រាជធានីភ្នំពេញ ៖ ប្រទេសកូរ៉េខាងត្បូងបានចាប់ផ្តើមមនាំចូលផ្លែស្វាយពីប្រទេស កម្ពុជានៅ ពេលថ្មីៗ នេះដោយបង្ហាញពីសក្តានុពលថ្មីមួយសម្រាប់សម្រាប់ផ្លែឈើកម្ពុជាចូលទីផ្សារកូរ៉េខាងត្បូង។ តើមានផ្លែឈើ អ្វីទៀតដែរបស់កម្ពុជា ដែលកូរ៉េខាងត្បូងមានបំណងចង់នាំចូលទីផ្សាររបស់ខ្លួន? តើកូរ៉េខាងត្បូង…
រាជធានីភ្នំពេញ ៖ ប្រទេសកូរ៉េខាងត្បូងបានចាប់ផ្តើមមនាំចូលផ្លែស្វាយពីប្រទេស កម្ពុជានៅ ពេលថ្មីៗ នេះដោយបង្ហាញពីសក្តានុពលថ្មីមួយសម្រាប់សម្រាប់ផ្លែឈើកម្ពុជាចូលទីផ្សារកូរ៉េខាងត្បូង។ តើមានផ្លែឈើ អ្វីទៀតដែរបស់កម្ពុជា ដែលកូរ៉េខាងត្បូងមានបំណងចង់នាំចូលទីផ្សាររបស់ខ្លួន? តើកូរ៉េខាងត្បូង គិតយ៉ាង ណាអំពីការវិនិយោគ ការធ្វើពាណិជ្ជកម្ម និង សហប្រតិបត្តិការផ្សេងទៀតជាមួយកម្ពុជា។
កោះសន្តិភាពបានធ្វើកិច្ចសម្ភាសន៍ ផ្តាច់មុខមួយជាមួយជាមួយលោក ផាក ហ៊ឹងខ្យង់ (Park Heung-kyeong) ឯកអគ្គរដ្ឋទូតសាធារណរដ្ឋកូរ៉េ ប្រចាំនៅកម្ពុជាដើម្បីពិនិត្យមើលលើបញ្ហាទាំងអស់នេះ។ ខាងក្រោមនេះជាខ្លឹមសារនៃការសម្ភាសន៍នោះ ។
កោះសន្តិភាព ៖ តើឯកឧត្តម យល់យ៉ាងណា ឬក៏មានការវាយតម្លៃយ៉ាងដូចម្តេច ចំពោះកិច្ចសហប្រតិបត្តការ រវាងប្រទេសកម្ពុជានិងប្រទេសកូរ៉េ? ឯកអគ្គរដ្ឋទូត ៖ ជាដំបូង ! ខ្ញុំពិតជារីករាយខ្លាំងណាស់ ដែលបានមកបំពេញបេសកម្មជា ឯកអគ្គរដ្ឋទូតនៅព្រះរាជាណាចក្រកម្ពុជា ។ ខ្ញុំយល់ឃើញថា ប្រទេសកម្ពុជាឥឡូវនេះគឺប្រៀបដូចជាសត្វខ្លាថ្មី មួយនៅអាស៊ី ដែលកំពុងមានការអភិវឌ្ឍន៍យ៉ាងលឿន ដោយមានកំណើនសេដ្ឋកិច្ចលួតលាស់ ប្រមាណជាង ៧ ភាគរយ ជារៀងរាល់ឆ្នាំ ហើយជាប្រទេសដ៏សំខាន់មួយ នៃដងទន្លេមេគង្គដែលស្ថិតនៅភាគខាងត្បូងនៅឥណ្ឌូចិននេះ ។
កោះសន្តិភាព ៖ ការវិនិយោគរបស់សហគ្រិនកូរ៉េ មកលើកម្ពុជាមានលក្ខណ:យ៉ាងដូចម្តេចដែរ នៅពេលថ្មីៗនេះ? ឯកអគ្គរដ្ឋទូត៖ ពិតណាស់ ចំនួនវិនិយោគរបស់សហគ្រិនកូរ៉េនៅក្នុងប្រទេសកម្ពុជាគិតជាទឹក ប្រាក់គឺមាន ប្រមាណ ៥៨០ លានដុល្លារអាមេរិក ក្នុងមួយឆ្នាំ ដោយកាលពីមុន គេច្រើនវិនិយោគលើវិស័យអចលនទ្រព្យ ក៏ប៉ុន្តែថ្មីៗនេះ មាន ការវិនិយោគច្រើន ទៅលើវិស័យឧស្សាហកម្ម និងផលិតកម្ម។ កោះសន្តិភាព៖ តើមូលហេតុអ្វីបានជាកូរ៉េ ចាប់អារម្មណ៏ក្នុងការវិនិយោគនៅប្រទេសកម្ពុជា?
ឯកអគ្គរដ្ឋទូត៖ បើតាមការសង្កេតមើល ដោយសារតែវិស័យហិរញ្ញវត្ថុនៅកម្ពុជា។ កម្ពុជាមានសេរីភាពនៃ លំហ រូបិយប័ណ្ណបរទេស ដោយក្នុងវិស័យសេដ្ឋកិច្ចគឺប្រើប្រាស់ប្រាក់ដុល្លារអាមេរិក ហើយក្នុងវិស័យឧស្សាហកម្ម និងផលិតកម្ម សហគ្រិនកូរ៉េគឺអាចកាត់បន្ថយចំណាយសោហ៊ុយផលិតកម្ម ពោលគឺប្រាក់ខែអប្បបរិមា ២០០ ដុល្លារអាមេរិកក្នុងមួយខែ។
កោះសន្តិភាព ៖ តើទំហំពាណិជ្ជកម្មរវាងប្រទេសទាំង២ មានចំនួនទឹកប្រាក់ប៉ុន្មាន? ហើយតើប្រទេសកូរ៉េ នាំចូលផលិតផលអ្វីច្រើនជាងគេមកកាន់ទីផ្សារប្រទេសកម្ពុជា ហើយតើ ផលិតផលសំខាន់ៗអ្វីខ្លះរបស់ ប្រទេសកម្ពុជា ដែលប្រទេសកូរ៉េ នាំចូលទៅកាន់ទីផ្សាររបស់ខ្លួនវិញ?
ឯកអគ្គរដ្ឋទូត៖ កាលពីឆ្នាំ ១៩៩៧ ទំហំពាណិជ្ជកម្មរវាងប្រទេសទាំង២មានចំនួនទឹកប្រាក់ត្រឹម ៥៤ លាន ដុល្លារអាមេរិកតែប៉ុណ្ណោះ ។ ក្នុងឆ្នាំ ២០១៨ ទំហំពាណិជ្ជកម្មរវាងប្រទេសទាំង២បានកើនឡើងយ៉ាង ខ្លាំង គឺសម្រេចបានរហូតដល់ ៩៨០ លានដុល្លារអាមេរិក។ នៅថ្ងៃខាងមុខ ខ្ញុំរំពឹងថាទំហំពាណិជ្ជកម្មរវាងប្រទេស ទាំង២នឹងកាន់តែកើនឡើង បន្ថែមទៀត ដោយសារតែនឹងមានការពង្រីកវិសាលភាព ការប្រើប្រាស់នូវកិច្ច ព្រមព្រៀងពាណិជ្ជកម្មសេរីអាស៊ាន-កូរ៉េ ហើយនិងពង្រីកការធ្វើការវិនិយោគលើវិស័យឧស្សាហកម្ម និងវិស័យកសិកម្មក្នុងប្រទេសកម្ពុជាបន្ថែមទៀតផងដែរ។
នៅក្នុងឆ្នាំ២០១៩ប្រទេសកូរ៉េ បាននាំចូលផលិតផលសំខាន់ៗជាច្រើន ចូលមកកាន់ទីផ្សារប្រទេស កម្ពុជាដូចជា រថយន្តជិះធម្មតា, រថយន្តដឹកទំនិញ , ភេសជ្ជៈ, គ្រឿងវាយនភណ្ឌ័, គ្រឿងសំអាង (cosmetics) និងថ្នាំពេទ្យជាដើម ។
ចំណែកផលិតផលសំខាន់ៗ របស់ប្រទេសកម្ពុជាដែលប្រទេសកូរ៉េ នាំចូលទៅកាន់ទីផ្សាររបស់ខ្លួន មានដូចជា៖ សម្លៀកបំពាក់ និងដំណាំកសិផល។ កាលពីពេលថ្មីៗនេះដែរ ក្រុមហ៊ុន Hyundai Mao Legacy របស់កូរ៉េ បានបើកសម្ពោធរោងចក្រកែឆ្នៃនិង វិចខ្ចប់ផលិតផលកសិកម្ម ជាផ្លូវការនៅកម្ពុជា ដូចជាការ ត្រួតពិនិត្យផ្លែ ស្វាយ ដើម្បីនាំចេញទៅប្រទេសកូរ៉េជាដើម។ ម្យ៉ាងវិញទៀត តាមរយៈការបើក សម្ភោធរោងចក្រថ្មីនេះ ប្រទេសកម្ពុជានិងប្រទេសកូរ៉េ អាចសហការគ្នា ដើម្បីពង្រីកទីផ្សារដំណាំ កសិផលរបស់កម្ពុជាបន្ថែមទៀត ដូចជាការនាំចេញផ្លែស្វាយ មិនត្រឹមតែនាំចេញទៅកាន់ប្រទេសកូរ៉េនោះទេ តែក៏អាចនិងនាំចេញទៅកាន់ ប្រទេសនៅតំបន់អាស៊ីអាគ្នេហ៍ ដូចជា ប្រទេសសាំងហ្គាពួរ ព្រមទាំងអាចនាំចេញ ទៅប្រទេសនៅអ៊ឺរ៉ុប បានផងដែរ។
កោះសន្តិភាព៖ តើការនាំចេញផ្លែស្វាយទៅកាន់ប្រទេសកូរ៉េ មានទំហំទឹកប្រាក់ ឬ ក៏មានចំនួនប៉ុន្មានតោន ក្នុងមួយឆ្នាំ? ឯកអគ្គរដ្ឋទូត៖ ខ្ញុំក៏មិនដឹងអំពីតួលេខច្បាស់លាស់នៅឡើយទេ ក៏ប៉ុន្តែក្នុងដំណាក់កាលដំបូង ការនាំចូលផ្លែ ស្វាយមានចំនួនមិនច្រើនពាន់តោនប៉ុន្មានទេ ដោយហេតុថាការនាំចូលផ្លែឈើពីបរទេសចូលទីផ្សារប្រទេស កូរ៉េខាងត្បូងមានភាពសាំញ៉ាំបន្តិច។ ប៉ុន្តែចំនួននេះនឹងអាចកើនឡើង ។
តាមការសង្កេតឃើញថា ផ្លែស្វាយកម្ពុជាដែលនាំចូលទៅកាន់ទៅផ្សារកូរ៉េ នៅពេលភ្ញៀវទេសចរដែលធ្វើ ដំណើរកំសាន្តទៅប្រទេសកូរ៉េ ពួកគេពិតជាចាប់អារម្មណ៏៍នឹង រសជាតិផ្លែស្វាយ របស់កម្ពុជាណាស់ ព្រមទាំងទិញត្រលប់ទៅស្រុកកំណើតវិញផងដែរ ។ ហើយសម្រាប់ប្រជាជនកូរ៉េវិញ ក៏ចូលចិត្តរសជាតិផ្លែស្វាយរបស់កម្ពុជាដែរ ព្រោះផ្លែ ស្វាយកម្ពុជាមាន រសជាតិមុតឆ្ងាញ់ជាងផ្លែស្វាយរបស់កូរ៉េ ដែលបានដាំនៅលើកោះជេជូប្រទេស កូរ៉េខាងត្បូងទៅទៀត ។ ហើយមួយវិញទៀតដំណាំផ្លែទុរេនរបស់កម្ពុជា ក៏ទទួលបានចាប់អារម្មណ៍ និងគាំទ្រខ្លាំងណាស់ដែរពីសំណាក់ ប្រជាជនកូរ៉េខាងត្បូង ។ ផ្លែធុរេនរបស់កម្ពុជាមិនសូវមាន ក្លិនឈួលខ្លាំងដូចផ្លែទុរេនមកពីបណ្តាប្រទេស ដទៃទៀតនោះទេ ផ្លែធុរេនរបស់កម្ពុជាមានក្លិនស្រាលនិងក្រអូប ព្រមទាំងមានរសជាតិឆ្ញាញ់ ធ្វើអោយ ប្រជាជនកូរ៉េខាងត្បូងជាប់ចិត្តខ្លាំងមែនទែន ដូច្នេះលទ្ធភាពនៃ ការនាំចេញផ្លែធុរេនពីកម្ពុជាចូល ទៅកាន់ទីផ្សារកូរ៉េខាងត្បូងគឺមានចំនួនច្រើន។
កោះសន្តិភាព ៖ តើចំនួនពលករកម្ពុជាដែលធ្វើការនៅប្រទេសកូរ៉េខាងត្បូងមានចំនួនកើនឡើងប៉ុន្មាន? នៅថ្ងៃខាងមុខ តើប្រទេសកូរ៉ខាងត្បូង ត្រូវការពលករ ពីកម្ពុជាបន្ថែមទៀតដែឬទេ? ឯកអគ្គរដ្ឋទូត៖ ពលករកម្ពុជាដែលធ្វើការនៅប្រទេសកូរ៉េ មានចំនួនជិត ៤៨,០០០នាក់ ក្នុងនោះតាម រយៈប្រពន្ធ័អនុញ្ញាតមុខរបរ គឺមានចំនួនជិត៣៨,០០០នាក់ ។ ទំហំនៃការបញ្ជួនពលករតាមរយៈ ប្រពន្ធ័អនុញ្ញាតមុខរបរ ក្នុងរយៈពេល៥ឆ្នាំរបស់កម្ពុជាមានចំនួនពលករចន្លោះពី៦,០០០ ទៅ៧,០០០នាក់ ប្រចាំឆ្នាំ និងស្ថិតក្នុងចំណាត់ថ្នាក់លេខ ១ ក្នុងចំណោមប្រទេសដទៃ ដែលបញ្ជួនពលករច្រើន ជាង គេទៅកាន់ប្រទេសកូរ៉េខាងត្បូង។យ៉ាងណាមិញប្រទេសកូរ៉េខាងត្បូងក៏កំពុងគិតគូរពីការពង្រីក បន្ថែមនូវទំហំចំនួនពលករកម្ពុជាដែលចូលទៅធ្វើការនៅប្រទេសកូរ៉េខាងត្បូងអោយបានច្រើនជារៀងរាល់ឆ្នាំផងដែរ។
កោះសន្តិភាព៖ តើពលករកម្ពុជាដែលធ្វើការនៅប្រទេសកូរ៉េខាងត្បូង ភាគច្រើនធ្វើនៅក្នុងវិស័យអ្វីដែរ?
ឯកអគ្គរដ្ឋទូត ៖ ពលករកម្ពុជាដែលធ្វើការនៅប្រទេសកូរ៉េខាងត្បូង ភាគច្រើនធ្វើនៅក្នុងវិស័យសំខាន់មួយចំនួន ដូចជា វិស័យឧស្សាហកម្មនិងផលិតកម្ម, វិស័យកសិកម្ម និងជលផល។
កោះសន្តិភាព៖ ងាកទៅប្រាក់ចំណូលវិញ តើប្រាក់ខែអតិបរមានិងអប្បរមារបស់ពលករ កម្ពុជាដែល ធ្វើការនៅប្រទេសកូរ៉េខាងត្បូងមានចំនួនប៉ុន្មាន? ឯកអគ្គរដ្ឋទូត៖ ប្រាក់ខែអតិបរមា និងអប្បរមារបស់ពលករកម្ពុជា គឺមិនមានតួលេខច្បាស់លាស់នោះទេ គឺវាអាស្រ័យទៅលើការអនុម័តច្បាប់នៃការងារនៅក្នុងប្រទេសកូរ៉េ ។ តែគ្រាន់តែដឹងថាជាមធ្យម ពលករ កម្ពុជាទទួលបានប្រាក់ខែ ប្រហែល ២០០០ ដុល្លារអាមេរិក ហើយក្នុងមួយឆ្នាំ ប្រាក់របស់ពលករកម្ពុជាសរុបទាំងអស់ ដែលផ្ញើរមកកាន់ប្រទេសកម្ពុជាមាន ចំនួនជិត៣លាន ដុល្លារអាមេរិក ក្នុងមួយឆ្នាំ ។
កោះសន្តិភាព៖ តើជំនួយអភិវឌ្ឍន៍ផ្លូវការឬ ODA របស់កូរ៉េខាងត្បូង ដែលផ្តល់ដល់កម្ពុជា មានទំហំ ទឹកប្រាក់ប៉ុន្មានដែរ ទាំង ជំនួយឥតសំណង់ និងប្រាក់កម្ចីដែលមានការប្រាក់ទាប? នៅក្នុងគម្រោងដែល សំខាន់ជាងគេបំផុត តើប្រទេសកូរ៉េផ្តោតទៅលើអ្វីដែរ ? ឯកអគ្គរដ្ឋទូត៖ ប្រទេសកម្ពុជា គឺជាប្រទេសចំណាត់ថ្នាក់លេខ២ ដែលរដ្ឋាភិបាលរបស់កូរ៉េខាង ត្បូងបានផ្តល់ការជួយឧបត្ថម្ភ ។ ហើយប្រទេសកូរ៉េខាងត្បូងក៏កំពុងអនុមត័គម្រោង ផ្តល់ជំនួយ ឥតសំណងនិងឥណទានជាច្រើន ប្រហែលជា៧៨០លានដុល្លារអាមេរិក រហូតដល់ឆ្នាំ២០២៧ ។ ហើយក៏កំពុងផ្តល់៦០លានដុល្លារអាមេរិក ទៅ៧០លានដុល្លារអាមេរិក ជារៀងរាល់ឆ្នាំផងដែរ ។
ចំពោះជំនួយ គឺបែងចែកជា២ផ្នែក គឺជំនួយឥតសំណងនិងជំនួយឥណទាន ក្នុងនោះជំនួយឥណទាន គឺកំពុងអនុមត័ដោយផ្តោតទៅលើកម្រោងធំៗ ដូចជា គម្រោងអភិវឌ្ឍន៏ហេដ្ឋារចនាសម្ពន្ធ័ ការសាងសងផ្លូវ ឬកែលម្អរផ្លូវជាតិ និងការសាងសងទំនប់ទឹកជាដើម ។ ចំណែកជំនួយឥតសំណង គឺកំពុងអនុមត័នូវគម្រោង ជាច្រើនដោយផ្តោតសំខាន់លើ វិស័យសុខាភិបាល, វិស័យអប់រំនិងបណ្តុះ បណ្តាល និងគម្រោង អភិវឌ្ឍន៍ជនបទ។
បច្ចុប្បន្ននៅកម្ពុជា គឺមានស្ថាប័ន ដែលអនុវត្តន៍គំរោងឥតសំណងលើវិស័យកសិកម្មនៅ ប្រទេស កម្ពុជា ដែលទាក់ទងទៅនិងគំរោងអនុវត្តន៏ជនបទដែរ ជាពិសេសលើ គំរោង អភិវឌ្ឍន៏គ្រាប់ពូជពោត និងគ្រាប់ពូជ ដំឡូងបារាំង ដែលមានគុណភាពល្អៗ ព្រោះពោតគឺជាដំណាំកសិផលដ៏សំខាន់ សំរាប់ការចិញ្ចឹមសត្វ ហើយគ្រាប់ពូជដំឡូងបារាំងក៏សំខាន់ណាស់ដែរក្នុងវិស័យកសិកម្ម។ ហេតុដូច្នេះហើយ ប្រទេសកូរ៉េខាងត្បូងនឹងពង្រីកនិងពន្លឿនការសហការគ្នាជាមួយប្រទេសកម្ពុជាផងដែរ។ មួយវិញទៀត ខាងរដ្ឋាភិបាលកូរ៉េខាងត្បូងកំពុងយកចិត្តទុកដាក់ ទៅលើគម្រោងជួសជុល ប្រាសាទក្នុងតំបន់អង្គរវត្ត ក៏ដូចជាទីលានជល់ដំរី ដោយប្រើថវិការឥតសំណងផងដែរ និងមួយផ្សេងទៀត គឺទាក់ទងនិងគម្រោងប្រព្រឹត្តិកម្មកាកសំណល់។
ដោយសារនាពេលបច្ចុប្បន្ននេះ ប្រទេសកម្ពុជាកំពុងអភិវឌ្ឍន៍ខ្លាំងលើវិស័យឧស្សាហកម្ម ដូច្នេះបញ្ហាកាកសំណល់ក៏ជាបញ្ហាសំខាន់មួយ ដែលអាចប៉ះពាល់ដល់បរិស្ថានក្នុងប្រទេសកម្ពុជាដែរ ។ នេះគឺជា គម្រោង មួយដែលរដ្ឋាភិបាលកូរ៉េកំពុងយកចិត្តទុកដាក់ ក្នុងការសហការគ្នាជាមួយរដ្ឋាភិបាលកម្ពុជា។ ជាក់ស្តែង បច្ចុប្បន្នក៏មានគម្រោងមួយ គឺជាគម្រោងកប់កាកសំណល់នៅក្នុង ខេត្តសៀមរាម ដែលរដ្ឋាភិបាល នៃប្រទេស ទាំង២កំពុងដំណើរការជាមួយផងដែរ នៅឯភ្នំពេញក៏មានគម្រោងនេះផងដែរ ។
កោះសន្តិភាព ៖ ទាក់ទងនិងការតាំងចិត្តរបស់ឯកឧត្តមក្នុងនាមជាឯកអគ្គរដ្ឋទូត តើកិច្ចសហប្រតិបត្តិការ រវាងប្រទេសទាំងពីរយ៉ាងដូចម្តេច? ឯកអគ្គរដ្ឋទូត ៖ នៅក្នុងអាណត្តិរបស់ខ្ញុំ ខ្ញុំនឹងយកចិត្តទុកដាក់ក្នុងការសហការគ្នាជាមួយកម្ពុជា លើវិស័យកសិកម្មជាមុនសិន បន្ទាប់មកមានវិស័យជាច្រើនផ្សេងទៀត ដូចជា គម្រោងសំណង់ដែល ដំណើរ មិនសូវ រលូននៅប្រទេសកម្ពុជា ដែលត្រូវដោះស្រាយជាចាំបាច់ ។ មួយទៀត ទាក់ទងនឹងការបង្កើតថាមពល ប្រើប្រាស់ឡើងវិញ ដែលកម្ពុជាអាចសហការគ្នាបាន ៕
ចែករំលែកព័តមាននេះ