ខេត្តបាត់ដំបង ៖ ក្រុមអ្នកញៀនល្បែងបញ្ជល់មាន់ចំនួន៦នាក់ក្នុងចំណោមរាប់សិបនាក់ ដែលកំពុងស្រែកហូរកញ្ជ្រៀវយ៉ាងសប្បាយ ត្រូវបានសមត្ថកិច្ចឆ្មក់ចូលទៅបង្ក្រាបនិងឃាត់ខ្លួន ហើយបញ្ជូនទៅកាន់ស្នងការដ្ឋានខេត្ត កាលពីរសៀលថ្ងៃទី០៩ កុម្ភៈ ដែលកំពុងប្រព្រឹត្តនៅក្នុងភូមិច្រាបក្រសាំង សង្កាត់វត្តគរ…
ខេត្តបាត់ដំបង ៖ ក្រុមអ្នកញៀនល្បែងបញ្ជល់មាន់ចំនួន៦នាក់ក្នុងចំណោមរាប់សិបនាក់ ដែលកំពុងស្រែកហូរកញ្ជ្រៀវយ៉ាងសប្បាយ ត្រូវបានសមត្ថកិច្ចឆ្មក់ចូលទៅបង្ក្រាបនិងឃាត់ខ្លួន ហើយបញ្ជូនទៅកាន់ស្នងការដ្ឋានខេត្ត កាលពីរសៀលថ្ងៃទី០៩ កុម្ភៈ ដែលកំពុងប្រព្រឹត្តនៅក្នុងភូមិច្រាបក្រសាំង សង្កាត់វត្តគរ ក្រុងបាត់ដំបង។
លោកឧត្តមសេនីយ៍ត្រី ជេត វណ្ណនី ស្នងការរងខេត្តបានឲ្យដឹងថា ក្រុមអ្នកញៀនល្បែងទាំង៦នាក់ ដែលត្រូវសមត្ថកិច្ចឃាត់ខ្លួនមាន ១-ឈ្មោះប៉ុន ហាន អាយុ៦៨ឆ្នាំ ២-ឈ្មោះ ហេង ផុន អាយុ៣៨ឆ្នាំ ៣-ឈ្មោះវ៉ាន់ វែន អាយុ៧៨ឆ្នាំ ៤-មោះ ខន សារុន អាយុ៦០ឆ្នាំ ៥-ឈ្មោះហ៊ឹម ដារ៉ា អាយុ៥១ឆ្នាំ និង៦-ឈ្មោះ ទូច យ៉ាសិទ្ធ អាយុ៤៣ឆ្នាំ។
ជាមួយនឹងការឃាត់ខ្លួន អ្នកញៀនល្បែងនេះ សមត្ថកិច្ចក៏បានរឹបអូសវត្ថុតាងមួយចំនួនដូចជា មាន់ជល់ចំនួន៣ក្បាល សង្វៀនចំនួន២ ម៉ូតូចំនួន២២គ្រឿង និងសម្ភារសម្រាប់រៀបចំប្រព្រឹត្តល្បែងនេះជាច្រើនទៀតផង ។ លោកស្នងការរងបានបញ្ជាក់ថា កម្លាំងអន្តរាគមន៍បង្ការបង្ក្រាបនៃការិយាល័យព្រហ្មទណ្ឌកំរិតស្រាល បានចំបង្ក្រាបទីតាំងល្បែងបញ្ជល់មាន់នេះ ក្រោមការបញ្ជាផ្ទាល់ពីលោកស្នងការខេត្ត បន្ទាប់ពីទទូលបានព័ត៌មាននៃអំពើល្មើសច្បាប់នេះពីប្រជាពលរដ្ឋ។
មន្ត្រីជំនាញបាននិយាយថា ក្រុមអ្នកជល់មាន់ទាំងនោះ ហាក់មិនបានទម្លាយឲ្យដឹងថា តើនរណាជាម្ចាស់សង្វៀនបញ្ជល់មាន់នេះទេ ? ប៉ុន្តែពួកគេគ្រាន់តែនិយាយថា ពួកគេបានណាត់គ្នាយកមាន់ទៅជល់នៅទីនោះ ដោយគ្មាននរណាម្នាក់ជាម្ចាស់ចង្វៀនទេ ។ ដោយឡែក បើតាមប្រភពពីអ្នកលែងល្បែងនេះដែរ បានបង្ហើបឲ្យដឹងថា គ្រប់សង្វៀនជល់មាន់ទាំងអស់ សុទ្ធតែមានអ្នកទទូលខុសត្រូវ បើមិនដូច្នេះទេ មិនអាចដំណើរការបានឡើយ ។ ប្រភពដដែលបានបញ្ជាក់ថា សង្វៀនខាងលើមនេះ ក៏មានអ្នកទទូលខុសត្រូវដែរ តែពួកគេមិនអាចទម្លាយឈ្មោះម្ចាស់សង្វៀនប្រាប់សមត្ថកិច្ចឡើយ ព្រោះនេះជាលក្ខខណ្ឌ របស់ក្រុមអ្នកលេងល្បែងដែលគ្មានច្បាប់អនុញ្ញាត ។
មានការកត់សម្គាល់ដែរចំពោះបនល្បែងស៊ីសងនានា នៅក្នុងខេត្តបាត់ដំបង ហាក់កំពុងកើតមានស្ទើរគ្រប់ទីកន្លែងមិនថា នៅតាមបណ្ដាស្រុកនានា ឬនៅក្នុងក្រុងបាត់ដំបងនោះទេ។ ល្បែងស៊ីសងដែលកំពុងលេចធ្លោជាងគេនាសព្វថ្ងៃនេះ គឺ«ល្បែងឆ្នោត» ខណៈដែលកម្លាំងសមត្ថកិច្ច និងអាជ្ញាធរ ស្ទើរគ្រប់ជាន់ថ្នាក់ ហាក់មិនខ្វាយខ្វល់ទាល់តែសោះ ។ ទីតាំងកត់កន្ទុយលេខទាំងនោះ ភាគច្រើនត្រូវគេសង្ស័យថា សុទ្ធតែមានខ្នងបង្អែក ហើយជាប់សាច់ញាតិមន្ត្រីមានអំណាច និងសមត្ថកិច្ចនៅក្នុងខេត្តទៀតផង ហេតុនេះហើយ ទើបទាំងអាជ្ញាធរ ទាំងសមត្ថកិច្ច មិនអើពើនឹងការទប់ស្កាត់ឬចុះបង្ក្រាប បណ្ដែតបណ្ដោយឲ្យមានល្បែងស៊ីសងប្រព្រឹត្តយ៉ាងអាណាធិបតេយ្យ ប្រណាំងប្រជែងគ្នា ជាមួយនិងបទល្មើស «អំពើរចោរកម្ម និង គ្រឿងញៀន»។
ពាក់ព័ន្ធនឹងការបង្ក្រាបទីតាំងបញ្ជល់មាន់ខាងលើនេះ លោកជេត វណ្ណនី ស្នងការរងខេត្ត បានមានប្រសាសន៍នៅក្នុងរបាយការណ៍ថា ពេលនេះមន្ត្រីការិយាល័យជំនាញ កំពុងសួរនាំក្រុមអ្នកញៀនល្បែងទាំងនោះ ដើម្បីចាត់ការតាមនីតិវិធីហើយ។ ប៉ុន្តែនីតិវិធីគេមិនទាន់ច្បាស់ តើត្រូវកសាងសំណុំរឿងបញ្ជូនទភតុលាការឬយ៉ាងណានោះទេ ព្រោះរង់ចាំគោលការណ៍លោកស្នងការខេត្ត ។
ចែករំលែកព័តមាននេះ