រាជធានីភ្នំពេញ ៖ បន្ទាប់ពីផ្ដួលជើងខ្លាំងរបស់ថៃ គឺ Phat Narong ឱ្យបោះបង់ការប្រកួតក្នុងទឹកទី៣ នៅក្នុងការប្រកួតអន្តរជាតិនៅលើសង្វៀនទូរទស្សន៍អាស៊ីអាគ្នេយ៍ កាលពីថ្ងៃទី២ ខែកុម្ភៈ…
រាជធានីភ្នំពេញ ៖ បន្ទាប់ពីផ្ដួលជើងខ្លាំងរបស់ថៃ គឺ Phat Narong ឱ្យបោះបង់ការប្រកួតក្នុងទឹកទី៣ នៅក្នុងការប្រកួតអន្តរជាតិនៅលើសង្វៀនទូរទស្សន៍អាស៊ីអាគ្នេយ៍ កាលពីថ្ងៃទី២ ខែកុម្ភៈ ឆ្នាំ២០២០នោះ កីឡាករកម្ពុជា ឃីម បូរ៉ា បានប្រកាសយ៉ាងមុតមាំថា លោកនឹងរង់ចាំស្វាគមន៍រាល់ការសងសឹករបស់កីឡាករថៃ ប្រសិនបើកីឡាកររូបនេះ ចង់ឡើងប្រកួតជាមួយលោកសារជាថ្មី។
នេះគឺជាការឆ្លើយតបរបស់កីឡាករកម្ពុជា បន្ទាប់ពីភាគីថៃ បានអះអាងថា ក្រោយភ្លាត់បរាជ័យ គឺខ្លួននឹងស្នើទូរទស្សន៍អាស៊ីអាគ្នេយ៍ ដាក់ទទួល Phat Narong ឱ្យឡើងសងសឹកក្នុងពេលដ៏ខ្លី។
លោក ថៃ អ៊ូ អ្នកដឹកនាំកីឡាករថៃឱ្យមកប្រកួតបានអះអាងថា កីឡាករថៃក្រោយចាញ់ដោយរាប់ដល់១០ គឺមិនអស់ចិត្តនោះទេ ហើយលោកក៏ឯកភាពនឹងដាក់សងសឹកដែរ។ មួយស្នៀតដែល ឃីម បូរ៉ា ផ្ដួលថៃឱ្យបរាជ័យនោះ គឺដោយសារកីឡាករថៃលើកជើងទាត់ហើយគេចាប់ជើងបាន រួចក៏ម៉ាត់ពេញទំហឹង បណ្ដាលឱ្យកីឡាករថៃបែកអំពិលអំពែកតែម្ដង។
ការប្រកួតនេះ ត្រូវបានបញ្ចប់តាំងពីទឹកទី២ម្ល៉េះ ប៉ុន្តែដោយសារតែកីឡាករថៃដួលភ្លាម ក៏ដល់ស្នូរជួងឱ្យទឹកភ្លាម ក៏ត្រូវបានគេគិតថា កីឡាករថៃសន្លប់ក្នុងទឹកទី៣។ ជ័យជម្នះនេះធ្វើឱ្យម្នាក់សរសើរ ឃីម បូរ៉ា យ៉ាងខ្លាំង តែក៏មិនទាន់ដឹងថា នៅពេលប៉ះគ្នាសងសឹក តើ ឃីម បូរ៉ា មានសំណាងដដែលឬយ៉ាងណា?
យ៉ាងណាមិញ កីឡាករកម្ពុជាហាក់មានជំនឿចិត្តខ្ពស់ ខណៈដែលលោកក៏បានប្រកាសហើយថា នឹងរង់ចាំគ្រប់ការចង់សងសឹករបស់កីឡាករថៃ ដោយរីករាយកាន់តែឆាប់កាន់តែល្អ៕ (កែសម្រួលដោយ ៖ បុប្ផា)
ចែករំលែកព័តមាននេះ