រាជធានីភ្នំពេញ ៖ កំលាំងនគរបាលប៉ុស្តិ៍ត្រពាំងក្រសាំងខណៈកំពុងល្បាតក្នុងមូលដ្ឋាន ស្រាប់តែប្រទះឃើញយុវជនចំនួន២នាក់គួរឱ្យសង្ស័យ ហើយជិះម៉ូតូគេចពីសមត្ថកិច្ចទៀត លុះឃាត់សួរនាំទើបដឹងថាជាមុខសញ្ញាវាយធាក់ប្លន់យកម៉ូតូយ៉ាងសកម្ម ។
ហេតុការណ៍ខាងលើនេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី៤ ខែកុម្ភៈ ឆ្នាំ២០២០ នៅផ្សារសាមគ្គី ភូមិសាមគ្គី១ សង្កាត់ត្រពាំងក្រសាំង ខណ្ឌពោធិ៍សែនជ័យ ។
ជនសង្ស័យទាំង២នាក់ខាងលើ ក្នុងនោះម្នាក់ឈ្មោះ សុន បញ្ញា ភេទប្រុស អាយុ១៥ឆ្នាំ មុខរបរមិនពិតប្រាកដ ស្នាក់នៅភូមិសាមគ្គី២ សង្កាត់ត្រពាំងក្រសាំង ខណ្ឌពោធិ៍សែនជ័យ និងម្នាក់ទៀតឈ្មោះ ពៅ ដេវិត ភេទប្រុស អាយុ១៤ឆ្នាំ រស់នៅភូមិសាមគ្គី៣ សង្កាត់ត្រពាំង ក្រសាំងខណ្ឌពោធិ៍សែនជ័យ ។
តាមប្រភពព័ត៌មានពីសមត្ថកិច្ចនគរបាលប៉ុស្តិ៍ត្រពាំងក្រសាំងបានអោយដឹងថា នៅមុនពេលកើតហេតុ កំលាំងនគរបាលប៉ុស្តិ៍បានចុះល្បាតនៅក្នុងមូលដ្ឋានដែលស្មុគស្មាញ ស្រាប់តែប្រទះឃើញជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៩ ពាក់ស្លាកលេខ ភ្នំពេញ ១HO-៩១០១ គ្រាន់តែឃើញសមត្ថកិច្ចភ្លាម ជនសង្ស័យទាំង២នាក់ជិះម៉ូតូគេចខ្លួន ពេលនោះកំលាំងនគរបាលមានការសង្ស័យ ក៏ដេញតាមឃាត់បានភ្លាមៗ ។
បន្ទាប់មកសមត្ថកិច្ចបានសួរនាំជនសង្ស័យទាំង២នាក់ខាងលើ និងស្គាល់ថាជាមុខសញ្ញាច្បាស់ ចំណែកជនសង្ស័យម្នាក់ឈ្មោះសុន បញ្ញា បានឆ្លើយសារភាពថា ខ្លួនធ្លាប់បានធ្វើសកម្មភាពធាក់វាយប្លន់ពិតប្រាកដមែន ។
ក្រោយពេលកើតហេតុ ជនសង្ស័យខាងលើត្រូវបានសមត្ថកិច្ចនគបាលប៉ុស្តិ៍កំពុងកសាង សំណុំរឿងបញ្ជូនទៅផ្នែកជំនាញព្រហ្មទណ្ឌខណ្ឌដើម្បីចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ