រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានឲ្យដឹងថា កម្ពុជានឹងបង្កើតអគ្គកុងស៊ុយចំនួន២ នៅប្រទេស២ផ្សេង តាមសំណើរបស់ក្រសួងការបរទេស និងសហប្រតិបត្តិការអន្តរជាតិ ។ ថ្លែងក្នុងពិធីបិទសន្និបាតក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី៣១ ខែមករានេះ នៅវិមានសន្តិភាព សម្តេចតេជោ ហ៊ុន សែន បានបញ្ជាក់យ៉ាងដូច្នេះថា ៖« អម្បាញមិញមានការដំណើរបស់លោកឧបនាយករដ្ឋមន្ត្រីប្រាក់ សុខុន ពង្រីកស្ថានទូតនៅអាហ្រិ្វក និងអាមេរិកឡាទីន ។ ជាគោលការណ៍ខ្ញុំយល់ស្របនៅក្នុងការបង្កើតស្ថានទូតអាចមួយនៅអាហ្រិ្វកខាងត្បូង និងមួយទៀតនៅប្រទេសប្រេស៊ីល» ។
ចំពោះការបង្កើតស្ថានទូតកម្ពុជានេះដែរ សម្តេចតេជោក៏បានស្នើឲ្យមានការពិនិត្យមើលលទ្ធភាពនៅឆ្នាំ២០២១ ឬឆ្នាំ២០២២ខាងមុខ ដោយត្រូវរៀបចំចាប់ពីពេលនេះតទៅទាំងបញ្ហាទាក់ទិននឹងថវិកា អគារ ក៏ដូចជា បុគ្គលិកសម្រាប់បំរើការងារនៅទីនោះ។
សូមជម្រាបថា ពង្រីកស្ថានទូតនេះធ្វើឡើងតាមសំណើរបស់លោកប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបតិ្តការអន្តរជាតិ ។ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសខ្មែរបានលើកឡើងថា មកដល់បច្ចុប្បន្ននេះប្រទេសកម្ពុជាបានភ្ជាប់ទំនាក់ទំនងការទូតជាមួយប្រទេសចំនួន១៧៤ ហើយ មានតំណាងប្រចាំនៅបរទេសចំនួន៦៣ផងដែរ ៕ កែសម្រួលដោយ ៖សុឃាក់
ចែករំលែកព័តមាននេះ