រាជធានីភ្នំពេញ ៖ រថយន្តដឹកឈើម៉ាកកាមរី ពណ៌ខ្មៅ ពាក់ស្លាកលេខ ច-៥២១៥ ភព២ មួយគ្រឿង បានបើកបោះពួយបុកគ្នាជាមួយរថយន្តស្ទូចរបស់ប៉ូលិសចរាចរ បណ្តាលឱ្យស្លាប់អ្នកបើកបររថយន្តដឹកឈើម្នាក់ដោយសារឈើខ្ទាតមកបុកពីក្រោយបន្ថែមកៀបជាប់ជាមួយចង្កូតរថយន្ត កាលពីវេលាម៉ោង១០យប់ថ្ងៃទី២០ មីនា ២០១១ នៅលើកំណាត់ផ្លូវលេខ៥៩៨ មុខស្នងការដ្ឋានរាជធានីភ្នំពេញ ស្ថិតក្នុងសង្កាត់ច្រាំងចំរេះ២ ខណ្ឌឫស្សីកែវ ។
អ្នកបើកបររថយន្តដឹកឈើដែលស្លាប់ឈ្មោះភួង សុខគា ភេទប្រុស អាយុ២៣ឆ្នាំ មានទីលំនៅភូមិទី៤ ឃុំកំពុងហ្លួង ស្រុកក្រគរ ខេត្តពោធិ៍សាត់ បានស្លាប់ក្នុងរថយន្ត ។ តាមសាក្សីដែលឃើញហេតុការណ៍បានឱ្យដឹងថា មុនពេលកើតហេតុ រថយន្តដឹកឈើបានបើកចូលក្រុងតាមផ្លូវលេខ៥៩៨ ដោយមានសមត្ថកិច្ចដេញពីក្រោយ។ មកដល់ចំណុចមុខស្នងការដ្ឋានរាជធានីភ្នំពេញ រថយន្តដឹកឈើក៏បានបុករថយន្តស្ទូចរបស់ប៉ូលិសចរាចរពេញទំហឹងបណ្តាលឱ្យរងការខូចខាតធ្ងន់ធ្ងរ ហើយអ្នកបើកបររថយន្តដឹកឈើត្រូវឈើខាងក្នុងរថយន្តខ្ទាតមកបុកបន្ថែម និងកៀបជាប់ស្លាប់នៅក្នុងរថយន្តតែ
ម្តង ។ រីឯអ្នកបើកបររថយន្តស្ទូចរបស់ប៉ូលិសចរាចរក្រុងរងរបួសផងដែរ ។ រថយន្តទាំង២ត្រូវសមត្ថកិច្ចស្ទូចយកទៅកាន់ការិយាល័យប៉ូលិសចរាចរជើងគោកនៃស្នងការដ្ឋានរាជធានីភ្នំពេញ ដើម្បីចាត់ការតាមច្បាប់ ៕
ចែករំលែកព័តមាននេះ