រាជធានីភ្នំពេញ ៖ បុរសម្នាក់បែកក្បាលផ្ទុះចេញខួរស្លា.ប់ភ្លាមៗនិងម្នាក់ទៀតបានរងរបួសបាក់ដៃឆ្វេងដោយសារតែជិះម៉ូតូប្រជែងគ្នាជ្រុលទៅបុកបង្កាន់ដៃស្ពានអាកាស៧មករា ហើយម៉ូតូធំមួយគ្រឿងជារបស់អ្នកស្លា.ប់ត្រូវបានជនមិនស្គាល់សាវតារលើកយកជិះទៅបាត់ទុកម៉ូតូម៉ាកអាយខុនមួយគ្រឿងចោលនៅកន្លែងកើតហេតុ ។
រាជធានីភ្នំពេញ ៖ បុរសម្នាក់បែកក្បាលផ្ទុះចេញខួរស្លាប់ភ្លាមៗនិងម្នាក់ទៀតបានរងរបួសបាក់ដៃឆ្វេងដោយសារតែជិះម៉ូតូប្រជែងគ្នាជ្រុលទៅបុកបង្កាន់ដៃស្ពានអាកាស៧មករា ហើយម៉ូតូធំមួយគ្រឿងជារបស់អ្នកស្លាប់ត្រូវបានជនមិនស្គាល់សាវតារលើកយកជិះទៅបាត់ទុកម៉ូតូម៉ាកអាយខុនមួយគ្រឿងចោលនៅកន្លែងកើតហេតុ ។
ហេតុការណ៍គ្រោះថ្នាក់ដ៏គួរឱ្យញាក់សាច់នេះបានកើតឡើងកាលពីវេលាម៉ោង៣និង៥០នាទីទៀបភ្លឺថ្ងៃទី១០ សីហា នៅចំណុចលើស្ពានអាកាស៧មករា ត្រង់ផ្លូវបំបែកទៅផ្លូវកម្ពុជាក្រោម ក្នុងសង្កាត់ទឹកល្អក់ទី១ ខណ្ឌទួលគោក ដែលគេសង្ស័យអ្នកជិះម៉ូតូទាំង២គ្រឿងដែលជាមិត្តភក្ដិនឹងគ្នានោះបានជិះប្រជែងគ្នាក៏ជ្រុលទៅបុកបង្កាន់ដៃស្ពាន ។ ជនរងគ្រោះដែលស្លាប់ឈ្មោះហេង សុភ័ន្ត អាយុ៣១ឆ្នាំ ជាជាងទឹក និងភ្លើងមានលំនៅក្នុងសង្កាត់កាកាប ខណ្ឌពោធិ៍សែនជ័យ និងមានស្រុកកំណើតនៅភូមិព្រែកតាជ្រូក ឃុំព្រែកគយ ស្រុកស្អាង ខេត្តកណ្តាល បានបោកក្បាលផ្ទុះចេញខួរស្លាប់នៅនឹងកន្លែង ។ ចំណែកអ្នករងរបួសឈ្មោះជួប សុខរ៉េន ភេទប្រុស អាយុ២៩ឆ្នាំ ជាសន្តិសុខ ស្នាក់នៅសង្កាត់ភ្នំពេញថ្មី ខណ្ឌសែនសុខ កំពុងសម្រាកព្យាបាលនៅមន្ទីរពេទ្យព្រះកុសុមៈ ។
តាមប្រភពព័ត៌មានបានឱ្យដឹងថា មុនពេលកើតហេតុគេឃើញម៉ូតូហុងដាឌ្រីមមួយគ្រឿង ពាក់ស្លាកលេខភ្នំពេញ១CE-៩៤៤០ បើកបរដោយឈ្មោះជួប សុខរ៉េន ឌុបស្ត្រីម្នាក់ពីក្រោយ ។ បើកស្របទិសគ្នាជាមួយម៉ូតូម៉ាកFZ ពណ៌ក្រហម ពាក់ស្លាកលេខភ្នំពេញ១BS-៧៥៤១ បើកបរដោយជនរងគ្រោះដែលស្លាប់ជាមិត្តភក្ដិនឹងគ្នាធ្វើដំណើរតាមពីក្រោយលើមហាវិថីសហព័ន្ធរុស្ស៊ី ក្នុងទិសដៅពីលិចទៅកើត ពេលធ្វើដំណើរមកដល់លើស្ពានអាកាស៧មករា ចំណុចកើតហេតុខាងលើម៉ូតូទាំង២គ្រឿងបានបត់ទៅតាមផ្លូវកម្ពុជាក្រោមដែលជាផ្លូវកោងក៏បានជួបគ្រោះថ្នាក់ជ្រុលបុកបង្កាន់ដៃស្ពានអូសប្រមាណជា៣០ម៉ែត្របណ្តាលឱ្យស្លាប់ម្នាក់និងរបួសម្នាក់ ចំណែកស្រី្តដែលជិះជាមួយបានគេចខ្លួនបាត់ ។
ដោយឡែកម៉ូតូម៉ាកFZ ពណ៌ក្រហម មួយគ្រឿងត្រូវជនម្នាក់ផ្សេងទៀតជិះម៉ូតូអាយខុនមួយគ្រឿងមានពាក់ស្លាកលេខក្លែងក្លាយបានទុកម៉ូតូចោលហើយមកលើកយកម៉ូតូធំរបស់ជនរងគ្រោះជិះចេញទៅបាត់ ។ តាមបុរសឈ្មោះលី សាម៉េត អាយុ៤៥ឆ្នាំជាអ្នករត់ម៉ូតឌុប មានលំនៅភូមិដើមចាន់ សង្កាត់ច្បារអំពៅទី១ ខណ្ឌច្បារអំពៅ បាននិយាយថា មុនពេលកើតហេតុគាត់បានឮសំឡេងបុកដូចផ្ទុះគ្រាប់បែក ។ ខណៈនោះស្រាប់តែឃើញមូតូធំមួយគ្រឿងបានរអិលចុះពីលើស្ពានអាកាស៧មករាទៅតាមផ្លូវកម្ពុជាក្រោមដោយគ្មានមនុស្សបើកហើយស្របពេលជាមួយគ្នានោះមានម៉ូតូអាយខុនមួយគ្រឿងជិះដោយបុរសម្នាក់ទៅតាមក្រោយ ។
ពេលម៉ូតូធំនោះអស់ខ្យល់ដួលស្រាប់តែអ្នកជិះម៉ូតូអាយខុននោះបានឈប់ហើយលើកម៉ូតូFZជិះយកទៅបាត់ដោយទុកម៉ូតូអាយខុនកញ្ចាស់របស់ខ្លួនប្លុងចោលនៅកន្លែងកើតហេតុ។ ទាក់ទិននឹងគ្រោះថ្នាក់នេះ សមត្ថកិច្ចមានការសង្ស័យជនរងគ្រោះទាំង២នាក់ (អ្នកស្លាប់និងរបួស)ជាមិត្តភក្កិនឹងគ្នាជិះម៉ូតូស្របទិសគ្នាក្នុងល្បឿនលឿនចុះចំណោតក៏បានជ្រុលទៅបុកកំផែងបង្កាន់ដៃស្ពានព្រោះចំណុចនោះជាផ្លូវកោងខ្លាំង ។ អ្នករងរបួសត្រូវបានបញ្ជូនទៅព្យាបាលនៅមន្ទីរពេទ្យព្រះកុសុមៈ ចំណែកសពបញ្ជូនទៅតម្កល់នៅឈាបនដ្ឋានវត្តទឹកថ្លា ដើម្បីរង់ចាំក្រុមគ្រួសារមកធ្វើបុណ្យតាមប្រពៃណី ។ ម៉ូតូទាំង២គ្រឿងសមត្ថកិច្ចយកទៅទុកនៅអធិការដ្ឋានខណ្ឌទួលគោក ដើម្បីស្រាវជ្រាវរកម៉ូតូធំអ្នករងគ្រោះដែលជនឆ្លៀតឱកាសយកទៅបាត់ ។
គួរបញ្ជាក់ថា នៅចំណុចគ្រោះថ្នាក់ចរាចរណ៍ខាងលើនេះកន្លងមកធ្លាប់កើតមានគ្រោះថ្នាក់ជាច្រើនលើកមកហើយព្រោះជាចំណុចផ្លូវកោងខ្លាំងបំបែកពីផ្លូវសហព័ន្ធរុស្សុីកោងមកផ្លូវកម្ពុជាក្រោម និងជាកន្លែងចុះចំណោតផង ។ ដូច្នេះបើអ្នកបើកបរធ្វេសប្រហែសតែបន្តិច ឬបើកលឿនពេកពិតជាប្រឈមគ្រោះថ្នាក់ខ្លាំងណាស់ ។ សូមបើកបរដោយការប្រុងប្រយ័ត្ននិងប្រើប្រាស់ល្បឿនសមរម្យដែលយើងអាចគ្រប់គ្រងស្ថានការណ៍បាន ៕
ចែករំលែកព័តមាននេះ