ខេត្តព្រះវិហារ ៖ ជនសង្ស័យជាមេខ្លោង និងបក្សពួក៥នាក់ ត្រូវបានចាប់ខ្លួនពីបទជួញដូរវត្ថុបុរាណល្មើសច្បាប់ ដោយមន្ត្រីនៃមន្ទីរវប្បធម៌និងវិចិត្រសិល្បៈខេត្ត សហការជាមួយកម្លាំងកងរាជអាវុធហត្ថខេត្តចុះបង្ក្រាប និងឃាត់ខ្លួន ព្រមទាំងដកហូតវត្ថុតាងបទល្មើសមួយចំនួន ។ប្រតិបត្តិការនោះបានធ្វើឡើងកាលពីថ្ងៃទី៤…
ខេត្តព្រះវិហារ ៖ ជនសង្ស័យជាមេខ្លោង និងបក្សពួក៥នាក់ ត្រូវបានចាប់ខ្លួនពីបទជួញដូរវត្ថុបុរាណល្មើសច្បាប់ ដោយមន្ត្រីនៃមន្ទីរវប្បធម៌និងវិចិត្រសិល្បៈខេត្ត សហការជាមួយកម្លាំងកងរាជអាវុធហត្ថខេត្តចុះបង្ក្រាប និងឃាត់ខ្លួន ព្រមទាំងដកហូតវត្ថុតាងបទល្មើសមួយចំនួន ។ប្រតិបត្តិការនោះបានធ្វើឡើងកាលពីថ្ងៃទី៤ កុម្ភៈ ឆ្នាំ២០២០ នៅចំណុចប្រាសាទខ្នារ ស្ថិតក្នុងភូមិក្រឡាពាស ឃុំព្រីងធំ ស្រុកជាំក្សាន្តដឹកនាំបញ្ជា ដោយមេបញ្ជាការរងកងរាជអាវុធហត្ថខេត្ត លោក ឆេង ហៀត និងមន្ត្រីអាវុធហត្ថខេត្ត១៥នាក់ ។
មន្ត្រីអាវុធហត្ថខេត្តបានប្រាប់ឲ្យដឹងថា នៅថ្ងៃទី៤ កុម្ភៈ ក្រោយពីទទួលបានដំណឹងថា មានជនខិលខូចមួយក្រុមបាននិងកំពុងធ្វើសកម្មភាព ប្រើឧបករណ៍រាវរកវត្ថុបុរាណ ដែលកប់ក្នុងដីរាប់សិបឆ្នាំមកហើយនោះ ដើម្បីជីកគាស់កកាយយកវត្ថុបុរាណ នាំយកទៅធ្វើការជួញដូរដោយខុសច្បាប់នោះមក ប្រធានមន្ទីរវប្បធម៌ និងវិចិត្រសិល្បៈខេត្ត រួមជាមួយមន្ត្រី និងមន្ត្រីកិច្ចសន្យាខេត្ត បានសហការជាមួយកម្លាំងកងរាជអាវុធហត្ថខេត្តបានទៅកាន់ទីតាំងដែលជនសង្ស័យកំពុងប្រព្រឹត្តបទល្មើស ។
មន្ត្រីដដែលបានបន្តទៀតថា នៅក្នុងប្រតិបត្តិការនោះ កម្លាំងសមត្ថកិច្ចបានឈានទៅឃាត់ខ្លួនជនសង្ស័យ ជាមេខ្លោង និងបក្សពួកបាន៥នាក់ ៖
១-ឈ្មោះ ហេង ប៊ុនសុខុន ភេទប្រុស អាយុ៣៧ឆ្នាំ រស់នៅភូមិតាវៀន ឃុំសាលាកំរើក ក្រុងសៀមរាប ជាថៅកែ ដកហូតបានវត្ថុតាង រូបលោហៈ ។
២- ឈ្មោះ ប៊ុន សាន ភេទប្រុស អាយុ៤៥ឆ្នាំ ជាមេប៉ុស្តិ៍នគរបាល រដ្ឋបាលឃុំព្រីងធំ ។
៣-ឈ្មោះ សៀក សុភ័ក្រ ភេទប្រុស អាយុ៥៤ឆ្នាំ ។
៤- ឈ្មោះ ង៉ែត តៃ ភេទប្រុស អាយុ៥៤ឆ្នាំ ។
៥-ឈ្មោះ ព្រលាន ព្លឿង ភេទប្រុស អាយុ៥៤ឆ្នាំ ។ ជនសង្ស័យទាំង៣នាក់ (ទី៣-៤-៥)ជាកសិករ រស់នៅភូមិគោកព្រិច ឃុំគោករមៀត ស្រុកពួក ខេត្តបន្ទាយមានជ័យ ។
លោកបានបញ្ជាក់ថា ក្រោយការឃាត់ខ្លួនជនសង្ស័យទាំង៥នាក់ សមត្ថកិច្ចបានដកហូតឧបករណ៍រាវរកវត្ថុបុរាណ២គ្រឿង នៅខាងត្បូងប្រាសាទខ្នារប្រមាណ១០០ម៉ែត្រ ដកហូតរថយន្ត ដែលជាមធ្យោបាយបម្រើឲ្យការធ្វើសកម្មភាពប្រព្រឹត្តបទល្មើសចំនួន២គ្រឿងថែមទៀត ។ក្រោយការឃាត់ខ្លួនជនសង្ស័យជួញដូរវត្ថុបុរាណទាំង៥នាក់រួមទាំងវត្ថុតាងនោះរួច ប្រធានមន្ទីរវប្បធម៌និងវិចិត្រសិល្បៈខេត្តព្រះវិហារ បានធ្វើកំណត់ហេតុផ្ទេរប្រគល់ជនសង្ស័យ និងវត្ថុតាងទៅឱ្យកម្លាំងកងរាជអាវុធហត្ថខេត្ត ដើម្បីកសាងសំណុំរឿងបញ្ជូនទៅកាន់សាលាដំបូងខេត្តចាត់ការទៅតាមនីតិវិធី ៕
ចែករំលែកព័តមាននេះ