ប្រទេសចិន ៖ ប្រមុខអង្គការសុខភាពពិភពលោក WHO បានប្រកាសអាសន្នថា ពិភពលោកកំពុងតែប្រឈមមុខនឹងការខ្វះម៉ាស់ និងឧបករណ៍ការពារនានា ប្រឆាំងវីរុសកូរ៉ូណាថ្មី។
ការឆ្លងរាលដាលនៃជំងឺនេះ បានញ៉ាំងរួចហើយឲ្យក្រសួងការបរទេសចិនស្នើដល់សហគមន៍អន្តរជាតិឲ្យជួយផ្ដល់ជំនួយខាងវេជ្ចសាស្ត្រ។ ក្រុមហ៊ុនអេឡិចត្រូនិកយក្សតៃវ៉ាន់ FOXCONNនឹងចាប់ផ្ដើមផលិតម៉ាស រួមជាមួយបណ្ដាផលិតផល APPEL ក្នុងរោងចក្ររបស់ខ្លួន នៅក្រុងសេនហ្សេនចិនដីគោក។
ចំណែកសហរដ្ឋអាមេរិកបានផ្ដល់ប្រាក់១០០លានដុល្លារសម្រាប់ជួយចិននិងប្រទេសដទៃទៀតៗដែលរងការប៉ះពាល់។
បណ្ដាវិធានការរិតត្បិតទប់ការឆ្លងរាលដាល ៖
សភាពការណ៍អាសន្នបានជំរុញក្រុងហុងកុងឲ្យចាត់បណ្ដាវិធានការម៉ឺងម៉ាត់ថែមទៀត ចាប់តាំងពីថ្ងៃទី៨ កុម្ភៈទៅ ដោយបណ្ដាមនុស្សមកពីចិនដីគោក ត្រូវដាក់ឲ្យនៅដាច់ពីគេក្នុងផ្ទះ ក្នុងសណ្ឋាគារ ឬនៅកន្លែងស្នាក់នៅឯទៀតៗរយៈពេល២សប្ដាហ៍។ បើរំលោភបំពានលើវិធានការនេះ នោះនឹងត្រូវមានទោសជាប់គុក៦ខែ។
វិធានការរិតត្បិតមិនឲ្យមនុស្សម្នាចេញក្រៅនៅតែប្រកាន់យក ដោយទីក្រុងចិនជាច្រើន។ ក្រុងសៀងហៃមានប្រជាជន២៤លាននាក់នាថ្ងៃទី៨កុម្ភៈ ក្លាយជាទីក្រុងចុងក្រោយគេមកទល់ពេលនេះ តម្រូវឲ្យពាក់ម៉ាសក្នុងទីកន្លែងសាធារណៈ។ ពេលចុះទៅកាន់ក្រុងវូហាននាសប្ដាហ៍កន្លងទៅ ឧបនាយករដ្ឋមន្ត្រីចិន លោកស្រីស៊ុនជុនឡាន បានបញ្ជាឲ្យអាជ្ញាធរមូលដ្ឋានប្រកាន់យកបណ្ដាវិធានការដូចពេលមានសង្គ្រាម ដើម្បីតាមរកប្រជាជនដែលឆ្លងវីរុស ដោយដើររ៉ាស់តាមសង្កាត់នានា។
អគ្គលេខាធិការអ.ស.បលោក ANTONIO GUTERRES វាយតម្លៃកាលពីថ្ងៃទី៨ កុម្ភៈថា ច្បាស់ណាស់ចិន បានធ្វើការខិតខំប្រឹងប្រែងដ៏ធំធេង ដើម្បីទប់ជំងឺនោះនិងចៀសវាងការឆ្លងរាលដាល។ ខ្ញុំគិតថាការខិតខំប្រឹងប្រែងនេះពិតជាគួរឲ្យកត់សម្គាល់។
ប្រទេសជាច្រើនបានពង្រឺងបណ្ដាវិធានការរិតត្បិត ប្រឆាំងបណ្ដាមនុស្សដែលមកពីចិន ហើយណែនាំកុំឲ្យធ្វើដំណើរទៅកាន់ប្រទេសនោះ។ បារាំងបានចាត់វិធានបែបនេះនាថ្ងៃទី៨កុម្ភៈ។ រីឯក្រុមហ៊ុនអាកាសចរណ៍អន្តរជាតិភាគច្រើន បានកាត់ផ្ដាច់ការហោះហើររបស់ពួកគេទៅកាន់ចិនដីគោក។ ទន្ទឹមនឹងនេះអ្នកដំណើរ និងសមាជិកក្រុមនាវិកច្រើនពាន់នាក់ នៅតែជាប់ក្នុងនាវាកម្សាន្ត២គ្រឿងនៅអាស៊ី។
នៅជប៉ុនចំនួនមនុស្សឆ្លងវីរុសលើនាវាកម្សាន្ត DIAMOND PRINCESS បន្តកើនឡើងដោយនាថ្ងៃទី៨កុម្ភៈមានដល់៦៤នាក់ ក្នុងនោះម្នាក់ស្ថិតក្នុងស្ថានភាពធ្ងន់ធ្ងរ។ នៅហុងកុងមនុស្ស៣៦០០នាក់ក៏ទទួលរងនូវវាសនាដូចគ្នា ហាមមិនឲ្យចេះក្រៅពីនាវាកម្សាន្ត WOLD DREAM ដែលអតីតអ្នកដំណើរ៨នាក់នៃនាវានេះមានឆ្លងវីរុស ពេលឈប់សំចតនៅទីនោះ ។
សង្ស័យខ្លាំងលើសត្វពង្រូលចម្លងវីរុស ៖
ហេតុអីក៏សត្វពង្រូលក្លាយជាការសង្ស័យខ្លាំង ចំពោះការចម្លងវីរុសកូរ៉ូណាថ្មីមកមនុស្ស? បណ្ដាអ្នកវិទ្យាសាស្ត្រចិនកំណត់ថា វាមានលទ្ធភាពដែលពពួកសត្វពង្រូល ជាស្ពានចម្លងវីរុសមកមនុស្ស។ ការអះអាងបែបនេះត្រូវបានគូសបញ្ជាក់ កាលពីថ្ងៃទី៧កុម្ភៈដោយសាកលវិទ្យាល័យកសិកម្មចិនក្នុងសេចក្ដីប្រកាសមួយ។ ទោះយ៉ាងណាបណ្ដាអ្នកស្រាវជ្រាវ ស្នើឲ្យមានការប្រុងប្រយ័ត្ន។
អ្នកវិទ្យាសាស្ត្រជឿជាក់ថា វីរុសនេះអាចមានប្រភពពីប្រជៀវតែប្រជៀវពុំមានលទ្ធភាព ចម្លងមកមនុស្សបាន ដូច្នេះត្រូវឆ្លងកាត់តាមសត្វមួយប្រភេទទៀត ដែលអាចធ្វើស្ពាននោះគឺសត្វពង្រូល៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ