រាជធានីភ្នំពេញ ៖ សហរដ្ឋអាមេរិកបានបង្ហាញជំហរច្បាស់ថាមិនលូកដៃចូលអធិបតេយ្យរបស់កម្ពុជាទេ និងចាត់ទុកកម្ពុជាគឺជាដៃគូសន្ទនាយ៉ាងសំខាន់ ។ នេះបើតាមលោកទូតអាមេរិកប្រចាំនៅកម្ពុជា ។លោកកែវ ពិសិដ្ឋ នាយកខុទ្ទកាល័យ និងជាអ្នកនាំពាក្យសម្តេចអគ្គមហាពញាចក្រីហេង…
រាជធានីភ្នំពេញ ៖ សហរដ្ឋអាមេរិកបានបង្ហាញជំហរច្បាស់ថាមិនលូកដៃចូលអធិបតេយ្យរបស់កម្ពុជាទេ និងចាត់ទុកកម្ពុជាគឺជាដៃគូសន្ទនាយ៉ាងសំខាន់ ។ នេះបើតាមលោកទូតអាមេរិកប្រចាំនៅកម្ពុជា ។លោកកែវ ពិសិដ្ឋ នាយកខុទ្ទកាល័យ និងជាអ្នកនាំពាក្យសម្តេចអគ្គមហាពញាចក្រីហេង សំរិន ប្រធានរដ្ឋសភាបានស្រង់សម្តីលោកទូតអាមេរិកក្រោយជំនួបពិភាក្សាការងាររវាងសម្តេចប្រធានរដ្ឋសភា ជាមួយ លោក ប៉ាទ្រីក ម័រហ្វី (H.E Mr.W.Patrick Murphy) ឯកអគ្គរដ្ឋទូតនៃសហរដ្ឋអាមេរិកប្រចាំនៅកម្ពុជានាព្រឹកថ្ងៃទី៤ ខែកុម្ភៈ ឆ្នាំ២០២០ នៅវិមានរដ្ឋសភាថា ក្នុងជំនួបលោកទូតថាកម្ពុជា និងអាមេរិកមានចំណុចដូចគ្នាច្រើន ក្នុងនោះមានច្បាប់រដ្ឋធម្មនុញ្ញ ដែលផ្តល់តម្លៃខ្ពស់ក្នុងលទ្ធិប្រជាធិបតេយ្យ ។
សម្តេចប្រធាន រដ្ឋសភាបានចូលរួមចំណែកច្រើនក្នុងប្រទេសកម្ពុជា និងជាអ្នកនយោបាយដែលមានបទពិសោធន៍អស់ជាង៣ទសវត្សរ៍មកហើយនៅកម្ពុជា ។ លោកបញ្ជាក់ថា៖«ក្នុងនាមជាអ្នកការទូតមានវិជ្ជាជីវៈ ហើយបេសកកម្មខ្ញុំនៅកម្ពុជានេះគឺដើម្បីលើកកម្ពស់នូវទំនាក់ទំនង និងកិច្ចសហប្រតិបត្តិការរវាងកម្ពុជា និងអាមេរិកឲ្យកាន់តែប្រសើរនិងល្អឡើង» ។
លោកទូតបន្តថា កាលជំនួបជាមួយសម្តេចតេជោហ៊ុន សែន បានពិភាក្សាពីទំនាក់ទំនង កិច្ចសហប្រតិបត្តិ ការទ្វេភាគីដែលជាមូលដ្ឋានគ្រឹះ ហើយក៏បានពិភាក្សាពីចំណុចណាដែលមិនទាន់ឯកភាពគ្នា ដើម្បីកែ សម្រួល និងស៊ីគ្នាផងដែរ ។ លោកទូតបានគូសបញ្ជាក់ថា កាលពីពេលថ្មីៗកន្លងមកនេះក៏មានសារលិខិតរវាងលោកប្រធានាធិបតីដូណាល់ ត្រាំ ជាមួយសម្តេចតេជោហ៊ុន សែន នាយករដ្ឋមន្ត្រីកម្ពុជា ដោយការពិភាក្សានោះលោកដូណាល់ ត្រាំ បានបញ្ជាក់អំពីការបន្តពង្រឹងទំនាក់ទំនងរវាងកម្ពុជា និងអាមេរិកឲ្យកាន់តែប្រសើរ ហើយអាមេរិកនៅតែគោរពអធិបតេយ្យភាពកម្ពុជា មិនលូកដៃចូលកិច្ចការផ្ទៃក្នុងកម្ពុជាទេ។
លោកកែវ ពិសិដ្ឋ បានលើកឡើងថា ក្នុងជំនួបនោះ លោកទូតអាមេរិកបានឲ្យដឹងថាសម្តេចតេជោហ៊ុន សែន មានគម្រោងទៅសហរដ្ឋអាមេរិកនៅក្នុងឆ្នាំ២០២០នេះដើម្បីចូលរួមកិច្ចប្រជុំកំពូលរវាងសហរដ្ឋអា មេរិក ជាមួយប្រទេសជាសមាជិកអាស៊ាន ហើយខណៈនោះក៏នឹងមានជំនួបដាច់ដោយឡែករវាងលោកប្រធានាធិបតីដូណាល់ ត្រាំ ជាមួយសម្តេចតេជោផងដែរ ។ លោកប៉ាទ្រីក មើហ្វី បានលើកឡើងបន្តថា កម្ពុជា និងសហរដ្ឋអាមេរិកបានកសាងសមិទ្ធផលជាច្រើនជាមួយគ្នារួចមកហើយ ។
នៅឆ្នាំ២០២០នេះ គឺជាឱកាសកាន់តែសំខាន់ទៀត ដែលប្រទេសទាំងពីរមានលទ្ធភាពនៅក្នុងការពង្រឹងកិច្ចសហប្រតិបត្តិការជាមួយគ្នា ។ ឆ្នាំ២០២០នេះ ជាខួប៧០ឆ្នាំ នៃទំនាក់ទំនងការទូតប្រទេសទាំងពីរ ។ លោកទូតបានសង្កត់ធ្ងន់ថា៖«កម្ពុជា និងសហរដ្ឋអាមេរិកគឺជាដៃគូសន្ទនាជាមួយគ្នា យ៉ាងសំខាន់ ហើយខ្ញុំសូមជូនពរកម្ពុជាមានការអភិវឌ្ឍ ហើយសង្ឃឹមថាឆ្នាំ២០២២ កម្ពុជានឹងធ្វើម្ចាស់ផ្ទះកិច្ចប្រជុំអាស៊ាន ពេលនោះនឹងមានកិច្ចពិភាក្សាគ្នាច្រើនរវាងកម្ពុជា-អាមេរិក ។ ពេលនោះក៏ជាឱកាសរបស់កម្ពុជាក្នុងការទាញយកផលប្រយោជន៍ពីអាមេរិកដែរ»។
ក្នុងជំនួបនោះដែរសម្តេចហេង សំរិន បានលើកឡើងថា បេសកកម្មការទូតរបស់លោកប៉ាទ្រីក មើហ្វី ពិតជាមានសារសំខាន់ខ្លាំងណាស់ ដល់ការបន្តថែរក្សា និងលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងប្រទេសកម្ពុជា-សហរដ្ឋអាមេរិក ឱ្យកាន់តែរឹងមាំ និងរីកចម្រើន ខ្លាំងក្លាថែមទៀត ។
សម្តេចប្រធានរដ្ឋសភា បានអបអរសាទរចំពោះវឌ្ឍនភាពទាំងឡាយ ដែលប្រសូតចេញពីកិច្ចខិតខំប្រឹងប្រែងពង្រឹង និងពង្រីកកិច្ចសហប្រតិបត្តិការរវាងរដ្ឋាភិបាលនៃប្រទេសទាំងពីរជាបន្តបន្ទាប់មកនេះ បាននាំមកនូវផលប្រយោជន៍យ៉ាងធំធេងដល់ប្រជាជាតិទាំងសងខាង ។ ក្នុងនាមរដ្ឋសភាកម្ពុជា និងប្រជាជនកម្ពុជា សូមអបអរសាទរចំពោះការផ្លាស់ប្តូរសារលិខិតដ៏មានតម្លៃ និងមានអត្ថន័យដ៏ជ្រាលជ្រៅ រវាងលោកប្រធានាធិបតីអាមេរិក និងសម្តេចតេជោប្រមុខរាជរដ្ឋាភិបាលកម្ពុជានាពេលថ្មីៗនេះ ៕
ចែករំលែកព័តមាននេះ