ខេត្តស្ទឹងត្រែង ៖ សាលាបឋមសិក្សាភ្នំក្រហម មាន៣បន្ទប់ ស្ថិតនៅចំងាយប្រហែល៥០គីឡូម៉ែត្រពីក្រុងស្ទឹងត្រែង ក្នុងភូមិសាស្រ្តភូមិភ្នំក្រហម ឃុំស្រែក្រសាំង ស្រុកសៀមបូក ជាសាលារៀនដែលមានតែដំបូលប្រក់ស្បូវគ្មានជញ្ជាំងទេ គឺកំពុងមានការខ្វះខាតយ៉ាងខ្លាំងបើប្រៀបធៀបជាមួយសាលាដទៃទៀតក្នុងខេត្ត ។ ទោះបីជាខេត្តនេះសំបូរធនធានព្រៃឈើក្តី តែទំនងជាសំបូរ តែអ្នកកាប់បំផ្លាញយកឈើទៅលក់ប៉ុណ្ណោះ ។
ស្ថានភាពសាលាបែបនេះ បានផ្តល់នូវការលំបាកជាច្រើនដល់ប្អូនៗសិស្សានុសិស្សដែលកំពុងសិក្សានៅទីនោះ ពីព្រោះថា នៅពេលពន្លឺថ្ងៃជះមកម្តងៗប្អូនៗមិនអាចអង្គុយរៀនបានទេ ដោយសារតែកំដៅថ្ងៃបានធ្វើឱ្យប្អូនៗទាំងនោះក្តៅស្ទើរទ្រាំមិនបាន ហើយរត់ទៅជ្រកនៅម្លប់ឈើដើម្បីសិក្សាបន្ត ។ ស្រី្តឈ្មោះសំ នី អាយុ៤៥ឆ្នាំ ជាអ្នកលក់នំចំណីបន្តិចបន្តួចនៅទីនោះបានឱ្យដឹងថា សិស្សទាំងអស់អាចរៀនបានតែនៅពេលព្រឹក ពីព្រោះពន្លឺថ្ងៃមិនសូវមានកំដៅខ្លាំង ចំណែកពេលរសៀលវិញមិនអាចរៀនបានទេ ដោយសារថ្ងៃក្តៅពេក ។ ជាមួយនេះ នៅរដូវវស្សាសិស្សទាំងអស់ក៏មិនអាចរៀនបានដែរ ពីព្រោះទឹកភ្លៀងសាចចូលដល់ក្នុងថ្នាក់រៀន ដែលធ្វើឱ្យក្មួយៗជាសិស្សានុសិស្សមិនអាចអង្គុយរៀន ក្រោមតំណក់ទឹកភ្លៀងបាន ។
លោកគ្រូឆេង ឌិន បង្រៀនថ្នាក់ទី៣ នៅសាលាបឋមសិក្សាភ្នំក្រហមនេះបានឱ្យដឹងថា គាត់បង្រៀនតាំងពីឆ្នាំ១៩៩៣ ដែលដំបូងបង្រៀននៅភូមិកោះក្រូច ក្រោយមកក៏ប្តូរមកបង្រៀននៅភូមិដំរីផុង ហើយពេលបច្ចុប្បន្នប្តូរមកបង្រៀននៅសាលាភ្នំក្រហមនេះ ។ សាលានេះបង្កើតឡើងតាំងពីឆ្នាំ២០០៧ តែមានការខ្វះខាតច្រើនណាស់ទាំងសំភារសិក្សា និងអគារសិក្សា តែទោះជាមានការលំបាកយ៉ាងណា ក៏គាត់នៅតែខិតខំតស៊ូផ្តល់ចំណេះដឹងដល់សិស្សទាំងអស់ដែលមានការព្យាយាមមកក្រេបយកចំណេះដឹង ដើម្បីអនាគតរបស់ពួកគេដែរ ។
ចំណែកអ្នកគ្រូ មឿន វណ្ណារ៉ា បង្រៀនថ្នាក់ទី៤ បានឱ្យដឹងដែរថា ពីមួយឆ្នាំទៅមួយឆ្នាំសិស្សដែលសិក្សានៅទីនេះមានការកើនឡើងរហូត ហើយពេលបច្ចុប្បន្នមានសិស្សចំនួន១៤០នាក់ ក្នុងនោះសិស្សស្រីចំនួន៧៣នាក់ ភាគច្រើនជាកូនរបស់ប្រជាកសិករមកពីភូមិភ្នំក្រហម ភូមិ អ៊ុំ ឃួង ឃុំស្រែក្រសាំង និងមកពីខេត្តនានា ដែលប្រជាកសិករទាំងនោះបានតាំងទីលំនៅថ្មីដើម្បីធ្វើចំការនៅភូមិនេះ ។ អ្នកគ្រូបានបន្តថា សាលាមានការខ្វះខាតច្រើនណាស់ ទាំងសំភារសិក្សា និងបន្ទប់សិក្សា ដើម្បីបំពេញតំរូវការរបស់ក្មួយៗដែលកំពុងតែសិក្សា ។ បើអាចស្នើសុំបាន អ្នកគ្រូសុំឱ្យប្រមុខរាជរដ្ឋាភិបាលដែលមានក្រសួងអប់រំ យុវជន និងកីឡា ជាសេនាធិការ ធ្វើគម្រោងសាងសង់ឱ្យបានឆាប់ ដើម្បីក្មួយៗសិក្សានៅទីនេះទទួលបានអគារសិក្សាមានលក្ខណៈស្តង់ដាត្រឹមត្រូវ ។ ជាមួយនេះ អ្នកគ្រូបានស្នើសុំអណ្តូងទឹកនៅក្នុងសាលាផងដែរ ដើម្បីបំរើផលប្រយោជន៍ដល់ក្មួយៗសិស្សានុសិស្សក៏ដូចជា ប្រជាពលរដ្ឋក្នុងភូមិ ។
មន្រ្តីមន្ទីរអប់រំ យុវជន និងកីឡាខេត្ត កាលពីថ្ងៃទី១៨ ខែមីនា បាននិយាយថា សាលាបឋមសិក្សាភ្នំក្រហមនេះ វាគ្រាន់តែជារោងសិក្សាមួយប៉ុណ្ណោះ ហើយពេលកន្លងទៅថ្មីៗនេះ ក្រសួងបានមកសិក្សារួចហើយលើគម្រោងសាងសង់អគារមិនមែនតែមួយកន្លែងទេ គឺមាន៥ទៅ៦កន្លែងឯណោះ ដូច្នេះមន្ទីររង់ចាំតែគម្រោងធ្លាក់មកគឺចាប់ផ្តើមសាងសង់ ៕
ចែករំលែកព័តមាននេះ