សហរដ្ឋអាមេរិក ៖ ប្រធានសភាអាមេរិកជាអ្នកប្រជាធិបតេយ្យ លោកស្រីណានស៊ីពីឡូស៊ី កាលពីថ្ងៃទី៤ ខែកុម្ភៈ ឆ្នាំ២០២០ បានសម្ដែងកាយវិការគួរឲ្យភ្ញាក់ផ្អើល បង្ហាញពីការមិនស៊ីខ្សែគ្នាខ្លាំងបំផុតជាមួយលោកដូណាល់ ត្រាំ…
សហរដ្ឋអាមេរិក ៖ ប្រធានសភាអាមេរិកជាអ្នកប្រជាធិបតេយ្យ លោកស្រីណានស៊ីពីឡូស៊ី កាលពីថ្ងៃទី៤ ខែកុម្ភៈ ឆ្នាំ២០២០ បានសម្ដែងកាយវិការគួរឲ្យភ្ញាក់ផ្អើល បង្ហាញពីការមិនស៊ីខ្សែគ្នាខ្លាំងបំផុតជាមួយលោកដូណាល់ ត្រាំ ដោយហែកសុន្ទរកថាជាច្បាប់ចម្លង ដែលប្រធានាធិបតីអាមេរិកថ្លែងនៅមុខសភាចោល។
មុននេះបន្តិច លោកត្រាំបានដាក់សុន្ទរកថាច្បាប់ចម្លងមួយ មុខលោកស្រីណានស៊ី ដោយមិនខ្ចីចាប់ដៃ និងមើលមុខផង។ នោះតាមពិតវាជាកាយវិការគួរសមមួយសម្រាប់អ្នកនយោបាយ ទោះជាមិនស៊ីខ្សែគ្នាក្ដី។ ខណៈប្រធានាធិបតីអាមេរិកទើបបញ្ចប់សុន្ទរកថាជាប្រពៃណីស្ដីពិសភាពសហព័ន្ធ លោកស្រីណានស៊ី ដែលតាមប្រពៃណីឈរនៅក្រោយលោកត្រាំក្បែរអនុប្រធានាធិបតី លោក MIKE PENCE បានយកសុន្ទរកថានោះដែលដាក់នៅមុខលោកស្រី ហើយក៏ហែកចោលក្នុងកាយវិការគួរឲ្យភ្ញាក់ផ្អើលមួយ។
ចេញពីសភាពេលអ្នកកាសែតម្នាក់សួរថា ហេតុអីបានជាលោកស្រីធ្វើដូច្នេះ លោកស្រីឆ្លើយថា ព្រោះនោះជារឿងគួរសមបំផុតហើយដែលត្រូវធ្វើ បើប្រៀបធៀបទៅនឹងអ្វីដែលគេធ្វើដាក់លោកស្រី។
តាមTWITTER ដែលលោកស្រីបង្ហាញថា លោកស្រីអន់ចិត្តខ្លាំងបំផុត លោកស្រីអះអាងថា ពួកអ្នកប្រជាធិបតេយ្យតែងស្វែងរកជានិច្ច ការសម្របសម្រួលនានាប៉ុន្តែពួកគេមិនលែងដៃឡើយ ចំពោះបណ្ដាបញ្ហាដែលពួកគេផ្ដោត។
សេតវិមានបានបញ្ចេញប្រតិកម្មដោយបរិហារថា លោកស្រីណានស៊ីធ្វើបែបនេះ ជានិមិត្តរូបនៃការហែកចោលរូបអតីតយុទ្ធជនសង្គ្រាមលោកលើកទី២ម្នាក់ ឬរូបកូនង៉ែតម្នាក់ដែលនៅរស់ក្រោយកើតមិនគ្រប់ខែ ដោយនៅក្នុងផ្ទៃពោះម្ដាយបានត្រឹម២១សប្ដាហ៍ ឬហែករូបគ្រួសារនាងកាអ៊ីឡាមូអែលល័រ ដែលត្រូវពួកជីហាដ ផ្តាច់ជីវិត៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ