ខេត្តស្វាយរៀង ៖ ចំការអំពៅស្ករចំនួន១១ហិកតា ត្រូវភ្លើងឆាបឆេះអស់គ្មានសល់ កើតឡើងកាលពីវេលាម៉ោង១០និង១៥នាទីយប់ថ្ងៃទី៣ កុម្ភៈ ស្ថិតនៅភួមិកំពោតម្រាក់ ឃុំពពែត ស្រុកស្វាយទាប ។ បើតាមមន្ត្រីនគបាលប៉ុស្តិរដ្ឋបាលឃុំពពែតបានឲ្យដឹងថា ករណីភ្លេីងឆេះអំពៅចំនួន១១ហិកតា គឺជាអំពៅរបស់ក្រុមហ៊ុនលោកុយសារ៉េន នៅភូមិពពែតឃុំពពែត ស្រុកស្វាយទាប ។
ប្រភពដដែលបន្តទៀតថា ករណីឆេះអំពៅអស់១១ហិកតានេះ បើតាមសមត្ថកិច្ចចុះទៅពិនិត្យស្រាវជ្រាវដាក់ការសន្និដ្ឋានថា សង្ស័យមានជនមិនស្គាល់អត្តសញ្ញាណជាអ្នកលួចដុត។ ទោះបីជាយ៉ាងណាក៏ដោយករណីជនអគតិលួចដុតចំការអំពៅ គឺកើតឡើងរាល់ឆ្នាំទៅហើយ ហើយក៏មិនដែលចាប់បានជនសង្ស័យណាម្នាក់មកផ្តន្ទាទោសបានទេ ។
ប្រភពបន្តថា ជួនកាលម្ចាស់អំពៅចង់បានច្បាប់កាប់អំពៅនាំចេញទៅប្រទេសវៀតណាម គឺតែងតែមានករណីជនមិនស្គាល់អត្តសញ្ញាណលួចដុតអំពៅឆេះស្លឹកអំពៅអស់ រួចសុំច្បាប់កាប់បន្ទាន់កុំឲ្យអំពៅខូចគុណភាព ។ ក៏ប៉ុន្តែករណីគេលួចដុតអំពៅ១១ហិកតានេះ គឺឆេះអស់តែម្តង ដោយប៉ុន្មានខែនេះ មានកំដៅក្តៅខ្លាំង ធ្វើឲ្យអំពៅស្ងួតទឹកខ្លាំង ពេលមានអ្នកលួចដុតគឺឆេះអស់តែម្តង មិនអាចជួយពន្លត់បានពិតជាសោកស្តាយ ។
បច្ចុប្បន្ន សមត្ថកិច្ចកំពុងស្រាវជ្រាវរកជនលួចដុតអំពៅ ដើម្បីមកទទួលខុសត្រូវចំពោះមុខច្បាប់ ។
ចែករំលែកព័តមាននេះ