រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អណ្តាតភ្លើងបានឆាបឆេះយ៉ាងសន្ធោសន្ធៅ ហើយលេបត្របាក់អស់ផ្ទះមួយខ្នងដែលធ្វើពីឈើលើ និងថ្មក្រោម ខណៈពេលដែលម្ចាស់ផ្ទះនាំគ្នាទៅហូបបាយនៅហាង បង្កឲ្យមានការភ្ញាក់ផ្អើលដល់សមត្ថកិច្ច និងប្រជាពលរដ្ឋ កាលពីម៉ោង១០និង៣០នាទីយប់…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អណ្តាតភ្លើងបានឆាបឆេះយ៉ាងសន្ធោសន្ធៅ ហើយលេបត្របាក់អស់ផ្ទះមួយខ្នងដែលធ្វើពីឈើលើ និងថ្មក្រោម ខណៈពេលដែលម្ចាស់ផ្ទះនាំគ្នាទៅហូបបាយនៅហាង បង្កឲ្យមានការភ្ញាក់ផ្អើលដល់សមត្ថកិច្ច និងប្រជាពលរដ្ឋ កាលពីម៉ោង១០និង៣០នាទីយប់ ថ្ងៃទី៤ ខែកុម្ភៈ ឆ្នាំ២០២០ នៅផ្លូវ24BT ស្ថិតក្នុងភូមិត្នោតជ្រុំ៦ សង្កាត់បឹងទំពុន2 ខណ្ឌមានជ័យ ។
យោងតាមប្រភពពីម្ចាស់ផ្ទះរងគ្រោះមានឈ្មោះ សៀង សុខលាង ភេទប្រុស អាយុ៥៧ឆ្នាំ មុខរបរមន្ត្រីចូលនិវត្តន៍ បានប្រាប់ឱ្យដឹងថា ផ្ទះដែលត្រូវអគ្គិភ័យឆាបឆេះទាំងស្រុងខាងលើនេះ មានទំហំ6ម៉ែត្រគុណនឹង11ម៉ែត្រ ជាប្រភេទផ្ទះឈើលើប្រក់ក្បឿង ខាងក្រោមថ្ម ហើយគាត់បានជួលទៅឱ្យស្ត្រីជនជាតិខ្មែរម្នាក់រស់នៅជាមួយសង្សារជាជនជាតិបរទេស ប្រកបរបរបើកហាងលក់បាយនៅផ្សារបឹងទំពុន។
បើតាមសម្តីនារីជនជាតិខ្មែរឈ្មោះ ជា សុភាវី អាយុ35ឆ្នាំ មុខរបរបើកហាងលក់បាយ ដែលមានសង្សារជាជនជាតិបរទេសឈ្មោះ Robin Elcberg ជនជាតិស៊ុយអែត ហើយបានជួលផ្ទះកើតហេតុខាងលើនោះស្នាក់នៅនោះបានប្រាប់ឱ្យដឹងថា មុនកើតហេតុ គឺនាងកំពុងរវល់លក់ដូរនៅផ្សារ រហូតដល់ម៉ោង៩និង៣០នាទីយប់ រូបគាត់ក៏ទូរស័ព្ទហៅសង្សាររបស់គាត់ជាជនជាតិបរទេសនោះឱ្យទៅញាំបាយនៅហាង តែសង្សារគាត់ប្រាប់គាត់ថា អត់ស្រួលខ្លួនទេ ចង់សម្រាក និងបានផ្តាំឱ្យនាងខ្ចប់បាយយកមកឱ្យញ៉ាំនៅផ្ទះផង តែនាងមិនព្រម ក៏បានបង្ខំឲ្យគាត់ចេញទៅញ៉ាំបាយនៅហាង ពេលនោះសង្សារគាត់ក៏ព្រមទៅ និងបានបិទទ្វារផ្ទះ ចាក់សោរចេញទៅញ៉ាំបាយបាត់ទៅ ។
ប្រភពដដែលបានបន្តទៀតថា មួយសន្ទុះក្រោយមក បន្ទាប់ពីសង្សារនាងមកដល់ហាងបាយ ស្រាប់តែមានប្រជាពលរដ្ឋ និងម្ចាស់ផ្ទះជួល បានទូរស័ព្ទមកប្រាប់ថា ផ្ទះនាងរស់នៅកំពុងត្រូវអគ្គិភ័យឆាបឆេះ ដោយលឺដូច្នេះនាងក៏ប្រញ៉ាប់ប្រញាល់ចេញមកមើលទាំងភ័យស្លន់ស្លោ តែជាការសោកស្ដាយ អណ្តាតភ្លើងបានឆេះលេបត្របាក់ផ្ទះរបស់គាត់អស់ទាំងស្រុងទៅហើយ រួមនឹងទ្រព្យសម្បត្តិមានតម្លៃមួយចំនួនទៀតដូចជា លុយ និងគ្រឿងអលង្ការបាត់អស់ទៅហើយ។ ចំពោះមូលហេតុដែលបណ្ដាលឲ្យឆាបឆេះ ម្ចាស់ផ្ទះដាក់ការសង្ស័យថា មកពីឆ្លងចរន្តអគ្គិសនី។
ហើយក្នុងប្រតិបត្តិការអន្តរាគមន៍បាញ់ពន្លត់អគ្គិភ័យខាងលើនេះដែរ កម្លាំងសមត្ថកិច្ចការិយាល័យនគរបាលបង្ការ និងពន្លត់អគ្គីភ័យ បានបញ្ជាក់ថា ពិបាកក្នុងការគ្រប់គ្រង ព្រោះជាប្រភេទផ្ទះឈើស្ងួតងាយនឹងឆាបឆេះលឿនត្រឹមរយៈពេលខ្លី ហើយកម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យអស់រថយន្តចំនួន៩គ្រឿង រួមមានរថយន្តការិយាល័យពន្លត់អគ្គិភ័យចំនួន៨គ្រឿង និងរថយន្តជំនួយស្រាបៀរកម្ពុជាចំនួន១គ្រឿងផងដែរ ។ ទើបអគ្គិភ័យខាងលើនេះ មិនបានឆ្លងរាលដាលដល់ផ្ទះប្រជាពលរដ្ឋផ្សេងទៀតឡើយ ចំពោះមូលហេតុសមត្ថកិច្ចកំពុងស្រាវជ្រាវបន្ត ៕ (កែសម្រួលដោយ ៖ បុប្ផា)
ចែករំលែកព័តមាននេះ