ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា សមត្ថកិច្ចតាមប្រមាញ់ចាប់ចោរចូលលួចគាស់ទ្វារផ្ទះម្ចាស់ស្ថានីយប្រេងឥន្ទនៈមួយកន្លែងកាលពីម៉ោង២នាទីរំលងអធ្រាត្រឈានចូលថ្ងៃទី១៧ មករា ឆ្នាំ២០២០នោះហើយ ក៏ប៉ុន្តែទ្រព្យសម្បត្តិលុយកាក់ត្រូវជនសង្ស័យយកទៅលេងល្បែងក្នុងកាស៊ីណូជិតអស់ទៅហើយ។
សេចក្តីរាយការណ៍បន្តថា ជនរងគ្រោះដែលជាម្ចាស់ស្ថានីយប្រេងឈ្មោះ ទុំ សារឿន ភេទប្រុស អាយុ៣៩ឆ្នាំ មុខរបរម្ចាស់ការ៉ាស់សាំង មានទីលំនៅភូមិកៀនសាំងសង្កាត់ស្វាយរៀង ក្រុងស្វាយរៀង។ ចំណែកជនសង្ស័យឈ្មោះ ផាន ឌីណា ភេទប្រុស អាយុ២២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិក្តីចាស់ ឃុំព្រែកលួង ស្រុកខ្សាច់កណ្ដាល ខេត្តកណ្តាល។
បើតាមលោកវសេនីយ៍ ខឹម ឡៃ នាយការិយាល័យព្រហ្មទណ្ឌកម្រិតធ្ងន់ស្នងការដ្ឋាននគបាលខេត្ត បានឲ្យដឹងថា កាលពីម៉ោង៥ព្រឹកថ្ងៃទី១៧ មករានោះ សមត្ថកិច្ចនគរបាលក្រុងស្វាយរៀង បានទទួលព័ត៌មានតាមរយៈទូរស័ព្ទថា នៅក្នុងផ្ទះ (ការ៉ាស់សាំង) របស់ឈ្មោះ ទុំ សារឿន មានករណីចោរចូលលួចយកលុយគ្រឿងអលង្ការ និងសម្ភារៈអស់មួយចំនួនទៀត ដូចជា ៖
១-ចិញ្ចៀន២វង់ (ផ្លាកទីនមួយវង់ មាស១វង់) មានតម្លៃ៥,០០០ដុល្លារ, ២-ចិញ្ចៀនមាស១វង់ ទម្ងន់៥ ជី, ៣-កងដៃផ្លាកទីនមួយខ្សៃតម្លៃជាង២,០០០ដុល្លារ, ៤-ក្រវិលមាសមួយគូរទម្ងន់២ជី៥ហ៊ុន៥, ប្រាក់ដុល្លារចំនួន១៣,០០០ដុល្លារ, ៦-ប្រាក់រៀលចំនួន៩១លានរៀល, ៧-ទូរស័ព្ទដៃមួយគ្រឿងម៉ាក iPhone X-11pro ពណ៌ខ្មៅ តម្លៃជាង១,៥០០ដុល្លារ, ៨-ចង្កឹះសោររថយន្តចំនួនពីរគ្រឿង និងសម្ភារប្រើប្រាស់មួយចំនួនទៀតផងដែរ។
ប្រភពដដែលបន្តទៀតថា បន្ទាប់ពីទទួលបានព័ត៌មាននេះភ្លាម សមត្ថកិច្ចជំនាញផែនការងារនគរបាលព្រហ្មទណ្ឌ និងកម្លាំងនគរបាលក្រុងស្វាយរៀង បានចុះទៅដល់កន្លែងកើតហេតុ ដើម្បីធ្វើការស្រាវជ្រាវ និងប្រមែប្រមូលបាននូវភស្តុតាងសំខាន់ៗមួយចំនួន និងបានទំនាក់ទំនងទៅនាយកដ្ឋានព្រហ្មទណ្ឌ ដើម្បីឆែកឆេរប្រព័ន្ធទូរស័ព្ទរបស់ជនរងគ្រោះដែលត្រូវបានចោរលួចយកទៅនោះ ឃើញថា មុខសញ្ញាបានរត់គេចខ្លួនទៅដល់រាជធានីភ្នំពេញ។
ប្រភពដដែលបន្តថា ក្រោមការដឹកនាំចង្អុលបង្ហាញ និងបទបញ្ជាផ្ទាល់របស់លោកឧត្តមសេនីយ៍ទោ កឹង ឃន ស្នងការនៃស្នងការដ្ឋាននគរបាលខេត្ត កម្លាំងជំនាញបានបន្តចុះស្រាវជ្រាវស៊ើបអង្កេត លុះរហូតដល់ថ្ងៃទី២៩ មករា សមត្ថកិច្ចជំនាញបានឃាត់ខ្លួនមុខសញ្ញាជាជនសង្ស័យដែលពាក់ព័ន្ធករណីចោរលួចលុយ និងគ្រឿងអលង្ការក្នុងផ្ទះរបស់ជនរងគ្រោះខាងលើ។ ហើយជនសង្ស័យរូបនេះក៏ជាមុខសញ្ញាដែលជាប់ពាក់ព័ន្ធនឹងករណីលួចរថយន្តមួយគ្រឿងម៉ាក LEXUS RX_330 ពណ៌ស នៅតំបន់ព្រែកលៀប ខេត្តកណ្តាល កាលពីថ្ងៃទី២៣ មករា កន្លងមកផងដែរ។
នៅចំពោះមុខសមត្ថកិច្ច ជនសង្ស័យខាងលើបានឆ្លើយសារភាពថា ខ្លួនពិតជាបានធ្វើសកម្មភាពតែម្នាក់ឯងចូលទៅលួចយកគ្រឿងអលង្ការជាច្រើនដូចជា ខ្សែ.ក, កងដៃ, ក្រវិល, ចិញ្ចៀន, ទូរស័ព្ទ និងលុយកាក់ សរុបជាទឹកប្រាក់ជាង៤ម៉ឺនដុល្លារនៅក្នុងផ្ទះការ៉ាស់សាំងរបស់ជនរងគ្រោះ ស្ថិតក្នុងសង្កាត់ស្វាយរៀងនោះពិតប្រាកដមែន តែបន្ទាប់ពីលួចបានហើយ ខ្លួនក៏យកទៅប្តូរនៅផ្ទះលីហួយកលុយដុល្លារ រួចក៏ចូលទៅលេងល្បែងនៅកាស៊ីណូ រហូតដល់ចាញ់អស់ប្រាក់ជាង៣ម៉ឺនដុល្លារ និងយកលុយខ្លះទៀតទៅទិញខ្សែ.កប្លាកទីន ព្រមទាំងសម្ភារទាន់សម័យជាច្រើនទៀត ហើយនៅសល់ប្រាក់ចំនួន៥,០០០ដុល្លារ, លុយខ្មែរ១៨ម៉ឺនរៀល, ចិញ្ជៀនមាស១វង់ និងក្រវិលមាស១គូតែប៉ុណ្ណោះ។
បច្ចុប្បន្ន សមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញ បានប្រគល់ប្រាក់ដែលនៅសល់មួយចំនួនខាងលើដែលដកហូតពីជនសង្ស័យ ប្រគល់ទៅឱ្យជនរងគ្រោះវិញហើយ រីឯជនសង្ស័យត្រូវសមត្ថកិច្ចជំនាញរាជធានីភ្នំពេញកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់។ ចំណែកឯសំណុំរឿងករណីចោរកម្មនៅខេត្តស្វាយរៀងវិញ សមត្ថកិច្ចយើងនិងកសាងជាសំណុំរឿងស៊ើបអង្កេតបញ្ជូនទៅសាលាដំបូងខេត្តស្វាយរៀង ដើម្បីចេញដីកាចាប់ខ្លួន និងឃុំខ្លួន ដើម្បីអនុវត្តទោសនៅពេលក្រោយ៕ (កែសម្រួលដោយ ៖ បុប្ផា)
ចែករំលែកព័តមាននេះ