណ្ឌលគិរី ៖ អណ្ដូងស្នប់ចំនួន១៣ដែលជាអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់ជូនបងប្អូនប្រជាពលរដ្ឋដែលខ្វះទឹកស្អាតប្រើប្រាស់នៅក្នុងឃុំមេម៉ង់ ឃុំចុងផ្លាស់ ស្រុកកែវសីមា…
ខេត្តមណ្ឌលគិរី ៖ អណ្ដូងស្នប់ចំនួន១៣ដែលជាអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់ជូនបងប្អូនប្រជាពលរដ្ឋដែលខ្វះទឹកស្អាតប្រើប្រាស់នៅក្នុងឃុំមេម៉ង់ ឃុំចុងផ្លាស់ ស្រុកកែវសីមា ត្រូវបានអាជ្ញាធរខេត្តធ្វើពិធីបើកការដ្ឋានសាងសង់នាថ្ងៃទី៨ ខែកុម្ភៈ ឆ្នាំ២០២០។
លោក ស្វាយ សំអ៊ាង ប្រធានគណៈកម្មាធិការសាខាកាកបាទក្រហមខេត្ត បានឲ្យដឹងថាកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន បានរួមចំណែកយ៉ាងច្រើនជាមួយរាជរដ្ឋាភិបាលកម្ពុជា ក្នុងការឆ្លើយតបទៅនឹងតម្រូវការចាំបាច់របស់ប្រជាពលរដ្ឋដែលរងគ្រោះ និងងាយរងគ្រោះដោយប្រការផ្សេងៗ ក៏ដូចជា លើផ្នែកអនាម័យសុខភាពរបស់បងប្អូនប្រជាពលរដ្ឋតាមសហគមន៍ ជាពិសេសប្រភពទឹកស្អាត ជាតម្រូវការចាំបាច់ដែលមិនអាចខ្វះបានសម្រាប់ប្រើប្រាស់ជីវភាពប្រចាំថ្ងៃរបស់ប្រជាពលរដ្ឋ។
កាកបាទក្រហមកម្ពុជាបានផ្តល់អណ្តូងទឹកស្អាតចំនួន១៣អណ្តូងបន្ថែមទៀត ជូនដល់ប្រជាពលរដ្ឋរស់នៅក្នុងឃុំមេម៉ង់ និងឃុំចុងផ្លាស់ ស្រុកកែវសីមា ចំនួន២៦១គ្រួសារ ស្មើនឹង១.០១៦នាក់ ហើយការចំណាយថវិកាជួយសាងសង់អណ្ដូងស្នប់នៅពេលនេះ បានបង្ហាញពីការយកចិត្តទុកដាក់ខ្ពស់របស់សម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដើម្បីចូលរួមលើកកម្ពស់អនាម័យ សុខភាព នៅក្នុងសហគមន៍ និងការកាត់បន្ថយអាត្រាឈឺបណ្តាលឱ្យបាត់បង់ជីវិតរបស់កុមារកម្ពុជាដែលឆ្លងតាមរយៈទឹក ដូចជាជំងឺរាគជាដើម ជាពិសេស ដើម្បីធ្វើអោយប្រជាពលរដ្ឋគ្រប់រូបទទួលបានទឹកស្អាតប្រើប្រាស់គ្រប់ៗគ្នា ដោយមិនប្រកាន់ពណ៌សម្បុរ ជាតិសាសន៍ ឬនិន្នាការនយោបាយអ្វីឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ