ក្នុងនាមជាអាជីវករដែលទើបតែចាប់ផ្តើមអាជីវកម្មផ្ទាល់ខ្លួនមួយ និងកំពុងតែព្យាយាមដឹកនាំអាជីវកម្មឲ្យដើរទៅមុខ វាពិតជាសំខាន់ណាស់ក្នុងការកាត់បន្ថយការចាយវាយទាំងក្នុងជីវិតផ្ទាល់ខ្លួន និងក្នុងការប្រកបការងារ ។ ហើយវិធីខាងក្រោមនេះជាវិធីងាយៗដែលអាចជួយឲ្យអាជីវករសន្សំថវិកាទុកសម្រាប់អាជីវកម្មខ្លួនបានដោយងាយ៖
១. កាត់បន្ថយការប្រើប្រាស់អគ្គិសនី៖
ថ្លៃអគ្គិសនីក្នុងអាជីវកម្ម គឺពិតជាខ្ពស់ណាស់សម្រាប់អាជីវករ ជាពិសេសក្នុងរដូវប្រាំងដែលតម្រូវឲ្យមានការប្រើប្រាស់អគ្គិសនីច្រើន ។ ព្រោះតែអាកាសធាតុក្នុងប្រទេសកម្ពុជាមិនអាចឲ្យមនុស្សឈប់ប្រើប្រាស់កង្ហារ ឬម៉ាស៊ីនត្រជាក់បានទាំងស្រុង អ្នកអាចកាត់បន្ថយអគ្គិសនីបានដោយប្តូរអំពូលទៅប្រើប្រាស់អំពូលបែប LED វិញជាដើម ។
២. ឆុងកាហ្វេដោយខ្លួនឯង៖
ប្រសិនបើអ្នកទិញកាហ្វេប្រេនៗអស់ប្រមាណ ៤ដុល្លារក្នុងមួយថ្ងៃ និងអ្នកធ្វើការ ៥ថ្ងៃក្នុងមួយសប្តាហ៍នោះ អ្នកប្រហែលជាត្រូវចំណាយយ៉ាងតិចណាស់ក៏ ៨០ដុល្លារក្នុងមួយខែដែរគ្រាន់តែលើកាហ្វេមួយកែវ ។ ជាក់ស្តែងអ្នកមិនចាំបាច់បោះបង់ចោលកាហ្វេទាំងស្រុងទេ តែអ្នកអាចរកកាហ្វេជំនួសវិញបាន ហើយគ្មានអ្វីដែលមានតម្លៃទាបជាងកាហ្វេដែលឆុងខ្លួនឯងឡើយ ។
៣. ពិសាទឹកឲ្យបានច្រើន៖
ក្នុងមួយថ្ងៃតើអ្នកទទួលទានភេសជ្ជៈខុសៗគ្នាប៉ុន្មានកែវ ? មិនថាជាកាហ្វេ សូដា ឬភេសជ្ជៈប៉ូវកម្លាំងទេ វាសុទ្ធតែតម្រូវឲ្យអ្នកចាយវាយជារៀងរាល់ថ្ងៃ ។ ដូច្នេះជម្រើសល្អ និងងាយស្រួលមួយដែលអ្នកអាចកាត់បន្ថយការចាយវាយបានគឺចាប់ផ្តើមជំនួសភេសជ្ជៈទាំងនោះជាមួយនឹងទឹកវិញ ។
៤. ថែរក្សាធ្មេញរបស់អ្នកឲ្យបានល្អ៖
ពេលខ្លះការពារ គឺប្រសើរជាងព្យាបាល ហើយវាពិតជាត្រឹមត្រូវណាស់បើនិយាយពីសុខភាពធ្មេញ ។ អ្នកមិនដឹងទេថាពេលណាដែលអ្នកត្រូវទៅរកវេជ្ជបណ្ឌិតដើម្បីជួសជុលធ្មេញដែលពុកផុយ ។ ដូច្នេះវិធីដែលងាយស្រួលជាងគេគឺមើលថែធ្មេញរបស់អ្នកឲ្យបានដិតដល់ និងលាងសម្អាតវាឲ្យបានស្អាតជារៀងរាល់ថ្ងៃ ៕ កែសម្រួលដោយ ៖ សុឃាក់
ចែករំលែកព័តមាននេះ