រាជធានីភ្នំពេញ ៖ ជនសង្ស័យចំនួន២នាក់បានធ្វើសកម្មភាពឆក់ទូរស័ព្ទដៃពីស្ត្រីម្នាក់ដែលកំពុងជិះម៉ូតូតាមផ្លូវបានសម្រេចត្រង់ចំណុចខាងក្រោមផ្សារទំនើបមួយកន្លែង តាមបណ្ដោយផ្លូវបេតុង ស្ថិតក្នុងសង្កាត់អូបែកក្អម ខណ្ឌសែនសុខ។ បន្ទាប់មកជនសង្ស័យព្យាយាមជិះម៉ូតូគេចខ្លួន ប៉ុន្តែត្រូវប្រជាពលរដ្ឋជិះដេញតាមចាប់បានភ្លាមៗត្រង់ចំណុចខាងមុខផ្ទះសំណាក់ក្អមមាស តាមបណ្ដោយផ្លូវបេតុង ភូមិអ័រគីដេ សង្កាត់អូរបែកក្អម ខណ្ឌសែនសុខ បង្កឲ្យមានការភ្ញាក់ផ្អើលកាលពីវេលាម៉ោង៨និង១០នាទីយប់ថ្ងៃទី៥ ខែកុម្ភៈ ឆ្នាំ២០២០។
តាមប្រភពពីសមត្ថកិច្ចមូលដ្ឋានបានរៀបរាប់ប្រាប់ឲ្យដឹងថា ជនសង្ស័យទាំង២នាក់ខាងលើ ក្នុងនោះម្នាក់ឈ្មោះ សេច វុទ្ធី ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ និងម្នាក់ទៀតឈ្មោះ ព្រុំ សា ភេទប្រុស អាយុ១៧ឆ្នាំ ជាកម្មករសំណង់ ស្នាក់នៅក្នុងការដ្ឋានសំណង់ សង្កាត់ស្ទឹងមានជ័យទី៣ ខណ្ឌមានជ័យ។ ចំណែកស្ត្រីរងគ្រោះមិនស្គាល់អត្តសញ្ញាណនោះទេ ។
តាមប្រភពដដែលបានបន្តថា នៅមុនពេលកើតហេតុ ក្រុមជនសង្ស័យខាងលើបានជិះម៉ូតូមួយគ្រឿងម៉ាកហុងដាវ៉េវ ពណ៌ខ្មៅលាយក្រហម ធ្វើដំណើរតាមបណ្ដោយបេតុង ក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែជនសង្ស័យឈ្មោះ សេច វុទ្ធី ដែលជាអ្នកបើកបរម៉ូតូក៏បានធ្វើសកម្មភាពឆក់ទូរស័ព្ទដៃមួយគ្រឿងមិនចាំម៉ាកពីស្ត្រីមិនស្គាល់អត្តសញ្ញាណម្នាក់ដែលកំពុងបើកបរម៉ូតូមួយគ្រឿងមិនចាំម៉ាក កំពុងធ្វើដំណើរក្នុងទិសដៅស្របទិសគ្នាបានសម្រេច។
តាមប្រភពដដែលបានបន្តទៀតថា បន្ទាប់មកក្រុមជនសង្ស័យក៏បានបន្ថែមល្បឿនបើក គេចខ្លួនចេញពីកន្លែងកើតហេតុ ភ្លាមៗនោះក៏មានប្រជាពលរដ្ឋដែលឃើញហេតុការណ៍នាំគ្នាជួយដេញតាមពីក្រោយរហូតទៅដល់ខាងមុខផ្ទះសំណាក់ក្អមមាសខាងលើ ក៏ត្រូវការប្រជាពលរដ្ឋធ្វើការស្ទាក់ចាប់បាននិងប្រគល់មកឲ្យសមត្ថកិច្ចមូលដ្ឋានតែម្តង។
នៅចំពោះមុខសមត្ថកិច្ច ជនសង្ស័យឈ្មោះ សេច វុទ្ធី បានឆ្លើយសារភាពថា ខ្លួនពិតជាបានធ្វើសកម្មភាពឆក់ទូរស័ព្ទដៃពីស្ត្រីម្នាក់ខាងលើពិតប្រាកដមែន ប៉ុន្ដែខ្លួនមិនបានមើលទូរស័ព្ទនោះថាជាដៃម៉ាកអ្វីនោះទេ ដោយសារភ័យស្លន់ស្លោខ្លាំងពេក ខណៈពេលខ្លួនជិះរត់គេចខ្លួនទៅដល់ម្តុំស្តុបណូគាក៏បានរបូតជ្រុះទូរស័ព្ទដែលធ្វើសកម្មភាពឆក់បានសម្រេចចេញពីដៃរបស់ខ្លួនបាត់ទៅហើយ។ ជនសង្ស័យបានបន្តទៀតថា កាលពី៣ថ្ងៃមុន ខ្លួនក៏បានធ្វើសកម្មភាពឆក់ទូរស័ព្ទដៃមួយគ្រឿងពីលោកយាយម្នាក់បានសម្រេចផងដែរ ខណៈពេលលោកយាយរងគ្រោះកំពុងបណ្ដើរកង់តាមដងផ្លូវនៅស្តុបលូ៥ ។
ដោយឡែកជនសង្ស័យឈ្មោះ ព្រុំ សា ដែលជាអ្នករួមដំណើរបានឆ្លើយបដិសេធថា ខ្លួនមិនបានរួមគំនិតជាមួយជនសង្ស័យខាងលើនោះទេ គឺមុនពេលកើតហេតុ ជនសង្ស័យខាងលើបានបបួលរូបគេមករាំលេងកម្សាន្តនៅក្លឹប ផ្លេយ៍ តែមិននឹកស្មានថា ជនសង្ស័យបែរជា ធ្វើសកម្មភាពឆក់ទូរស័ព្ទដៃរបស់គេយ៉ាងដូច្នេះសោះ។
ក្រោយពេលកើតហេតុ ជនសង្ស័យទាំង២នាក់រួមជាមួយវត្ថុតាងត្រូវបានសមត្ថកិច្ចនាំយកទៅធ្វើការសាកសួរនៅប៉ុស្តិ៍នគរបាលរដ្ឋបាលអូរបែកក្អមដើម្បីកសាងសំណុំរឿងបញ្ជូនអធិការដ្ឋាននគរបាលខណ្ឌសែនសុខដើម្បីចាត់ការតាមនីតិវិធី ។ ដោយឡែកស្ត្រីរងគ្រោះ មិនបានមកដាក់ពាក្យបណ្តឹងអ្វីនោះទេ ចំណែកឯទូរស័ព្ទដៃរបស់ជនរងគ្រោះក៏រកមិនឃើញផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ