ស្លៀកពាក់ពណ៌ក្រហម លោកស្រី ស៊ូម៉ា ឡៃប៉ានយ៉ា ជាអ្នកគ្រូចូលនិវត្ដន៍មួយរូប ដែលមកចូលរួមធ្វើបាតុកម្មនៅតាមបណ្ដោយមហាវិថីរ៉ាតចាដាមនឿន កណ្ដាលក្រុងបាងកក។ ដូចពួកអាវក្រហមជាច្រើនសិបពាន់នាក់ដែលមកចូលរួមធ្វើបាតុកម្ម ប្រឆាំងរដ្ឋាភិបាលដែរ លោកស្រីមានបំណងស្ថិតនៅចិញ្ចើមថ្នល់នេះរហូតដល់ផ្ដួលរំលំរដ្ឋាភិបាលរបស់លោកនាយករដ្ឋមន្ដ្រីអាប់ភីស៊ីត វ៉េចាជីវ៉ា។ គាត់និយាយថា ខ្ញុំមកធ្វើបាតុកម្មពីព្រោះក្នុងប្រទេសនេះមានភាពលំអៀង។ ពួកមនុស្សមួយក្រុមទទួលបានសិទ្ធិពិសេស ទោះបីជាពួកគេធ្វើអ្វីក៏ដោយ ក៏ពុំទទួលការកាត់ទោសនៅតុលាការដែរ។ ក៏ប៉ុន្ដែសំរាប់យើងវិញ សូម្បីតែយើងបំពានលើច្បាប់តិចតួចក៏ទទួលការគាបសង្កត់យ៉ាងធ្ងន់ធ្ងរដែរ។ មនោសញ្ចេតនាអយុត្ដិធម៌នេះញ៉ាំងឱ្យពួកអាវក្រហមច្រើនរយពាន់នាក់លើកគ្នាមកធ្វើបាតុកម្មនៅក្រុងបាងកក ។
ពួកគេទាមទារឱ្យរំលាយសភា ហើយរៀបចំការបោះឆ្នោតថ្មី ។ ពួកគេចាត់ទុករដ្ឋាភិបាលបច្ចុប្បន្នថា បង្កើតឡើងដោយពួកយោធាក្រោយការផ្ដួលរំលំលោកថាក់ស៊ីន តាមរយៈរដ្ឋប្រហារយោធាមួយកាលពីឆ្នាំ២០០៦ ។ អ្នកនាំពាក្យម្នាក់របស់ពួកអាវក្រហមនិយាយថា គោលដៅរបស់យើងគឺទាក់ទាញការយកចិត្ដទុកដាក់របស់ពិភពលោកលើប្រការដែលថា រដ្ឋាភិបាលរបស់យើងបង្កើតចេញពីបន្ទាយទាហាន និងឈរលើមូលដ្ឋាននៃរដ្ឋធម្មនុញមួយតាក់តែងដោយពួកយោធា ពុំមែនដោយប្រជាជន ។
ចែករំលែកព័តមាននេះ