បន្ទាយមានជ័យ ៖ តាមការសន្យាពីរដ្ឋមន្ត្រីក្រសួងធនធានទឹក និងឧតុនិយមបានយកស្ថានីយបូមទឹក ហ៊ុន សែន៥៤ដាក់ ក្នុងស្ទឹងសិរីសោភ័ណ និងចុះសិក្សាគម្រោងប្រឡាយបេតុង កាលពីថ្ងៃទី៣១ ខែមករា ឆ្នាំ២០២០ នៅក្រុងសិរីសោភ័ណ ។
លោក ឡាយ សុធី អនុប្រធានមន្ទីធនធានទឹក និងឧតុនិយមខេត្តបន្ទាយមានជ័យបានប្រាប់ថា៖កាលពីអំឡុងចុងឆ្នាំ២០១៩ និងដើមឆ្នាំ២០២០កន្លងទៅ ស្រុកមង្គលបូរីមានប្រជាពលរដ្ឋប្រមាណ៨.០០០គ្រួសារ និងមន្ទីពេទ្យមិត្តភាពកម្ពុជា-ជប៉ុន មង្គលបូរី បានប្រឈមខ្វះទឹកប្រើប្រាស់ ។ ដោយបានការយកចិត្តទុកដាក់ពីលោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារចុះជួយខេត្តបន្ទាយមានជ័យ និងលោកទេសរដ្ឋមន្ត្រី គន់ គីម ទទួលបន្ទុកបេសកម្មពិសេសនៃគណកម្មាធិការគ្រប់គ្រងគ្រោះមហន្តរាយ និងលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ។
ដោយបានចុះមកពិនិត្យ និងអន្តរាគមន៍ដោយអោយមន្ត្រីជំនាញបូមទឹកពីដងស្ទឹងសិរីសោភ័ណ ដាក់ទំលាក់ទៅស្ទឹងមង្គលបូរី ហើយបង្ហូដងស្ទឹងស្រុកបវេលខេត្តបាត់ដំបងទំលាក់មកក្រោមរហូតពេលនេះប្រជាពលរដ្ឋមានទឹកប្រើប្រាស់ដោយគ្មានការព្រួយបារម្ភទៀតឡើយ ។
លោក ឡាយ សុធី បានបញ្ជាក់ថា ក្នុងឱកាសចុះអន្តរាគមន៍លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមបានសន្យា ហើយមន្ត្រីជំនាញបានយកស្ថានីបូមទឹកចល័តសម្តេចតេជោ ហ៊ុន សែន៥៤យកដាក់ដងស្ទឹងសិរីសោភ័ណ ហើយសិក្សាគម្រោងកសាងប្រឡាយបេតុងដែលតភ្ជាប់ពីដងស្ទឹងសិរីសោភ័ណទៅកាន់ដងស្ទឹងមង្គលបូរី ហើយមន្ត្រីជំនាញកំពុងចុះសិក្សាគម្រោងហើយជូនទៅក្រសួងជំនាញ និងធ្វើការកសាង ដើម្បីសម្រួលទឹកពីដងស្ទឹងសិរីសោភ័ណទៅ ដងស្ទឹងមង្គលបូរីនៅពេលដែលខ្វះទឹកប្រើប្រាស់សម្រួលបានទាន់ពេលវេលា ៕
ចែករំលែកព័តមាននេះ