រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា ការដែលទស្សនៈកិច្ចនៅចិនខណៈដែលចិនកំពុងផ្ទុះជំងឺរលាកផ្លូវដង្ហើមកូរ៉ូណាបង្ហាញថា កម្ពុជា-ចិន កាន់តែខិតជិតគ្នា ។…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា ការដែលទស្សនៈកិច្ចនៅចិនខណៈដែលចិនកំពុងផ្ទុះជំងឺរលាកផ្លូវដង្ហើមកូរ៉ូណាបង្ហាញថា កម្ពុជា-ចិន កាន់តែខិតជិតគ្នា ។ សម្តេចតេជោបានសរសេរលើបណ្តាញសង្គម នៅថ្ងៃទី០៧ កុម្ភៈនេះ យ៉ាងដូច្នេះថា សុខសប្បាយជាទេបងប្អូនជនរួមជាតិ ថ្ងៃនេះខ្ញុំត្រូវដឹកនាំកិច្ចប្រជុំពេញអង្គគណៈរដ្ឋមន្ត្រីនៅម៉ោង៨និង៣០បន្តិចទៀតនេះ ។
សម្តេចក៏បានបន្តថា ខ្ញុំសូមជម្រាបបងប្អូនផងដែរ អំពីសុខភាពរបស់ខ្ញុំ គឺនៅល្អរឹងមាំដូចធម្មតា ។ សម្តេចក៏សូមអរគុណបងប្អូនដែលមានការព្រួយបារម្ភអំពីសុខភាពសម្តេច និងបានជូនពរខ្ញុំក្នុងពេលបំពេញបេសកកម្មការងារនៅកូរ៉េ និងនៅប៉េកាំង ប្រទេសចិន កាលពីថ្ងៃទី០៣ ដល់ថ្ងៃទី០៥ កុម្ភៈ កន្លងមកនេះ ។
សម្តេចបញ្ជាក់ថា៖«ច្បាស់ណាស់ កម្ពុជា គឺនៅកាន់តែជិតជាមួយមិត្តចិន ជាពិសេសក្នុងកាលៈទេសៈដ៏លំបាកនេះព្រោះថា មិត្តល្អមិនបោះបង់ចោលគ្នាក្នុងគ្រាអាសន្ន» ។ ជាមួយគ្នានោះដែរ សម្តេចតេជោក៏សូមជូនពរបងប្អូនជនរួមជាតិ និងកូនក្មួយជួបតែសេចក្តីសុខ និងសំណាងល្អទាំងអស់គ្នា ។
សូមជម្រាបថា បន្ទាប់ចូលរួមកិច្ចកំពូលនៅកូរ៉េខាងត្បូង កាលពីថ្ងៃទី០៣ ដល់០៥ កុម្ភៈ សម្តេចបានទស្សនៈកិច្ចនៅប្រទេសចិន ខណៈសម្តេចបានជួបពិភាក្សាជាមួយនាយករដ្ឋមន្ត្រីចិន និងប្រធានាធិបតីចិន ដោយបានពិភាក្សាអំពីជំងឺកូរ៉ូណាដែលកើតចេញពីទីក្រុងវូហានប្រទេសចិន ៕
ចែករំលែកព័តមាននេះ