រាជធានីភ្នំពេញ ៖ តារាចម្រៀងចាស់វស្សាអ្នកនាង ម៉េង កែវពេជ្ជតា បានបង្ហោះសារនៅលើគណនេយ្យហ្វេសប៊ុករបស់ខ្លួន ដោយធ្វើការរិះគន់ទៅវីអូឃ្លីបមួយដែលបង្ហាញពីស្ត្រីមួយក្រុមគ្រងឈុតអប្សរា តែបែជារាំបទសម័យ។
វីដេអូឃ្លីបមួយនេះ ត្រូវបានគេផ្សព្វផ្សាយតាមបណ្តាញអ៊ីនធើរណេតបង្ហាញពីស្ត្រីខ្មែរមួយក្រុមដែលកំពុងរស់នៅទីក្រុងប៉ារីស ប្រទេសបារាំង បាននាំគ្នាគ្រងឈុតអប្សរាខ្មែរជាមួយនឹងការរាំយ៉ាងរឃើនជាមួយបទ «មោនភាពជាតិខ្មែរ» ។ បើទោះបីជាក្នុងកម្មវិធីនោះ ពួកគេហាក់មានបំណងចង់ផ្សព្វផ្សាយពីវប្បធម៌ខ្មែរក៏ដោយ ប៉ុន្តែសកម្មភាពដែលពួកគេបានធ្វើនោះ វាបានប្រាស់ចាកទាំងស្រុងពីធាតុដើមនៃតួអង្គអប្សរា។
វីដេអូឃ្លីបមួយនេះ បើទោះបីជាបានទទួលការចូលមើលជាច្រើនម៉ឺននាក់ គ្រោងបង្ហោះក្តី ប៉ុន្តែវាក៏បានទទួលការរិះគន់យ៉ាងចាស់ដៃផងដែរពីសំណាក់មហាជនខ្មែរ ក្នុងពេលដែលសកម្មភាពនេះ បានធ្វើអាប់ឱនដល់តម្លៃសិល្បៈវប្បធម៌ខ្មែរ។
ជាមួយគ្នានេះផងដែរ តារាចម្រៀងដ៏ល្បីអ្នកនាង ម៉េង កែវពេជ្ជតា ក៏បានចូលរួមនូវការរិះគន់ និងបានចាត់ទុកសកម្មភាពខាងលើនេះថា មិនមានការសមរម្យ មិនចំណេញ និងគួរឱ្យខ្មាស់អៀន។ អ្នកនាងបានបង្ហោះសារពាក់ព័ន្ធនឹងបញ្ហាខាងលើនេះថា ខ្មែរខ្លួនឯងមិនស្គាល់វប្បធម៌ខ្លួនឯងច្បាស់ គឺអញ្ចឹង ។ មិនបានបន្ទោសទេ គ្រាន់តែក្រើនរំលឹក !។
អ្នកនាងបញ្ជាក់ថា ការស្លៀកពាក់ និងតុបតែងខ្លួនជាតួអង្គអប្សរារបស់នារីមួយក្រុមនេះ ទោះជាមិនត្រូវតាមទំរង់ថា ជាតួអង្គអប្សរាខ្មែរសោះក៏ពិតមែន តែតាមរយៈការលើកបង្ហាញផ្ទាំងអក្សរ ក៏គ្រប់គ្នាអាចយល់បានថា ពួកគាត់ចង់សំដៅលើតួនាងអប្សរាខ្មែរហើយ ។ មិនដឹងថា ពួកគាត់ហាត់រៀន ឬធ្វើតាមខាងណាទេ តែពេលឃើញគាត់រាំញ័រញាក់ក្នុងសម្លៀកបំពាក់គ្រឿងម្កុដបែបនេះ ពិតជាមិនសមរម្យទាល់តែសោះ មិនចំណេញអ្វីឡើយ និងពិតជាគួរឱ្យខ្មាស់អៀនណាស់ ។
តែបើគិតក្នុងផ្លូវល្អ តាមមើលប្រហែលជាពួកគាត់ចង់លើកស្ទួយមុខមាត់ខ្មែរទេ ទើបខំលើកអក្សរជាខ្មែរ ប៉ុន្តែដោយសារការយល់ដឹងអំពីវប្បធម៌ និងគំនិតនៃការអភិវឌ្ឍន៍សិល្បៈបុរាណខ្មែររបស់ពួកគាត់នៅមានកំរិត ហើយមួយផ្នែកធំទៀតពួកគាត់អាចយល់ច្រឡំដោយឃើញជនជាតិផ្សេងក៏អាចយកទំរង់របាំបុរាណមក Update ជាលក្ខណៈសម័យនិយមបាន ទើបពួកគាត់ក៏ធ្វើតាមគេដែរទៅ… ពិតជាគួរឱ្យស្តាយ !។
បើតាមអ្នកនាង ម៉េង កែវពេជ្ជតា បានបន្តថា ខ្ញុំដឹងថាមានបងប្អូនខ្មែរផ្សេងទៀតមិនតិចទេដែលកំពុងព្រួយចិត្តនឹងរឿងវប្បធម៌នេះ តាំងពីរឿងពិធីកាត់សក់បង្កក់សិរី តែបែរជាតួអង្គប្រុសស្រីតំណាងទេវតា និងទេពធីតាប្រើសម្តី និងកាយវិការអា មឹង អាសអាភាស , ហើយពិធីហែជំនូន អ្នកខ្លះលែងយកបទភ្លេងការ ចៅព្រាហ្មមកហែរ តែបែរជាចាក់ភ្លេងធុងបាស់ហើយនាំគ្នាដើររាំឡកអាឡិកអាឡក់ទាំងខាងស្រីទាំងខាងប្រុស បាត់បង់អស់ភាពជាខ្មែរជាចាស់ទុំត្រឹមត្រូវថ្លៃថ្នូរ គឺនាំគ្នាធ្វើតាមគេតែម្តង ។
ថ្ងៃនេះមិត្តជាច្រើនក៏បានចោទសួរមកខ្ញុំ និងបានសំណូមពរឱ្យខ្ញុំជួយជាមតិក្នុងរឿងនេះផង ។ ពិតហើយក្នុងនាមខ្ញុំជាពលរដ្ឋខ្មែរ និងជាសរសៃឈាមនៃវប្បធម៌មួយរូបដែរ ខ្ញុំក៏តែងមានការព្រួយបារម្ភ និងឈឺឆ្អាលរាល់លើក បើទោះជាគ្មានសំណូមពរ ក៏គង់តែខ្ញុំនៅមិនស្ងៀមដែរ ។
តបតាមសំណើរ ពេលនេះខ្ញុំក៏សូមបញ្ជាក់ជូនបងប្អូន សូមកុំយល់ច្រឡំថា ឱ្យតែបានស្លៀកពាក់ជាខ្មែរ និងពាក់ផ្លាកអក្សរជាខ្មែរ នោះសុទ្ធតែជាការលើកស្ទួយខ្មែរឱ្យសោះ ព្រោះបើទង្វើរ និងអកប្បកិរិយាមិនសមរម្យ រួមទាំងការចេះតែធ្វើតាមគេដោយខ្វះការសិក្សាពិចារណា និងមិនស្គាល់វប្បធម៌ខ្លួនឯង ដូច្នេះគឺប្រៀបបាននឹងបំផ្លាញទៅវិញទេ ។
តាមអីស្រុកគេ( ប្រទេសជិតខាងយើង ) ដែលគេពុំមានឫសគល់វប្បធម៌ច្បាស់លាស់ គ្មានទំរង់សិល្បៈពិតប្រាកដ និងមិនសំបូរបែបតាមពិធី តាមផ្នែកដូចខ្មែរយើង ដូច្នេះការច្នៃប្រឌិតផ្សេងៗក្នុងសិល្បៈរបស់គេ វាពិតជាមិនចម្លែក ឬប៉ះពាល់ដល់វប្បធម៌អ្វីឡើយ ។
ផ្ទុយទៅវិញ ស្រុកខ្មែរយើងដែលនរណាៗក៏ដឹងថា រវាងប្រទេសយើង និងប្រទេសជិតខាង (ខាងលិច ) គឺខ្មែរយើងជារៀមច្បងនៃគ្រឹះវប្បធម៌សិល្បៈបុរាណ ដូច្នេះយើងមិនអាចចេះតែយកគ្រឹះសិល្បៈវប្បធម៌ដ៏ចំណាស់នេះមកកែច្នៃលេងសើចតែផ្តាសតាមគេបាននុះទេ ! ព្រោះ ៖ ទីមួយ អាចធ្វើឱ្យមានការភាន់ច្រឡំក្នុងភ្នែកអន្តរជាតិក៏ដូចជាក្មេងជំនាន់ក្រោយៗដោយចែកមិនដាច់ថា ណាជាខ្មែរ ណាជាគេ។ ទីពីរ មិនយូរទេវប្បធម៌សិល្បៈដ៏ចំណាស់មួយនេះ ក៏ត្រូវសាបរលាបបាត់ភាពដើមជារបស់ខ្មែរ ហើយនឹងដួលរលំនៅថ្ងៃណាមួយដោយឥតដឹងខ្លួន ។
សូមបងប្អូនមេត្តាគិត ។ បើអាណិត និងចង់ចូលរួមតម្កើងវប្បធម៌ជាតិ សូមបងប្អូនយល់ឱ្យបានច្បាស់ថា ដើម្បីចូលរួមថែទាំ លើកស្ទួយ និងការពារវប្បធម៌ឱ្យគង់វង្សតើគួរធ្វើបែបណា ។ ត្រូវសិក្សាជាមួយមន្ត្រីវប្បធម៌ មន្ត្រីជំនាញឱ្យបានច្បាស់លាស់មុននឹងបញ្ចេញស្នាដៃអ្វីមួយ ចៀសវាងរឿងអាក្រក់កើតឡើង ព្រោះគ្មានបរទេសណាមកចូលរួមខាតបង់ជាមួយយើងទេ ។ នេះជាមតិតិចតួចក្នុងបំណងល្អតាមការយល់ដឹងដ៏ស្តួចស្តើងរបស់ខ្ញុំប៉ុណ្ណោះ សូមកុំគិតថា ជាការរាំងខ្ទប់ ឬជាន់ពន្លិចអ្វីឱ្យសោះ។ សូមបងប្អូន និងមិត្តជួយជាមតិល្អៗបន្ថែម ដើម្បីវប្បធម៌ខ្មែរយើងទាំងអស់គ្នា ៕ (កែសម្រួលដោយ ៖ បុប្ផា) (ប្រភពវីដេអូពី ៖ Meng Keo Pichenda – ពេជ្ជតា)
ចែករំលែកព័តមាននេះ